ភ្នំពេញ៖ ការជួបជុំជជែកគ្នា និងចែករំលែកពីបទពិសោធន៍ ស្តីពីការលេងស្ទីលម៉ូដសម្លៀកបំពាក់ (Fashion) គ្រប់ទម្រង់ឈ្មោះ «Dress To Express ឬស្ទីលស្លៀកពាក់រៀងខ្លួនតាមទីសាធារណៈ» ធ្វើឡើងក្នុងបំណងលើកទឹកចិត្ត និងជួយកាត់បន្ថយទៅលើការរើសអើង ជាពិសេសការប្រមាថមើលងាយពីរបៀបនៃការស្លៀកពាក់ រើសអើងពូជសាសន៍ ពណ៌សម្បុរ និងការបែងចែកភេទជាដើម។
នេះគឺជាការបង្កើតឡើងដោយយុវជនស័្មគ្រចិត្តកម្ពុជា ១ ក្រុម បានរួមគំនិត និងបង្កើតពិធីជួបជុំគ្នា ដើម្បីលើកកម្ពស់ចែករំលែក និងផ្លាស់ប្តូរបទពិសោធពីស្ទីលស្លៀកពាក់របស់ខ្លួននៅទីសាធារណៈក្នុងរាជធានីភ្នំពេញ កាលពីរសៀលថ្ងៃទី ២៦ ខែ កញ្ញា ឆ្នាំ ២០២០ កន្លងមកនេះ។ អ្នកបង្កើតកម្មវិធីមានប្រមាណជាង ១០ នាក់ ដែលជាសិស្ស និស្សិត បុគ្គលិកក្រុមហ៊ុន អ្នកសិល្បៈ បុគ្គលិកអង្គការ បុគ្គលិកការងារឯករាជ្យ និងយុវវ័យគ្រប់ស្រទាប់ជាន់ថ្នាក់ចូលរួមដោយស្ម័គ្រចិត្ត។
លោក បូ សកលកិត្យា ជាបុគ្គលិកឯករាជ្យ និងម្នាក់ក្នុងចំណោមអ្នកបង្កើតការជួបជុំនេះ បានលើកឡើងថា៖ «នៅប្រទេសកម្ពុជា វប្បធម៌នៃការស្លៀកពាក់មួយចំនួន មិនត្រូវបានផ្តល់នូវតម្លៃទៅតាមការច្នៃម៉ូដសម្លៀកបំពាក់របស់អ្នកច្នៃខ្លួនឯងនោះទេ ដោយហេតុថា វាមានលក្ខណៈខុសប្លែកពីអ្នកដទៃ និងមិនមានភាពជឿជាក់ដើរតាមទីសាធារណៈ»។
លោកបន្តថា៖ «ខ្ញុំសង្ឃឹមថាការជួបជជែកគ្នាលើកនេះ អាចជាការលើកទឹកចិត្ត និងជាគំនិតតិចតួច ជំរុញដល់អ្នកដែលបានគិតស្រមៃ និងកំពុងតែគិតច្នៃនូវអ្វី ដែលបង្ហាញជាខ្លួនឯង និងជាឱកាសសម្រាប់មនុស្សគ្រប់រូបនៅក្នុងការចូលរួមគាំទ្រលើការស្លៀកពាក់បែប Fashion របស់បុគ្គល»។
បន្ទាប់ពីជួបជុំថតរូបពិភាក្សាគ្នារវាងអ្នកជំនាញ និងអ្នកចូលរួមទូទៅ និងបានផ្លាស់ប្តូរបទពិសោធពីការយល់ឃើញក្រោមប្រធានបទ «សុវត្ថិភាពនៃការស្លៀកពាក់» ឃើញថា អ្នកចូលរួមទំាងអស់បានស្នើឱ្យមានការរៀបចំបែបនេះបន្ថែម ដើម្បីបង្ហាញពីភាពខ្លួនឯង។
ផ្ទុយទៅវិញការបង្ហាញស្ទីលស្លៀកពាក់របស់ខ្លួនឯងជាកត្តាចាំបាច់ ដើម្បីបង្ហាញពីខ្លួនឯង និងជាគំរូដល់អ្នក ដែលមានស្ទីលផ្ទាល់ខ្លួន ដែលមិនមានភាពប្រាសចាកអំពីប្រពៃណីវប្បធម៌ខ្លួននោះឡើយ។
អ្នកចូលរួមកម្មវិធីភាគច្រើន បង្ហាញភាពរីករាយសម្រាប់វត្តមាន និងបង្ហាញពីស្ទីលស្លៀកពាក់រៀងៗខ្លួន ដើម្បីបង្ហាញពីខ្លួនឯងតាមរយៈការថតរូបលេង ពិភាក្សាពីបទពិសោធជីវិត និងបញ្ហាផ្សេងៗទៀតដែលជាបទពិសោធសង្គមជាមួយមនុស្សក្នុងសង្គមបានជួបប្រាស្រ័យទាក់ទងគ្នា។
ដោយសារមានគំនិតវិជ្ជមានស្របគ្នាច្រើនមកនោះ មើលទៅទិដ្ឋភាពជួបជុំគ្នា ដែលជាឱកាសនៃការបង្ហាញពីស្ទីលស្លៀកពាក់ឱ្យមាន «ភាពជឿជាក់តាមការស្លៀកពាក់នៅតាមទីសាធារណៈ Dress to Express» អាចនឹងមានការរៀបចំជាបន្តបន្ទាប់ទៀតនៅទីតាំងផ្សេងៗគ្នា ក្នុងប្រទេសកម្ពុជា បន្ទាប់ពីការជួបជុំគ្នា និងពង្រឹងភាពជឿជាក់ក្នុងការស្លៀកពាក់បែប Fashion របស់បុគ្គលម្នាក់ៗ ទៅតាមទីសាធារណៈដំបូងនេះ មានផលវិជ្ជមានមកនោះ៕