ក្រុងកាហ្សាន់: ខ្សែបម្រើអន្តរជាតិអេស្ប៉ាញដ៏មានឥទ្ធិពល Isco បានបញ្ជាក់ថា ការប្រកួតជាមួយក្រុមបាល់ទាត់ជម្រើសជាតិអ៊ីរ៉ង់ នៅរាត្រីនេះ នឹងកាត់សេចក្តីជោគវាសនារបស់ពួកគេក្នុងយុទ្ធនាការ World Cup ខណៈដែលពួកគេសម្លឹងរកការកត់ត្រាជ័យជម្នះជាលើកទី ១ របស់ពួកគេ ក្នុងប្រទេសរុស្ស៊ី ក្រោយពីបានបញ្ចប់ក្នុងលទ្ធផលស្មើ ៣-៣ ជាមួយនឹងក្រុមជម្រើសជាតិព័រទុយហ្គាល់។
ក្នុងនាមជាក្រុមម្ចាស់ជើងឯកពិភពលោកឆ្នាំ ២០១០ និងជាក្រុមខ្លាំងប្រចាំយុទ្ធនាការឆ្នាំនេះ មហិច្ឆតា World Cup របស់អេស្ប៉ាញ បានស្ថិតក្នុងភាពមិនច្បាស់ ដោយសារតែការរកបានគ្រាប់បាល់ ៣ គ្រាប់របស់ Cristiano Ronaldo។
លទ្ធផលនេះបានកើតឡើងត្រឹមតែ ២ ថ្ងៃ ក្រោយពីយុទ្ធនាការរបស់អេស្ប៉ាញ ត្រូវបានធ្វើឲ្យស្ថិតក្នុងភាពជ្រួលច្របល់ ដោយការបណ្តេញលោក Julen Lopetegui ចេញដ៏មិននឹកស្មានដល់ ក្រោយពីការប្រកាសពីសំណាក់ក្លិប Real Madrid ថា លោកនឹងចូលរួមជាមួយនឹងក្រុមម្ចាស់ជើងឯកក្របខ័ណ្ឌអឺរ៉ុប ១៣ សម័យកាលមួយនេះ បន្ទាប់ពី World Cup។
លោក Fernando Hierro ប្រធានផ្នែកកីឡារបស់អេស្ប៉ាញ បច្ចុប្បន្នគឺជាអ្នកដឹកនាំក្រុម ប៉ុន្តែ ក្នុងរយៈពេល ១ សប្តាហ៍នៃយុទ្ធនាការនេះ អេស្ប៉ាញ ដែលត្រូវបានរំពឹងទុកថា នឹងចូលរួមជាមួយប្រេស៊ីល អាល្លឺម៉ង់ និងបារាំង ក្នុងវគ្គបន្តនោះ បានជួបរឿងសោកសៅច្រើនជាងអ្វីដែលពួកគេចង់បាន ឬរំពឹងទុក។
ខ្សែបម្រើ Isco បានឲ្យដឹងថា៖ «វាជាការប្រកួតដ៏សំខាន់មួយដែលនឹងកំណត់ជោគវាសនាក្នុង World Cup របស់យើង។ យើងចង់រកគ្រាប់បាល់ចាប់តាំងពីនាទីបើកឆាក សូម្បីតែនោះមិនមែនជារឿងងាយស្រួលក៏ដោយ»។
អ៊ីរ៉ង់ បានចាប់ផ្តើមយុទ្ធនាការរបស់ខ្លួនតាមរយៈការយកឈ្នះ ១-០ លើក្រុមម៉ារ៉ុក៕
កម្មវិធីប្រកួតរាត្រីនេះ
ព័រទុយហ្គាល់ v ម៉ារ៉ុក-7 យប់
អ៊ុយរូហ្គាយ v អារ៉ាប៊ីសាអ៊ូឌីត-10 យប់
អ៊ីរ៉ង់ v អេស្ប៉ាញ -1 អាធ្រាត្រ