ក្រុងអាប៊ូដាប៊ី: ក្រុមម្ចាស់ផ្ទះអេមីរ៉ាតអារ៉ាប់រួម បានបញ្ចប់ដំណើរផ្សងព្រេងរបស់ក្រុមបាល់ទាត់ជម្រើសជាតិគៀហ្ស៊ីគីស្ថានជាមួយនឹងគ្រាប់បាល់ប៉េណាល់ទីនៅនាទីបន្ថែម ១៥ នាទី ២ ដងដ៏ចម្រូងចម្រាស ដើម្បីឈានទៅវគ្គ ៨ ក្រុមចុងក្រោយនៃព្រឹត្តិការណ៍ Asian Cup កាលពីថ្ងៃចន្ទ ខណៈដែលក្រុមម្ចាស់ការពារតំណែងជើងឯកអូស្ត្រាលី និងជប៉ុនក៏បានឈានទៅវគ្គបន្តផងដែរ។
អ្នកចាំទី Mathew Ryan បានសង្គ្រោះបាល់ប៉េណាល់ទី ២ គ្រាប់ ខណៈដែលក្រុមជម្រើសជាតិអូស្ត្រាលីបានផ្តួលក្រុមចចកសរបស់អ៊ូសបេគីស្ថានដោយការស៊ុតបាល់ប៉េណាល់ទីកាត់សេចក្តីស្របពេលក្រុមជម្រើសជាតិជប៉ុនបានទម្លាក់ក្រុមអារ៉ាប៊ីសាអ៊ូឌីត។
កីឡាករបម្រុង Ahmed Khalil បានក្លាយជាវីរបុរសរបស់ក្រុមជម្រើសជាតិអេមីរ៉ាតអារ៉ាប់រួមនៅរាត្រីដ៏រំភើបក្នុងទីក្រុង Abu Dhabi នៅពេលរូបគេបានស៊ុតបាល់បំប៉ោងសំណាញ់ពីចំណុចពិន័យ ១១ ម៉ែត្រនៅជិតបញ្ចប់ការប្រកួត ដើម្បីជួយឲ្យក្រុមខ្លួនយកឈ្នះ ៣-២ ក្រោយពីការកាត់សេចក្តីរបស់អាជ្ញាកណ្តាលបានរងនូវការរិះគន់។
លោក Aleksandr Krestinin គ្រូបង្វឹកនៃក្រុមជម្រើសជាតិគៀហ្ស៊ីគីស្ថានបានឲ្យដឹងថា៖ «ខ្ញុំមិននិយាយពីអាជ្ញាកណ្តាលឡើយ។ យើងចាកចេញពីយុទ្ធនាការនេះជាមួយនឹងការសោកស្តាយជាច្រើន ព្រោះយើងពិតជាស័ក្តិសមក្នុងការទទួលបានលទ្ធផលល្អជាងនេះ»។ គ្រូបង្វឹករូបនេះបានបន្ថែមទៀតថា៖ «វាជាការប្រកួតក្នុង Asian Cup ជាលើកទី ១ របស់យើង ប៉ុន្តែខ្ញុំពិតជាប្រាកដក្នុងចិត្តថា វានឹងមិនមែនជាការបង្ហាញខ្លួនជាលើកចុងក្រោយរបស់យើងឡើយ ហើយយើងនឹងវិលត្រឡប់កាន់តែខ្លាំងជាងមុន»។
ស្របពេលជាមួយគ្នានេះអ្នកចាំទី Ryan បានសង្គ្រោះក្រុមជម្រើសជាតិអូស្ត្រាលីជាមួយនឹងការបង្ហាញពីទម្រង់លេងយ៉ាងល្អរបស់គេ ដើម្បីរារាំងការស៊ុតបាល់របស់កីឡាករនៃក្រុមអ៊ូសបេគីស្ថាន ក្រោយពីបានបញ្ចប់ក្នុងលទ្ធផលស្មើ ០-០។ អ្នកចាំទីរបស់ក្លិប Brighton រូបនេះបានសង្គ្រោះបាល់ពីការស៊ុតរបស់កីឡាករ Islom Tukhtakhujaev និង Marat Bikmaev នៅមុនពេល Mathew Leckie បានស៊ុតបាល់កាត់សេចក្តី ដើម្បីជួយឲ្យអូស្ត្រាលី ឈានទៅជួបអេមីរ៉ាតអារ៉ាប់រួមនៅវគ្គបន្ត។
ក្រុមម្ចាស់ជើងឯក ៤ សម័យកាលជប៉ុនបានយកឈ្នះលើក្រុមជម្រើសជាតិអារ៉ាប៊ីសាអ៊ូឌីត ១-០ តាមរយៈការគ្រាប់បាល់នៅតង់ទី ១ របស់កីឡាករ Takehiro Tomiyasu ដើម្បីទៅជួបវៀតណាមក្នុងវគ្គ ៨ ក្រុមចុងក្រោយ។
ជ័យជម្នះរបស់ជប៉ុនលើក្រុមម្ចាស់ជើងឯក ៣ សម័យកាលអារ៉ាប៊ីសាអ៊ូឌីត ក្នុងទីក្រុង Sharjah បានកើតឡើង បើទោះបីក្រុមអារ៉ាប៊ីសាអ៊ូឌីតបានគ្រប់គ្រងបាល់ដល់ទៅ ៧៧ ភាគរយក៏ដោយ។ ប្រធានក្រុមនៃក្រុមជប៉ុន Maya Yoshida បានឲ្យដឹងថា៖ «កីឡាបាល់ទាត់អាស៊ីកាន់តែមានការប្រកួតប្រជែងខ្លាំងឡើង»។ ក្រោយពីការធ្លាក់ចេញដ៏ខកចិត្តពី Asian Cup លោក Juan Antonio Pizzi បានលាលែងពីតំណែងក្នុងនាមជាគ្រូបង្វឹកនៃក្រុមអារ៉ាប៊ីសាអ៊ូឌីត៕ IS