.jpg)
លាភ រដ្ឋា បានទាត់ទៅលើកីឡាករ Phat Trey មុនពេលប្រកាសឲ្យចាញ់ពិន្ទុថៃម្នាក់នេះ ដោយមិនអស់ចិត្ត។ រូប ពន្លក
ភ្នំពេញ៖ កីឡាករលំដាប់ជួរមុខ និងមានប្រជាប្រិយភាពរបស់កម្ពុជា រួមមាន លាភ រដ្ឋា, ជា សំនៀង, ពុយ វណ្ណៈ និង ប៊ុន គន្ធា (ប៊ុន សុធា) សុទ្ធតែមិនអាចដណ្តើមយកជ័យជម្នះបាននៅលើសង្វៀនអាស៊ីអាគ្នេយ៍ កាលពីល្ងាចថ្ងៃសៅរ៍ និងព្រឹកថ្ងៃអាទិត្យ ប៉ុន្តែកីឡាករទម្ងន់ធ្ងន់ អ៊ុង វិរៈ បានស្តារមុខមាត់ ដោយផ្តួលកីឡាករច្រមុះស្រួច Saber មកពីអ៊ីរ៉ង់ ត្រឹមទឹកទី ៣ ក្នុងទម្ងន់ ៨៧ គីឡូក្រាម។
សម្រាប់ការប្រកួតនៅយប់ថ្ងៃសៅរ៍ លាភ រដ្ឋា បានចាញ់ស្នៀតទាត់របស់កីឡាករថៃ Phat Trey ខណៈដែលស្នៀតពិឃាតកណ្តាប់ដៃរបស់គេ វាយចូលមិនដល់គោដៅល្អ។ នៅក្នុងជំនួបប្រកួតចំនួន ៥ ទឹកពេញ លាភ រដ្ឋា ចូលវាយសម្រុកគ្មានដកថយ ប៉ុន្តែវាយមិនចូលគោលដៅល្អ និងបានទទួលរងនូវស្នៀតទាត់របស់ថៃ Phat Trey ដែលវាយតាមរបៀបថយៗស្រង់យកបច្ចេកទេសបានល្អ សឹងតែមានពិន្ទុដាច់ ៥ ទឹក។ លទ្ធផលប្រកួតពីសំណាក់ចៅក្រមទាំង ៥ ផ្តល់ឲ្យកីឡាករ លាភ រដ្ឋា ចាញ់ថៃ Phat Trey ៥ ទល់ ០។
លាភ រដ្ឋា បាននិយាយក្រោយការប្រកួតថា៖ «លំបាកវ៉ៃ ពីព្រោះកីឡាករថៃ វ៉ៃរត់ពេក ខ្ញុំវ៉ៃមិនសូវត្រូវ។ ខ្ញុំចាញ់ស្នៀតទាត់តែម្តង ព្រោះចូលមិនចុះ ហើយកីឡាករថៃនេះ វ៉ៃរត់ពេក មិនហ៊ានតទល់ជាមួយខ្ញុំសោះ គឺខ្ញុំចាញ់មិនអស់ចិត្តឡើយ»។
ជាមួយគ្នានេះ ផាន់ គ្រាន់ ដែលត្រៀមប្រកួតជាមួយអ្នកចំណូលថ្មីរបស់ថៃ Yorth Moeung ក្នុងទម្ងន់ ៦៥ គីឡូក្រាមនោះ ត្រូវបានគណៈកម្មការផ្អាកមិនឲ្យចូលប្រកួត ដោយសារ ផាន់ គ្រាន់ បញ្ចុះទម្ងន់មកត្រឹមការកំណត់មិនបាន។ ជា សំនៀង ត្រូវបានដាក់ឲ្យប្រកួតជំនួស ផាន់ គ្រាន់ ប៉ុន្តែរូបគេ តស៊ូបានត្រឹម ២ ទឹកប៉ុណ្ណោះ ក៏ត្រូវបាន Yorth Moeung វ៉ៃឲ្យសន្លប់ គឺ សំនៀង ចាញ់គ្រប់ស្នៀត រួមទាំងកម្លាំងផងដែរ។
សម្រាប់ការប្រកួតកម្មវិធី Boostrong កាលពីព្រឹកថ្ងៃអាទិត្យវិញ គឺមានតែ អ៊ុង វិរៈ ម្នាក់គត់ ដែលបានឈ្នះ ដោយរូបគេបានផ្តួលអ៊ីរ៉ង់ Saber ឲ្យចុះចាញ់ត្រឹមទឹកទី ៣ បន្ទាប់ពីអាជ្ញាកណ្តាលរាប់ចំនួន ៣ លើករួចមក។ ជ័យជម្នះរបស់ វិរៈ ត្រូវបានគេមើលឃើញថា កីឡាករអ៊ីរ៉ង់មានសមត្ថភាពចាញ់ប្រៀបពេក។
ចំណែកកីឡាករ ពុយ វណ្ណៈ ដែលព្យាយាមវាយសម្រុកខ្លាំងចំនួន ៥ ទឹកពេញនោះ នៅតែទទួលលទ្ធផលចាញ់កីឡាករខ្លាំងជំនាញទាត់របស់ថៃ Van Chaleum ដោយពិន្ទុ។ ពុយ វណ្ណៈ ចាញ់ប្រៀបថៃចំនួន ៣ ទឹកដំបូងដាច់ ប៉ុន្តែនៅចុងទឹកទី ៤ និងទី ៥ វណ្ណៈ ប្រឹងប្រែងបានល្អវិញដោយសម្រុកមិនឈប់ ប៉ុន្តែនៅតែគេចមិនផុតពីការចាញ់។ ចំណែកកីឡាករ ប៊ុន គន្ធា ម្ចាស់ខ្សែក្រវាត់ ២ ស្ថាប័ន និងទើបតែជាប់ជម្រើសជាតិ ក្នុងឆ្នាំ ២០២០ នេះ បានប្រឹងអស់ពីសមត្ថភាពក្នុងការប្រកួតជាមួយថៃ KamLay Phith ប៉ុន្តែទទួលបានត្រឹមលទ្ធផលស្មើគ្នា។
លោក ញាន សុធី ប្រធានគ្រប់គ្រងកម្មវិធីប្រចាំសង្វៀន SEATV បាននិយាយថា៖ «សប្តាហ៍នេះកីឡាករលំដាប់ខ្លាំងរបស់កម្ពុជាចំនួន ៥ គូ រកឃើញជ័យជម្នះបានតែ ១ គូ គឺ អ៊ុង វិរៈ ប៉ុណ្ណោះ។ ការផ្គូផ្គងធ្វើទៅតាមបច្ចេកទេស និងបទពិសោធប្រកួតរបស់កីឡាករ ប៉ុន្តែលទ្ធផលយ៉ាងណា យើងមិនអាចប៉ាន់ស្មានបានថានោះឡើយ ហើយការឈ្នះ ១ ស្មើ ១ និងចាញ់ ៣ គូនេះជាលទ្ធផលប្រកួតជាក់ស្តែង ដោយសង្វៀនយើងមិនបានរៀបចំជ័យជម្នះទុកជាមុននោះទេ គឺចាញ់ឈ្នះតាមសមត្ថភាព គ្មានយឹតយោងឡើយ»៕
