ប៊ែរឡាំង៖ អ្នកគាំទ្រក្រុម Bayern Munich ប្រមាណ ៨០០ នាក់ បានប្រគល់ឱ្យវិញនូវសំបុត្រការប្រកួតកម្មវិធី UEFA Super Cup នៅថ្ងៃព្រហស្បតិ៍នេះ នាប្រទេសហុងគ្រី ចំពេលមានការបារម្ភថា ការប្រកួតនេះ អាចក្លាយជាព្រឹត្តិការណ៍ចម្លងវីរុសដ៏ធំ។
ទីក្រុងប៊ុយដាប៉ែស នឹងធ្វើជាម្ចាស់ផ្ទះនៃការជួបគ្នារវាងក្រុម ដែលឈ្នះជើងឯកក្របខ័ណ្ឌ Champions League គឺក្រុមនៅអាល្លឺម៉ង់ Bayern Munich និងម្ចាស់ពានរង្វាន់ Europa League គឺក្រុម Sevilla របស់អេស្ប៉ាញ ទោះការប្រកួតនេះកំពុងប្រឈមនឹងការរិះគន់ខ្លាំងឡើងៗក៏ដោយ។
អាល្លឺម៉ង់ប្រកាសថា ក្រុងប៊ុយដាប៉ែស ជាតំបន់ដ៏មានហានិភ័យ បន្ទាប់ពីមានការឆ្លងឡើងដល់កម្រិតខ្ពស់បំផុត ដោយមានដល់ ៥០ ករណី ក្នុងចំណោមមនុស្ស ១០ ម៉ឺននាក់។
លោក Markus Soeder នាយករដ្ឋមន្ត្រីរដ្ឋបារ៉ាវៀ (Bavaria) ថ្លែងថា៖ «គ្រប់គ្នាគួរតែគិតឡើងវិញ មុនទៅទីនោះ។ អ្នកគាំទ្រក្រុម Bayern ដែលត្រឡប់ពីប៊ុយដាប៉ែសវិញ ត្រូវប្រឈមទាំងការធ្វើតេស្ត ឬក៏ដាក់ឱ្យនៅដោយឡែក»។
ជាគម្រោងសាកល្បងក្នុងការឱ្យអ្នកគាំទ្រមានក្នុងកីឡដ្ឋានវិញ ក្រុម Bayern និង Sevilla ត្រូវបានអនុញ្ញាតឱ្យលក់សំបុត្រ ៣ ០០០ កៅអី សម្រាប់ប្រកួតនេះ។ សហព័ន្ធបាល់ទាត់អឺរ៉ុប (UEFA) រំពឹងថា អ្នកគាំទ្ររបស់ Sevilla ចំនួន ៥០០ នាក់ និងរបស់ Bayern ១ ៣០០ នាក់ នឹងមានវត្តមាននៅឯកីឡដ្ឋាន Puskas Arena។
ដំបូងឡើយអ្នកគាំទ្ររបស់ Bayern ស្នើទិញសំបុត្រចំនួន ២ ១០០ កន្លែង តែចំនួន ៨០០ ត្រូវបានឱ្យត្រឡប់វិញ កាលពីថ្ងៃចន្ទ។ នេះបើតាមសេចក្ដីរាយការណ៍ពីដៃគូព័ត៌មានរបស់ AFP គឺ SID និងកាសែតនៅអាល្លឺម៉ង់ Bild។
កាសែត Bild លើកជាសំណួរថា៖ «តើការប្រកួត Super Cup អាចនឹងក្លាយជា Super Spreader Cup (ពានចម្លងជំងឺដ៏ធំ) ដែរឬទេ?»។
UEFA ប្រាប់ SID ថា ការប្រកួត Super Cup នឹងដំណើរការធម្មតា៕ AFP/VN