ក្រុងញូវយ៉ក: ពេលនិយាយពីកម្ពស់របស់កុមារ ម្នាក់ៗសុទ្ធតែយល់ថា វាបណ្ដាលមកពីហ្ស៊ែនឪពុកម្ដាយ។ អ្នកខ្លះគិតថា វាជាព្រហ្មលិខិត។ ប៉ុន្ដែវាមិនពិតទេ។ យោងតាមក្រុមអ្នកជំនាញ មានមូលហេតុច្រើន ដែលឪពុកម្ដាយ អាណាព្យាបាល រួមទាំងការថែទាំកុមារក៏អាចជួយកុមារលូតកម្ពស់បានខ្ពស់ដែរ ដោយរាប់បញ្ចូលទាំងជីវជាតិអាហារល្អ និងរបបដំណេកគ្រប់គ្រាន់។
អ្នកឯកទេសរោគកុមារ វេជ្ជបណ្ឌិត រ៉ូទីមី អាដេសានយ៉ា បាននិយាយថា ក្រៅពីហ្ស៊ែន ពេលកុមារទទួលទានដំណេកគ្រប់គ្រាន់ ហើយទទួលទានរបបអាហារត្រឹមត្រូវ ពួកគេអាចកើនកម្ពស់។
យោងតាម WebMD បានបង្ហាញថា ទារកអាយុពី ១ ទៅ ៤ សប្ដាហ៍ គួរតែគេងចន្លោះពី ១៥ ទៅ ១៦ ម៉ោងក្នុងមួយថ្ងៃ។ ទារកអាយុ ១ ទៅ ៤ ខែ ត្រូវការដំណេក ១៤ ទៅ ១៥ ម៉ោង និង ទារកអាយុពី ៤ ទៅ ១២ ខែ គួរគេងពី ១៤ ទៅ ១៥ ម៉ោងក្នុងមួយថ្ងៃ តែពួកគេរមែងគេងតែ ១២ ម៉ោង។
WebMD បន្ដថា៖ «ទម្លាប់បង្កើតដំណេកប្រកបដោយសុខុមាលភាពជាគោលដៅបឋម អំឡុងពេលវេលានេះខណៈកូនរបស់លោកអ្នកពេលនេះ មានទំនាក់ទំនងសង្គមច្រើន ហើយដំណេកកុមារកាន់តែដូចមនុស្សធំ»។
កុមារដែលមានអាយុពី ១ ទៅ ៣ ឆ្នាំ ត្រូវបានណែនាំឲ្យគេងពី ១២ ទៅ ១៤ ម៉ោងក្នុងមួយថ្ងៃ តែលទ្ធផលជាក់ស្ដែងបានរកឃើញថាពួកគេតែងតែគេងត្រឹម ១០ ម៉ោង។ កុមារអាយុពី ៣ ទៅ ៦ ឆ្នាំគួរគេងឲ្យបាន ១២ ម៉ោង។អាយុពី ៧ ទៅ ១២ ឆ្នាំ កុមារគួរគេងពី ១០ ទៅ ១១ ម៉ោង។ រីឯក្មេងជំទង់ ១២ ទៅ១៨ ឆ្នាំ ពួកគេគួរគេងពី ៨ ទៅ ៩ ម៉ោង។
លោកវេជ្ជបណ្ឌិត និយាយថា៖ «ក្រៅពីកត្ដាបរិស្ថាន អ័រម៉ូនកម្ពស់បានកើនឡើងពេលកុមារគេង។ ការកើនឡើងកម្ពស់នេះកើតឡើងពីកត្ដាជាច្រើន។ ហ្ស៊ែនជាផ្នែកចម្បងមួយ កត្ដាបរិស្ថាន និងកត្តាអាហារសម្បូរប្រូតេអ៊ីនជំនួយការលូតកម្ពស់ ដូចជា ស៊ុត ឬមួយសាច់គោ ជាដើម»។
អ្នកវិទ្យាសាស្ដ្របានរកឃើញក្រពេញភ្ជាប់ផ្នែកខាងក្រោមនៃខួរក្បាល ដែលផលិតអ័រម៉ូន គ្រប់គ្រងកម្ពស់ និងការអភិវឌ្ឍផ្សេងៗ រួមទាំងការលូតលាស់នៃឆ្អឹង ឆ្អឹងខ្នង ជើង និងសារពាង្គកាយ ដែលមានលទ្ធផលលើកម្ពស់។ ជំងឺរ៉ាំរ៉ៃ និងជីវជាតិអាហារមិនគ្រប់គ្រាន់អាចជះឥទ្ធិពលលើកម្ពស់កុមារ។
ដូច្នេះ ឪពុកម្ដាយ ដែលសង្កេតឃើញកូនអត់សូវលូតកម្ពស់ គួរតែស្វែងរកដំបូន្មានពីអ្នកជំនាញ៕
HR