.jpg)
រឿង សោភ័ណ្ឌ និង ឡុង សុភី ត្រូវប្រកួតគ្នា ដណ្តើមយកខ្សែក្រវាត់ និងប្រាក់រង្វាន់៤ពាន់ដុល្លារ។ សហការី
ភ្នំពេញ៖ កីឡាករជើងខ្លាំងលំដាប់លេខ ១ របស់កម្ពុជា គឺអ្នកលេងកណ្តាប់ដៃឆ្វេង រឿង សោភ័ណ្ឌ និងអ្នកជំនាញប្រើជង្គង់ ឡុង សុភី ឬ នី សុភី នឹងត្រូវប្រកួតផ្តាច់ព្រ័ត្រ ដណ្តើមយកខ្សែក្រវាត់ទម្ងន់ ៦៩ គីឡូក្រាម នៅលើសង្វៀន CNC នៅល្ងាចថ្ងៃសៅរ៍នេះ ហើយជើងខ្លាំង ឡៅ ចន្ទ្រា ក៏ត្រៀមនឹងស្តារមុខមាត់របស់ខ្លួនតាមរយៈការចង់ផ្តួលថៃ ក្នុងថ្ងៃជាមួយគ្នានោះផងដែរ។
នៅមុនការឡើងមកជួបគ្នាក្នុងវគ្គផ្តាច់ព្រ័ត្រដណ្តើមយកខ្សែក្រវាត់ អមដោយប្រាក់រង្វាន់ ៤ ០០០ ដុល្លារ និង ១ ០០០ ដុល្លារនេះ ទាំង រឿង សោភ័ណ្ឌ និង ឡុង សុភី សុទ្ធតែបានយកឈ្នះជើងខ្លាំងថៃ នៅវគ្គជម្រុះដូចគ្នា ហើយការវិលមកជួបគ្នាដោយកម្រលើកនេះ លោក ឡុង សាលវ័ន្ត បានអះអាងថា ឡុង សុភី បានពង្រឹងទាំងកលល្បិច និងបច្ចេកទេសប្រកួតដើម្បីត្រៀមយកឈ្នះលើ រឿង សោភ័ណ្ឌ។
គ្រូបង្វឹក និងជាបងប្រុស ឡុង សុភី លោក សាវ័ន្ត បានប្រាប់កាលពីម្សិលមិញថា៖ «ឡុង សុភី បានហ្វឹកហាត់បង្កើនទៅលើកលល្បិច និងបច្ចេកទេសនៃការប្រកួត ហើយយើងក៏បាន សិក្សាបន្ថែមទៅលើស្ថានភាពប្រកួតរបស់យើងទៅនឹង រឿង សោភ័ណ្ឌ ផងដែរ ព្រោះអ្នកទាំង ២ នេះ សុទ្ធតែបានដឹងពីសមត្ថភាពប្រកួតគ្នាទៅវិញទៅមក អ៊ីចឹងបើមើលទៅលើលទ្ធភាព យើងអាចមានសង្ឃឹមឈ្នះ ៨០ ភាគរយ»។
គ្រូជំនួយរបស់ក្រុមជម្រើសជាតិគុនខ្មែរ លោក ឡុង សាលវ័ន្ត បានបន្ថែមថា៖ «ឡុង សុភី បានចំណាយពេលច្រើនក្នុងការហ្វឹកហាត់ គឺគេខំប្រឹងទាំងកម្លាំងកាយ និងកម្លាំងចិត្ត ដើម្បីបង្កើនសមត្ថភាពខ្លួនឯង ព្រោះគេពិតជាចង់ឈ្នះខ្សែក្រវាត់ និងប្រាក់រង្វាន់នេះខ្លាំងបំផុត»។
ផ្ទុយពីនេះ រឿង សោភ័ណ្ឌ ហាក់មានភាពស្ទាក់ស្ទើរ សម្រាប់ការវិលមកជួប ឡុង សុភី ព្រោះការជួបគ្នា ៣ លើក កាលពីជាង ៣ ឆ្នាំមុន សោភ័ណ្ឌ បានឈ្នះតែ ១ ដងទេ និងចាញ់ សុភី ២ ដង។ ចំណែកលើកនេះ សោភ័ណ្ឌ មិនទាន់ច្បាស់ថា កណ្តាប់ដៃពិឃាតដែលរូបគេធ្លាប់ផ្តួលគួប្រកួតឲ្យសន្លប់រាប់មិនអស់នោះអាចនឹងបង្រ្កាប ឡុង សុភី បាន ឬក៏យ៉ាងណានោះទេ។
រឿង សោភ័ណ្ឌ បានប្រាប់ភ្នំពេញប៉ុស្តិ៍ កាលពីថ្ងៃព្រហស្បតិ៍ថា៖ «លទ្ធផលយ៉ាងណានោះ យើងមិនទាន់ហ៊ានទាយទុកមុននោះទេ ព្រោះយើងហាត់ដូចគ្នា ហើយបច្ចេកទេសប្រកួត ក៏ចាស់វស្សាដូចគ្នា។ យើងមិនមានប្រៀបអ្វីលើគេនោះទេ ហើយឱកាសប្រើកណ្តាប់ដៃក៏គេខ្ពស់ជាងយើងដែរ ប៉ុន្តែខ្ញុំនឹងប្រឹងប្រែងដណ្តើមយកខ្សែក្រវាត់នេះឲ្យបាន»។
ជាមួយគ្នានេះដែរ កីឡាករជើងខ្លាំងរបស់កម្ពុជា ឡៅ ចន្ទ្រា ចង់ប្រើការប្រកួតមិត្តភាពអន្តរជាតិជាមួយអ្នកប្រដាល់ថៃ Khun Krongthap នៅថ្ងៃសៅរ៍នោះ ដើម្បីលុបលាងភាពអាម៉ាស់ ដែលរូបគេត្រូវបានជើងខ្លាំងថៃ Kongthailen ច្រាសកែងសង បណ្តាលឲ្យសន្លប់ក្នុងទឹកទី ២ ដ៏កម្របំផុត នៅលើសង្វៀន CNC នេះ កាលពីថ្ងៃទី ១ ខែ កញ្ញា ឆ្នាំ ២០១៩។
អតីតជើងខ្លាំង ឡៅ ស៊ីណាត ដែលជាប្រុសបង្កើតរបស់ ឡៅ ចន្ទ្រា បានប្រាប់ភ្នំពេញប៉ុស្តិ៍ថា៖ «ការសន្លប់នោះ ដោយសារយើងភ្លាត់ស្នៀត គឺយើងវាយកែងគេមិនត្រូវ ហើយត្រូវបានគេច្រាសកែងសងមកលើយើងវិញ ប៉ុន្តែសម្រាប់ការប្រកួតលើកនេះ ចន្ទ្រា ខិតខំហ្វឹកហាត់ណាស់ ព្រោះវាចង់ឈ្នះខ្លាំងណាស់ ដើម្បីស្តារមុខមាត់ឡើងវិញ»។
ចំណែកជើងខ្លាំងទម្ងន់ធ្ងន់ ព្រំ សំណាង ដែលជារៀមច្បងរបស់ ឡៅ ចន្ទ្រា ក៏ត្រូវបានដាក់ឲ្យប្រកួតក្នុងទម្ងន់ ៧៥ គីឡូក្រាម ជាមួយអ្នកប្រដាល់ប្រេស៊ីល Pereira Jean Carlos នៅថ្ងៃសៅរ៍នោះដែរ ហើយ ឡៅ ស៊ីណាត ដែលជាអ្នកបង្វឹក បានប្រាប់ថា ព្រំ សំណាង ហ្វឹកហាត់ត្រៀមបានល្អ នឹងចង់ឈ្នះការប្រកួតនេះ ដូច ឡៅ ចន្ទ្រា ដែរ៕
