.jpg)
សត្វក្អែកត្រូវបានបង្វឹកឲ្យពាំប្រមូលកន្ទុយបារី និងសំរាមក្នុងឧទ្យានប្រវត្ដិសាស្ដ្របារាំង៕
ក្រុងប៉ារីស : ក្អែក ៦ ក្បាលដែលត្រូវបានបង្វឹកយ៉ាងពិសេសឲ្យរើសកន្ទុយបារី និងសំរាម នឹងចេញបំពេញប្រតិបត្ដិការនៅសប្ដាហ៍ក្រោយ ក្នុងឧទ្យានកម្សាន្ដប្រវត្ដិសាស្ដ្របារាំង។ នេះបើយោងតាមអគ្គនាយកឧទ្យានបានឲ្យដឹងកាលពីថ្ងៃសុក្រ។
លោក នីកូឡាស ដេ វីលលីយើស៍ អគ្គនាយកឧទ្យាន Puy du Fou ស្ថិតនៅតំបន់ Vendee ភាគខាងលិចបានប្រាប់ AFP ថា៖ «គោលបំណង គឺមិនត្រឹមតែឲ្យក្អែកសម្អាតបរិស្ថានប៉ុណ្ណោះទេ ពីព្រោះភ្ញៀវតែងតែមានចិត្ដរក្សាបរិស្ថានល្អជាស្រេចទៅហើយ ប៉ុន្ដែថែមទាំងចង់បង្ហាញថា ធម្មជាតិក៏បានបង្រៀនយើងឲ្យចេះថែរក្សាបរិស្ថានស្អាតផងដែរ»។
បក្សីអម្បូរ Rooks ជាសមាជិកមួយប្រភេទរបស់ក្អែកដែលរួមមាន ក្អែកការរីអុន ក្អែកជេកដ័រ និងរ៉ាវេន ជាដើមត្រូវបានចាត់ទុកជាអម្បូរក្អែកវៃឆ្លាត ហើយពួកវាអាចធ្វើការប្រាស្រ័យទាក់ទងជាមួយមនុស្ស និងបង្កើតសម្ព័ន្ធជាមួយគ្នាតាមរយៈការលេងថែមទៀត។
លោកបានបន្ថែមថា បក្សីទាំងនេះនឹងត្រូវបានលើកទឹកចិត្ដឲ្យសម្អាតបរិស្ថានក្នុងឧទ្យានជាថ្នូរនឹងចំណីឆ្ងាញ់ៗនូវរៀងរាល់ពេលប្រមូលកន្ទុយបារី និងសំរាមមួយដុំ៕ HR
