.jpg)
កាំភ្លើងដែលសន្មតថា វិចិត្រករហូឡង់ប្រើបាញ់សម្លាប់ខ្លួនក្នុងឆ្នាំ ១៨៩០។ រូបថត AFP
ក្រុងប៉ារីស: កាំភ្លើងខ្លីរបស់ជាងគំនូរហូឡង់ វីនសេន វ៉ាន់ ហ្គូក ដែលត្រូវបានគេជឿថាលោកបានប្រើបាញ់សម្លាប់ខ្លួនលក់ក្នុងតម្លៃ ១៨២ ០០០ ដុល្លារ នៅពិធីដេញថ្លៃមួយក្នុងទីក្រុងប៉ារីសកាលពីថ្ងៃពុធលើសពីតម្លៃប៉ាន់ប្រមាណជិត ៣ ដង។
ដោយត្រូវបានចាត់ទុកជា «អាវុធល្បីបំផុតក្នុងប្រវត្ដិសិល្បៈ» កាំភ្លើងខ្លី Lefaucheux ប្រវែង ៧៧ មិលី្លម៉ែត្រដ៏ច្រែះចាប់ ១ ដើមនេះត្រូវបានទិញដោយអ្នកប្រមូលវត្ថុចាស់ៗម្នាក់ជាមួយការដេញថ្លៃតាមទូរស័ព្ទ។
ជាងគំនូរហូឡង់ដែលជួបវិបតិ្ដរូបនោះបានស្លាប់កាលពីខែកក្កដា ឆ្នាំ ១៨៩០ ហើយក្រុមអ្នកជំនាញជឿថាលោកបានពិឃាតខ្លួនឯងដោយប្រើកាំភ្លើងនេះក្នុងវាលស្រែមួយក្បែរភូមិ Auvers-sur-Oise ភាគខាងជើងក្រុងប៉ារីសជាទីដែលលោកចំណាយពេលប៉ុន្មានខែចុងក្រោយនៃជីវិត។
ប្រទះឃើញដោយកសិករម្នាក់ក្នុងឆ្នាំ ១៩៦៥ នៅលើវាលស្រែដដែលនោះ កាំភ្លើងខ្លីនេះធ្លាប់ត្រូវបានដាក់តាំងពិព័រណ៍នៅសារមន្ទីរ វ៉ាន់ ហ្គូក ក្នុងទីក្រុងអាំស្ទែរដាំ។
ប៉ុន្ដែការលក់ជួបនូវបញ្ហាចម្រូងចម្រាសនៅមុនពិធីដេញថ្លៃមួយថ្ងៃ ខណៈវិទ្យាស្ថាន វ៉ាន់ ហ្គូក បានថ្កោលទោសចំពោះការលក់ដូរនេះ។
វិទ្យាស្ថានថា៖ «គ្មានអ្វីបញ្ជាក់ថា ខ្មោចកាំភ្លើងខ្លីនោះមានជាប់ទាក់ទងនឹងមរណភាពលោក វ៉ាន់ ហ្គូក ទេ។ កុំធ្វើពាណិជ្ជកម្មលើសពដែលគួរតែទទួលបានការគោរព»។
លោក វ៉ាន់ ហ្គូក បានបង្ហាញស្នាដៃឆ្នើម «គំនូរវេជ្ជបណ្ឌិត ហ្គាឆេត» ដែលលក់ក្នុងតម្លៃ ៨២, ៥ លានដុល្លារក្នុងឆ្នាំ ១៩៩០៕ HR
