.jpg)
ខ្សែប្រយុទ្ធអន្តរជាតិអាហ្សង់ទីន Lionel Messi (ឆ្វេង) និងតារាឆ្នើមរបស់ក្រូអាស៊ី Luka Modric។ AFP
ក្រុងកាហ្សាន់: ក្រុមបាល់ទាត់ជម្រើសជាតិអាហ្សង់ទីន កំពុងតែព្យាយាមផ្តល់ការលើកទឹកចិត្តដល់តារាឆ្នើម Lionel Messi ខណៈដែលក្រុមយក្សរបស់អាមេរិកខាងត្បូងមួយនេះ ត្រៀមសម្រាប់ការប្រកួតដ៏សំខាន់ក្នុងពូល ជាមួយនឹងក្រុមជម្រើសជាតិក្រូអាស៊ី នៅរាត្រីនេះ។ Messi មិនបានជួបការចាប់ផ្តើមដ៏រីករាយឡើយក្នុង World Cup កាលពីថ្ងៃសៅរ៍ តាមរយៈការមិនអាចស៊ុតបាល់ប៉េណាល់ទីចូលទី ខណៈដែលក្រុមជម្រើសជាតិអាហ្សង់ទីន បានបញ្ចប់ក្នុងលទ្ធផលស្មើ ១-១ ជាមួយនឹងក្រុមប្រទេស ដ៏តូច អ៊ីស្លង់។
វាបានក្លាយជាលទ្ធផលមួយដែលបានបង្កើតឲ្យមានភាពស្រពេចស្រពិលជាថ្មីអំពីសមត្ថភាពរបស់អាហ្សង់ទីន ក្នុងការរក្សាការប្រជែងពាន World Cup ក្នុងពេលនេះ ពោលគឺរយៈពេល ៤ ឆ្នាំ ក្រោយ ពីពួកគេបានឈានទៅវគ្គផ្តាច់ព្រ័ត្រ ក្នុងប្រទេសប្រេស៊ីល។
លទ្ធផលដ៏ខកចិត្តមួយផ្សេងទៀត នៅរាត្រីនេះ អាចនឹងបង្កើតឲ្យមានការគិតថា អាហ្សង់ទីន អាចនឹងស្ថិតនៅផ្លូវនៃការធ្លាក់ចេញត្រឹមវគ្គចែកពូល ដូចកាលដែលពួកគេបានធ្លាក់ចេញត្រឹមជុំទី ១ លើកដំបូងកាលពីឆ្នាំ ២០០២។
អតីតតារាឆ្នើមលោក Diego Maradona បានចាត់ទុកលទ្ធផលពេលប្រកួតជាមួយនឹងក្រុមជម្រើសជាតិអ៊ីស្លង់ «ជាលទ្ធផលដ៏អាម៉ាស់» និងបានព្រមានដល់លោកគ្រូបង្វឹក Jorge Sampaoli ថា លោកមិនអាចវិលទៅកាន់ប្រទេសអាហ្សង់ទីន ជាមួយនឹងទម្រង់លេងដូចគ្នានេះឡើយ។ ដើម្បីបន្ថែមទៅលើការខកចិត្តផ្សេងៗ ការមិនអាចស៊ុតបាល់ប៉េណាល់ទីចូលទីរបស់ Messi បានកើតឡើង រួមជាមួយនឹងការមិនអាចរកបានគ្រាប់បាល់ពីការស៊ុតបាល់សំដៅទី ១១ លើក ដែលជាអត្រាដ៏ច្រើនបំផុតក្នុងការប្រកួតមួយក្នុង World Cup ពីសំណាក់កីឡាករម្នាក់ ចាប់តាំងពីកីឡាករអ៊ីតាលី Luigi Riva ធ្វើបានកាលពីឆ្នាំ ១៩៧០។
ទោះបីជាយ៉ាងណា កីឡាករអាហ្សង់ទីន បានបញ្ចេញប្រតិកម្មភ្លាមៗដើម្បីលើកទឹកចិត្តដល់តារាឆ្នើមរបស់ក្លិប Barcelona រូបនេះ។ ខ្សែប្រយុទ្ធអន្តរជាតិអាហ្សង់ទីន Paulo Dybala បានឲ្យដឹងថា៖ «យើងទាំងអស់គ្នាស្ថិតនៅពីក្រោយរូបគេ។ គេដឹងថា គេអាចទទួលបានការគាំទ្រពីយើងច្រើនជាងគេទាំងអស់»។
Eriksen នឹងផ្តល់គ្រោះថ្នាក់ ខណៈអូស្ត្រាលី សម្លឹងរកការស្តារមុខមាត់
ខ្សែបម្រើ Mile Jedinak ដែលជាប្រធនាក្រុម បានបញ្ជាក់ថា ក្រុមបាល់ទាត់ជម្រើសជាតិ អូស្ត្រាលីមិនអាចផ្តោតអារម្មណ៍ទាំងស្រុងតែលើខ្សែប្រយុទ្ធប្រកបដោយភាពគ្រោះថ្នាក់ Christian Eriksen ឡើយ នៅពេលដែលពួកគេត្រូវប៉ះជាមួយនឹងក្រុមជម្រើសជាតិដាណឺម៉ាក ខណៈពួកគេនឹងសម្លឹងរកជ័យជម្នះដែលអាចនឹងសង្គ្រោះយុទ្ធនាការរបស់ពួកគេក្នុង World Cup។ ការរងបរាជ័យទាំងប្រផិតប្រផើយក្នុងលទ្ធផល ២-១ ក្រោមស្នាដៃក្រុមជម្រើសជាតិបារាំង ក្នុងការប្រកួតបើកឆាកនៃពូល C បានបង្ខំឲ្យក្រុមមានរហស្សនាមថា Socceroos មួយនេះ ត្រូវការឈ្នះជាដាច់ខាតនៅរាត្រីនេះ ខណៈដែលពួកគេសម្លឹងរកការឆ្លងផុតពីវគ្គចែកពូល។
ខ្សែបម្រើប្រយុទ្ធដ៏មានឥទ្ធិពល Eriksen របស់ក្លិប Tottenham Hotspur ដែលរកបាន ១១ គ្រាប់សម្រាប់ដាណឺម៉ាក ក្នុងការប្រកួតជម្រុះនោះ គឺជាកីឡាករដ៏គ្រោះថ្នាក់សម្រាប់ក្រុមរបស់លោក Age Hareide នាកីឡដ្ឋាន Samara Arena។
ប៉ុន្តែ Jedinak ដែលបានស៊ុតបាល់ប៉េណាល់ទី ១ គ្រាប់នៅពេលប្រកួតជាមួយនឹងក្រុមបារាំងនោះ បានបញ្ជាក់ថា ការធ្វើឲ្យល្អប្រសើរឡើងទៅលើទម្រង់លេង ក៏ជាគន្លឹះដ៏សំខាន់សម្រាប់អូស្ត្រាលីផងដែរ៕
