.jpg)
ទិដ្ឋភាពបង្ហើរខ្លែងឯកខ្មែរ ដែលសំកាំងខ្លួនលើអាកាសវេហាស៍ក្នុងកម្មវិធីមហោស្រពបង្ហើរខ្លែងខ្មែរលើកទី ២៣ ឆ្នាំ ២០១៩។ រូបថត ហ្វេសប៊ុក
ភ្នំពេញ៖ ទីបំផុតក្រុមខ្លែងឯកខ្មែរ ជាក្រុមតំណាងប្រតិភូមន្ទីរខេត្តតាកែវមានឈ្មោះថា «បក្សីភ្នំដំរីរមៀល» បានទទួលចំណាត់ថ្នាក់លេខ ១ ពីកម្មវិធីមហោស្រពបង្ហើរខ្លែងខ្មែរលើកទី ២៣ ដែលបានធ្វើនៅខេត្តកោះកុង កាលពីថ្ងៃទី ១១ ខែ ធ្នូ ឆ្នាំ ២០១៩ កន្លងមក ដោយមានតំណាងខេត្ត-ក្រុងនានាចូលរួមចំនួន ២៣ ខេត្ត-ក្រុង និងបេក្ខជនស្វៃរិនចូលរួមចំនួន ៤៧ រូប។
ចំណាត់ថ្នាក់លេខ ២ បានទៅលើក្រុមតំណាងប្រតិភូមន្ទីរខេត្តកំពង់ឆ្នាំង ឈ្មោះថា «សំរិទ្ធសែនមានជ័យ» និងចំណាត់ថ្នាក់លេខ ៣ ស្ទួន បានទៅលើក្រុមតំណាងប្រតិភូមន្ទីរខេត្តកោះកុង គឺជាម្ចាស់ផ្ទះ ដែលរៀបចំកម្មវិធីមហោស្រពបង្ហើរខ្លែងខ្មែរលើកទី ២៣ ឆ្នាំ ២០១៩ នេះ មានឈ្មោះថា «ប្រុសសង្ហាបារមីឃុនឆាង» និងក្រុមតំណាងប្រតិភូមន្ទីរខេត្តមណ្ឌលគិរី មានឈ្មោះ «សម្រស់ធនធានធម្មជាតិមណ្ឌលគិរី»។
ចំណែកឯលទ្ធផលនៃក្រុមប្រកួតខ្លែងច្នៃប្រឌិត សម្រាប់បេក្ខជនស្វៃរិនវិញ ចំណាត់ថ្នាក់លេខ ១ គឺបានទៅលើកញ្ញា សាន ស្រីរ័ត្ន មកពីស្រុកកៀនស្វាយ ខេត្តកណ្តាល ខណៈចំណាត់ថ្នាក់លេខ ២ បានទៅលើលោក សាមុត វុទ្ធា មកពីខេត្តប៉ៃលិន និងចំណាត់លេខ ៣ បានលើលោក រ័ត្ន វិឆ័យ មកពីស្រុកកៀនស្វាយ នៅក្នុងខេត្តកណ្តាល។
ក្រុមខ្លែងឯកជយលាភីលេខ១ «បក្សីភ្នំដំរីរមៀល» មកពីខេត្តតាកែវ។ រូបថត ហ្វេសប៊ុក
លោក រឿង សារ៉េត អនុប្រធាននៃនាយកដ្ឋានអភិវឌ្ឍន៍វប្បធម៌នៃក្រសួងវប្បធម៌ និងវិចិត្រសិល្បៈបានឲ្យដឹងពីលក្ខខណ្ឌនៃការជ្រើសរើសយកក្រុមខ្លែងជយលាភីទាំង ២ វិញ្ញាសាគឺទី ១ ខ្លែងឯក ឬខ្លែងព្នង សម្រាប់តំណាងមន្ទីរខេត្ត-ក្រុង និងទី ២ ជាខ្លែងច្នៃប្រឌិត សម្រាប់បេក្ខជនស្វៃរិន នាពេលដាក់ពាក្យចូលរួមប្រកួតជារៀងរាល់ឆ្នាំដែរថា៖ «ចំពោះលក្ខខណ្ឌជ្រើសរើសវិញ្ញាសាទី ១ (ខ្លែងឯក ឬខ្លែងព្នង ឬខ្លែងមេកូន) គឺយើងផ្អែកទៅលើកត្តាសំខាន់ ៣ យ៉ាង គឺមានសំឡេងឯកពីរោះរណ្តំ សោភណភាពល្អ (វិចិត្រកម្ម) និងការបង្ហើរឡើង និងដាក់ចុះបានល្អ។ ខណៈវិញ្ញាសាទី ២ (ខ្លែងច្នៃប្រឌិត) ផ្អែកទៅលើទម្រង់ និងបច្ចេកទេសផលិតល្អ សោភណភាពល្អ (វិចិត្រកម្ម) និងបង្ហើរឡើង និងដាក់ចុះបានល្អ។ ចំណែកឯបេក្ខជន-បេក្ខនារី ធ្លាប់ទទួលបានជយលាភីរួចកាលឆ្នាំមុនៗហើយនោះ គឺមិនអាចដាក់ពាក្យប្រកួតម្តងទៀតបានទេ»។
ក្រុមខ្លែងឯកខ្មែរជាម្ចាស់ផ្ទះឆ្នាំនេះគឺខេត្តកោះកុង។ រូបថត ហ្វេសប៊ុក
ជាទូទៅកម្មវិធីមហោស្រពបង្ហើរខ្លែងខ្មែរ ច្រើនតែមានការប្រារព្ធធ្វើឡើងនៅក្នុងរាជធានីភ្នំពេញ ចាប់តាំងពីដើមតរៀងមក តែនារយៈពេលប៉ុន្មានឆ្នាំចុងក្រោយនេះ ដូរមករៀបចំតាមបណ្តាខេត្តនានាវិញ នេះបើយោងទៅតាមសេចក្តីណែនាំស្តីពីការរៀបចំរបស់ក្រសួងវប្បធម៌ និងវិចិត្រសិល្បៈ បានជូនដំណឹងទៅមន្ទីរវប្បធម៌ និងវិចិត្រសិល្បៈខេត្តក្រុងនានា ក៏ដូចជានិស្សិត និងសាធារណជន ដើម្បីបានជ្រាបពីលក្ខខណ្ឌ។
អនុប្រធាននាយកដ្ឋានអភិវឌ្ឍន៍វប្បធម៌នៃក្រសួងវប្បធម៌ និងវិចិត្រសិល្បៈ លោក រឿង សារ៉េត ក៏បានបញ្ជាក់ពីការផ្លាស់ប្តូរនេះដែរថា៖ «ដោយសារតែនេះ គឺជាគោលការណ៍របស់ក្រសួង ដែលចង់ឲ្យមានការរៀបចំមហោស្រពបង្ហើរខ្លែង នៅតាមខេត្តក្រុងនានាទាំង ២៥ ខេត្ត-ក្រុង ក្នុងប្រទេសយើង ខណៈខេត្តមានអាទិភាពរៀបចំ គឺខេត្តនៅតាមតំបន់ព្រំដែនមុនគេ។ យ៉ាងណាមិញការរៀបចំលើកទី ២១ ឆ្នាំ ២០១៧ ធ្វើនៅខេត្តកែប ហើយកាលពីលើកមុនៗនោះនៅខេត្តព្រះសីហនុ ផងដែរ។ ចំណែកលើកទី ២២ កន្លងទៅប្រារព្ធធ្វើនៅបរិវេណនៃវិទ្យាល័យ ស្វាយរៀង ក្នុងក្រុងស្វាយរៀង ខេត្តស្វាយរៀង នៅថ្ងៃទី ២១ ខែ ធ្នូ ឆ្នាំ ២០១៨»។
គួរបញ្ជាក់ថា ការប្រារព្ធកម្មវិធីមហោស្រពខ្លែងខ្មែរនេះ តែងប្រារព្ធធ្វើរាល់ឆ្នាំ ដោយសារតែបានយកលំនាំគិតតាមត្រឹមនៃការប្រារព្ធធ្វើនៅសម័យកាលក្នុងរាជស្តេចព្រះអង្គឌួង ដែលព្រះអង្គបានកំណត់តាមប្រតិទិនចន្ទគតិរបស់ខ្មែរតរៀងមក គឺនៅថ្ងៃទី ១៥ កើត នៃខែមិគសិរ ជារៀងរាល់ឆ្នាំ។
ក្រុមជយលាភីពីលេខ១ដល់លេខ៣នៃមហោស្រពបង្ហើរខ្លែងខ្មែរលើកទី២៣ ឆ្នាំ២០១៩ នៅខេត្តកោះកុង។ រូបថត ហ្វេសប៊ុក
លោក រឿង សារ៉េត ក៏បានបន្ថែមទៀតដែរថា៖ «ចំពោះការប្រារព្ធធ្វើមហោស្រពបង្ហើរខ្លែងខ្មែរនេះ យើងមិនបានកំណត់យកកាលបរិច្ឆេទតាមថ្ងៃនៃខែសុរិយាគតិ ដែលច្រើនត្រូវចំថ្ងៃណាមួយនៃខែធ្នូនោះឡើយ។ យើងបានកំណត់យកតាមលំនាំនៃខែចន្ទគតិរបស់ខ្មែរយើង គឺធ្វើនៅចំថ្ងៃ ១៥ កើត នៃខែមិគសិរ ដោយសារយើងបានយកលំនាំតាមរជ្ជកាលនៃព្រះបាទអង្គឌួង ដែលត្រូវបានកំណត់ប្រារព្ធធ្វើនាសម័យកាលឧដុង្គ នោះតែម្តង»៕
