.jpg)
ខ្សែប្រយុទ្ធអន្តរជាតិអ៊ុុយរូហ្គាយ Luis Suarez (ស្តាំ) ស៊ុតបាល់ពីក្រោយខ្សែបម្រើអន្តរជាតិអារ៉ាប៊ីសាអ៊ូឌីត Salman Al-Faraj។ AFP
ក្រុងម៉ូស្គូ: ក្រុមបាល់ទាត់ជម្រើសជាតិអ៊ុយរូហ្គាយ និងក្រុមម្ចាស់ផ្ទះរុស្ស៊ី បានឈានទៅវគ្គ១៦ក្រុមចុងក្រោយនៃព្រឹត្តិការណ៍ World Cup កាលពីថ្ងៃពុធ ខណៈដែល Cristiano Ronaldo បានដណ្តើមការនាំមុខដើម្បីប្រជែងដណ្តើមយកស្បែកជើងមាស។
ការស៊ុតបាល់បញ្ចូលទីតែ១គ្រាប់ពីសំណាក់ Luis Suarez គ្រប់គ្រាន់ក្នុងការជួយឲ្យក្រុមជម្រើសជាតិអ៊ុយរូហ្គាយ យកឈ្នះលើក្រុមជម្រើសជាតិអារ៉ាប៊ីសាអ៊ូឌីត ដើម្បីធ្វើឲ្យពួកគេមាន៦ពិន្ទុស្មើជាមួយនឹងក្រុមជម្រើសជាតិរុស្ស៊ី និងទម្លាក់ក្រុមជម្រើសជាតិអេហ្ស៊ីប និងអារ៉ាប៊ីសាអ៊ូឌីត ឲ្យធ្លាក់ចេញពីយុទ្ធនាការនេះ។
ក្នុងការប្រកួត១គូមុននេះ ក្នុងពូល B Ronaldo រកបានគ្រាប់បាល់ទី៤របស់គេក្នុងយុទ្ធនាការនេះ ក្នុងពេលក្រុមជម្រើសជាតិព័រទុយហ្គាល់ ទទួលជ័យជម្នះ ១-០ លើក្រុមជម្រើសជាតិម៉ារ៉ុក ដើម្បីបញ្ចប់ឱកាសរបស់ក្រុមអាហ្វ្រិកខាងជើងមួយនេះ ក្នុងការឈានទៅវគ្គបន្ត។
ខ្សែប្រយុទ្ធអន្តរជាតិព័រទុយហ្គាល់ Cristiano Ronaldo តែតបាល់ ក្នុងពេលប្រកួតជាមួយនឹងក្រុមជម្រើសជាតិម៉ារ៉ុក។ AFP
កីឡាករឆ្នើមប្រចាំឆ្នាំរបស់ពិភពលោក៥សម័យកាលរូបនេះ រកបានគ្រាប់បាល់ជាមួយនឹងការតែតបាល់បញ្ចូលទីយ៉ាងល្អនៅដើមតង់ ដើម្បីបន្ថែមទៅលើគ្រាប់បាល់៣គ្រាប់របស់គេសម្រាប់ក្រុមព័រទុយហ្គាល់ នៅពេលប្រកួតជាមួយនឹងក្រុមជម្រើសជាតិអេស្ប៉ាញ ក្នុងការប្រកួតបើកឆាករបស់ពួកគេ។
ក្នុងការប្រកួតពូល B ១គូទៀត អេស្ប៉ាញ បានត្រូវការគ្រាប់បាល់នាំសំណាងរបស់ Diego Costa ដើម្បីផ្តួលក្រុមជម្រើសជាតិអ៊ីរ៉ង់ ដែលរកបានគ្រាប់បាល់១គ្រាប់ក្នុងតង់ទី២ដោយកីឡាករ Saeid Ezatolahi តែមិនត្រូវបានយកជាផ្លូវការដោយសារតែ Offside ក្នុងទីក្រុង Kazan។
ព័រទុយហ្គាល់ និងអេស្ប៉ាញ សុទ្ធសឹងមាន៤ពិន្ទុដូចគ្នា ហើយនិងត្រូវប្រជែងដណ្តើមយកលេខ១ ក្នុងពូល នៅពេលដែលពួកគេបំពេញការប្រកួតជុំទី១របស់ពួកគេនៅពេលប៉ះអ៊ីរ៉ង់ និងម៉ារ៉ុក រៀងៗខ្លួននៅថ្ងៃចន្ទ សប្តាហ៍ក្រោយ៕ IS
ខ្សែប្រយុទ្ធអេស្ប៉ាញ Diego Costa (កណ្តាល) ត្រូវបានរារាំងដោយខ្សែការពារអ៊ីរ៉ង់ Morteza Pouraliganji (ឆ្វេង) និង Ramin Rezaian។ AFP
