.jpg)
សេះ Black Woman និងអ្នកបញ្ជា មឿន មុំ ឡើងទទួលរង្វាន់។ សហការី
ភ្នំពេញៈ សេះពូជដើមនាំចូលមកពីអាមេរិក Black Woman បានធ្វើឲ្យព្រឹត្តិការណ៍ប្រណាំងសេះ Smart Land and Home Champion រដូវកាលទី ៣ ឆ្នាំ ២០១៨ របស់ 7NG ប្រចាំខែសីហានេះ បានដំណើរទៅ កាន់តែទទួលបានការចាប់អារម្មណ៍ ខណៈសេះចំណូលថ្មីមួយនេះ បានរត់វ៉ាដាច់សេះខ្លាំងៗឈរនៅពូល A ជាមួយគ្នា ដើម្បីឈ្នះតំណែងជើងឯក ជាលើកដំបូងនោះ។
លោក អឿន សុផល គណៈកម្មការបច្ចេកទេសការប្រណាំងសេះ Smart Land and Home Champions និងជាម្ចាស់សេះ Black Woman នេះ បានប្រាប់ភ្នំពេញ ប៉ុស្តិ៍ ថា៖ «សេះនេះ ខ្ញុំបានទិញពី 7NG ហើយទាំងសេះ និងអ្នកបញ្ជា សុទ្ធតែមានបទពិសោធតិច ដោយទើបបានចូលរួមប្រកួតក្នុងព្រឹត្តិការណ៍នេះ កាលពីខែមុន។ ចំណែកការប្រកួតខែនេះទាំងសេះ និងអ្នកបញ្ជាចាប់ផ្តើមស្គាល់ចិត្តគ្នា និងសមទៅនឹងទីលាន នាំឲ្យទទួលបានលេខ ១ តែម្តង»។
បើទោះបីជា Black Woman បានត្រឹមលេខ ៤ ក្នុងពូលមានសេះលំដាប់អន្តរជាតិនេះ សម្រាប់ការបង្ហាញខ្លួនជាលើកដំបូងនៃព្រឹត្តិការណ៍ប្រណាំងសេះ Smart Land and Home Champion នៅលើទឹកដីវិហារសួគ៌ កាលពីខែកក្កដា ប៉ុន្តែសម្រាប់ការប្រកួតប្រចាំខែសីហានេះ ដែលត្រូវបានធ្វើឡើង កាលពីថ្ងៃអាទិត្យ កន្លងមកនេះ Black Woman ដែលបញ្ជាដោយកីឡាករ មឿន មុំ បានរត់វ៉ាដាច់ទាំងសេះលេខ ១ ប្រចាំខែកក្កដា Belly រួមទាំងសេះលេខ ២ Kenzo និងសេះលេខ ៣ Carino ដើម្បីទទួលបានលេខ ១ ជាលើកដំបូង ដ៏គួរឲ្យភ្ញាក់ផ្អើលបំផុត។
លោក អឿន សុផល បានបន្ថែមថា៖ «ការទទួលបានលេខ ១ របស់ Black Woman បានធ្វើឲ្យមានការចាប់អារម្មណ៍ខ្លាំងពីអ្នកទស្សនាផ្ទាល់ ព្រោះនេះជាសេះថ្មី គេមិនចាប់អារម្មណ៍ទេ ប៉ុន្តែនៅពេលសេះនេះ បានលេខ ១ ដោយរត់វ៉ាដាច់គូប្រកួតទៀតនោះ វាបានធ្វើឲ្យមានការភ្ញាក់ផ្អើល ដែលជ័យជម្នះនេះ បានក្លាយជាកំណត់ត្រាថ្មីរបស់សេះ ១ ក្បាលនេះ ហើយកម្រិតរបស់ Black Woman ខ្ញុំជឿថា អាចនឹងបានចូលរួមការប្រកួតដណ្តើមយកពានធំ នៅចុងឆ្នាំនេះ ព្រោះល្បឿនរបស់គាត់លឿន ពិសេសពេលរត់ដល់ទីហើយកម្លាំងរបស់គាត់នៅតែមានទៀត»។
ជាមួយការទទួលបានចំណាត់ថ្នាក់លេខ ១ របស់សេះ Black Woman ធ្វើឲ្យសេះឈ្មោះ Belly ដែលជាម្ចាស់ជើងឯក កាលពីខែកក្កដា បានត្រឹមលេខ ៣ វិញ ខណៈសេះឈ្មោះ World Wave ទទួលបានលេខ ២ ប៉ុន្តែសេះលេខ ២ Kenzo និងសេះលេខ ៣ Carino មិនទទួលបានចំណាត់ថ្នាក់សម្រាប់ការប្រកួតខែសីហានេះទេ។
ដោយឡែក ចំណាត់ថ្នាក់នៃការប្រកួតប្រជែងរវាងសេះក្នុងស្រុក ដែលឈរនៅពូល C ប្រចាំខែសីហានេះ ក៏មានការប្រែប្រួលខុសពីខែកក្កដា ផងដែរ ក្នុងសេះលេខ ១ NAVARA បានលេខ ៣ វិញ ឯសេះលេខ ២ KK បានលេខ ១ វិញម្តង ខណៈសេះឈ្មោះ អាឆ្លាម ដែលធ្លាប់បានលេខ ៣ ពីខែមុន គឺបានលេខ ២ វិញ ក្នុងខែសីហា នេះ។
ចំណែកការប្រជែងរវាងសេះឈរនៅពូល D សេះឈ្មោះប្រុសប៉ាវ បានដណ្តើមយកលេខ ១ ពីសេះឈ្មោះអារ៉េ បានយ៉ាងជោគជ័យ ធ្វើឲ្យអារ៉េ បានត្រឹមលេខ ២ ចំណែកសេះឈ្មោះអាចេត ជាប់ចំណាត់ថ្នាក់លេខ ៣ ដូចកាលពីខែមុនដដែល៕
