.jpg)
Miracle បង្កើតឡើងដោយលោក ខៀវ លីនដា និង កញ្ញា ម៉េង សូហួង។ ហុង មិនា
ភ្នំពេញ: ស្ថិតនៅក្នុងហាងក្រោយវិទ្យាស្ថានវ៉ាន់ដា បុរស-នារីកំពុងតែផ្ចិតផ្ចង់កាន់ដង្កៀបកៀបគ្រាប់អង្កាំបន្តុបលើដើមផ្កាស្ងួត អមខ្សែអំពូលភ្លើងតូចៗចាំងបំភ្លឺកែវ ដែលស្រោបតុក្កតាមានទម្រង់មុខដូចនឹងម្ចាស់វត្ថុអនុស្សាវរីយ៍នេះ។
ជាជាងការនាំចូលតុក្កតាពីបរទេសហាង Miracle បានបង្កើតភាពលេចធ្លោតាមរយៈស្នាដៃសូនធ្វើតុក្កតាទៅតាមទម្រង់មុខមនុស្ស ហើយលម្អក្នុងកែវយ៉ាងច្នៃប្រឌិតដោយដៃផ្ទាល់ ដើម្បីឲ្យភ្ញៀវទទួលបានវត្ថុពោរពេញដោយអត្ថន័យ។
សហស្ថាបនិក Miracle លោក ខៀវ លីនដា វ័យ ៣១ ឆ្នាំដែលបានបញ្ចប់ការសិក្សា ២ ជំនាញទាំងភាសាអង់គ្លេស និងបច្ចេកវិទ្យាវិស្វកម្ម មានបំណងចង់បង្កើតមុខរបរអំពីវត្ថុសិល្បៈ ដែលជាចំណូលចិត្តរបស់លោកស្រាប់។
ផ្ដើមពីជំនួញហាងផ្កាស្រាប់លោកបាននិយាយថា៖ «យើងព្យាយាមរកអ្វីដែលយើងអាចធ្វើទៅហើយ អាចបង្ហាញពីអ្វីដែលយើងចង់បាននេះ។ ម្យ៉ាងវិញទៀតរបស់នៅស្រុកខ្មែររបស់យើងភាគច្រើននាំចូលហើយលក់តែម្តង វាអត់សូវមានអ្នកណាដែលយកមកហើយកែច្នៃបន្ថែមឲ្យមានអត្ថន័យបន្ថែមអីបែបហ្នឹង»។
លោក និងដៃគូជំនួញធ្លាប់បានឃើញតុក្កតារចនាតាមទម្រង់មុខមនុស្សតាមអ៊ីនធឺណិតទាក់ទង ហើយក៏ចាប់អារម្មណ៍ស្រាវជ្រាវបន្ត។
លោក ខៀវ លីនដា បានប្រាប់ ភ្នំពេញ ប៉ុស្តិ៍ ថា៖ «តាមពិតវាមានតាំងពីឆ្នាំ ១៩៩៣ នៅអង់គ្លេស ប៉ុន្តែគ្រាន់តែថាពីដំបូងៗគេអត់ទាន់សូនរូបពីក្បាលដល់ចុងជើងទៅតាមរូបភាពរបស់ភ្ញៀវទេ គ្រាន់តែថាធ្វើមួយកំណាត់ វាមានស្រាប់ៗ ធ្វើតែក្បាលរហូតគេ Update ឃើញនៅក្នុងអ៊ីនធឺណិតធ្វើពីក្បាលដល់ចុងជើង»។
ដោយគិតថា ការធ្វើតុក្កតាតំណាងរូបមនុស្សពិតម្យ៉ាងដូចជាមិនគ្រប់គ្រាន់ ទើបលោកបន្ថែមការតុបតែងជាផ្កា កូនសត្វ អង្កាំ និងគ្រឿងលម្អដទៃទៀតដ៏ទាក់ទាញ។
កែវធំអាចផ្ទុកតុក្កតាបានពី ៥ ទៅ ៧ តុក្កតាអមជាមួយការតុបតែងលម្អយ៉ាងប្រណីត។ ហុង មិនា
ដើម្បីធ្វើតុក្កតាឲ្យមានមុខមាត់ សម្លៀកបំពាក់ ទម្រង់រាងរៅមនុស្សតាមការកុម្ម៉ង់នោះស្ថាបនិកហាង Miracle បានទៅសិក្សានៅប្រទេសចិន រយៈពេលជិត ១ ឆ្នាំមុនដំណើរការលក់នៅក្នុងស្រុក។
លោក ខៀវ លីនដា ក៏បានប្រាប់បន្ថែមពីចំណុចពិសេសរបស់ Miracle ទៀតថា៖ «Miracle ផ្តោតសំខាន់ទៅលើគុណភាពនៃផលិតផលមានភាពស្រស់ស្អាត ជាពិសេសនោះគឺការឌីហ្សាញរបស់យើងខុសគ្នាទាំងអស់ពីអតិថិជនម្នាក់ទៅអតិថិជនម្នាក់ទៀត មិនមានម៉ូដដូចគ្នានោះទេ»។
លោកក៏តែងណែនាំភ្ញៀវដែលស្រឡាញ់ម៉ូដដូចៗគ្នា ថាគួរតែធ្វើការផ្លាស់ប្ដូរឲ្យប្លែកពីគេ និងស័ក្ដិសមខ្លួនឯង។
លោកបញ្ជាក់ប្រាប់ថា៖ «នៅពេលដែលអតិថិជនបានទទួលកាដូពីខាងយើងនឹងមានអារម្មណ៍ថា កាដូគាត់គឺមានតែមួយនៅលើលោកផងដែរ»។
តុក្កតាសូនដោយដៃត្រូវបានកំណត់តម្លៃ ១ ថ្លៃ ៥០ ដុល្លារ និងគិតពីតម្លៃកែវ សម្រាប់តុបតែងផ្កាអមតៈ។
កែវដាក់តាំងលម្អមាន ៣ ខ្នាតគឺខ្នាតតូចដាក់បានតុក្កតា ១ ឬ ២ តុក្កតាខ្នាតកណ្តាលសម្រាប់ ២ ទៅ ៣ តុក្កតា (ឬបន្ថែមតុក្កតាកូនក្មេងតូច) និងខ្នាតធំបំផុតអាចដាក់បានចាប់ពី ៥ ទៅ ៧ តុក្កតាដែលអាចមានរហូតដល់ ៧០០ ទៅ ៨០០ ដុល្លារគិតទៅតាមចំនួនតុក្កតា និងទំហំកែវ។
បុគ្គលិកប្រើដង្កៀបភ្ជាប់ផ្កា និងអង្កាំ ដើម្បីតុបតែងតុក្កតាទម្រង់មុខមនុស្ស យ៉ាងផ្ចិតផ្ចង់។ ហុង មិនា
អតិថិជនដែលឲ្យតម្លៃវត្ថុសិល្បៈធ្វើដោយដៃហាក់មិនសាញនឹងការចំណាយនោះទេ ហើយ Miracle ទទួលបានការគាំទ្រទាំងក្នុង និងនៅក្រៅប្រទេសដូចជានៅ អូស្ត្រាលី ថៃ ជប៉ុន អាមេរិក និងសិង្ហបុរី រួមទាំង តារាសិល្បៈ ឬគ្រួសារអភិជនផងដែរ។
ដំណើរការក្នុងការរចនាតុបតែងត្រូវបានសហស្ថានិក ហាង Miracle កញ្ញា ម៉េង សូហួង រៀបរាប់ឲ្យដឹងថា៖ «យើងប្រើរយៈពេលយូរថ្ងៃរហូតដល់ ២៥ ទៅ ៣០ ថ្ងៃសម្រាប់ធ្វើ ដោយសារយើងធ្វើដោយដៃទាំងអស់សូម្បីតែការឆ្លាក់រូបតុក្កតា យើងប្រើរយៈពេលនៃការរចនាម៉ូដហ្នឹងយូរ សម្ភារៈដែលប្រើប្រាស់សុទ្ធតែថ្លៃ និងមានគុណភាព»។
ម្ចាស់ហាងវ័យ ២៩ ឆ្នាំ បានលើកឡើងថា៖ «ភ្ញៀវអាចរក្សាទុកបានរហូត ចំពោះតុក្កតា។ រីឯផ្កាដែលបានដេគ័រអាចនឹងហើរពណ៌ខ្លះ ហើយយើងក៏ប្រាកដចិត្តថា កាដូដែលត្រូវបានដល់ដៃភ្ញៀវ ត្រូវតែធ្វើឲ្យភ្ញៀវពេញចិត្ត ព្រោះយើងនឹងផ្លាស់ប្តូរកែច្នៃរហូតដល់ភ្ញៀវនិយាយថា ត្រូវចិត្ត»។
សម្ភារៈតុបតែងត្រូវបាននាំចូលមកពីប្រទេសកេនយ៉ា ហូឡង់ និងប្រទេសចិន ហើយក្នុង ១ ថ្ងៃ Miracle ទទួលបានការកុម្ម៉ង់ពីភ្ញៀវប្រមាណចាប់ពី ៥ នាក់ឡើងទៅ។
សម្រាប់អតិថិជននៅក្រៅប្រទេសការដឹកជញ្ជូននៅតែជាឧបសគ្គ ដោយសារតែតុក្កតា និងកែវប្រឈមនឹងបែកដោយប៉ះទង្គិចនានា។ ដូច្នេះហើយសព្វថ្ងៃម្ចាស់ហាងបានសំណូមពរឲ្យអតិថិជនមកទទួលវត្ថុអនុស្សាវរីយ៍កុម្ម៉ង់នេះដោយខ្លួនឯង។
កញ្ញា ម៉េង សូហួង បានបញ្ជាក់ទៀតថា៖ «ផលិតផលយើងធ្វើដោយដៃ អ៊ីចឹងហើយវាងាយរងការប៉ះទង្គិចអាចធ្វើឲ្យបែក នៅពេលដែលយើងដឹកឆ្លងប្រទេសវាមិនងាយនោះទេ ប៉ុន្តែបច្ចុប្បន្នមានអតិថិជននៅក្រៅប្រទេសកម្ម៉ង់ជាច្រើន អ៊ីចឹងនៅពេលនេះយើងក៏បានកំពុងរកវិធីក្នុងការដឹកជញ្ជូនទៅក្រៅប្រទេសផងដែរ»៕
តុក្កតាត្រូវបានសូនសម្រិតសម្រាំងដូចទម្រង់មុខមនុស្សតាមដែលអាចធ្វើទៅបាន។ហុង មិនា
