.jpg)
ភ្នំពេញៈ ទើបតែបានក្លាយជាម្ចាស់ជយលាភីនៃពានរង្វាន់កម្មវិធី Cambodian Idol រដូវកាលទី ៣ កាលមុនចូលឆ្នាំថ្មីឆ្នាំ២០១៨ ភ្លាម ក្រោយពីពិធីបុណ្យចូលឆ្នាំចប់ តារាចម្រៀងប្រុសសំឡេងធ្ងន់ គ្រី ថៃពៅ ក៏ទទួលបានឱកាសឡើងឆាកសម្តែងបញ្ចេញសូរសៀង និងសមត្ថភាពជាម្ចាស់ពានថ្មោងថ្មីដល់ទៅ២ បន្តបន្ទុយគ្នាតែម្តងពីផលិតកម្មហង្សមាស។
គ្រី ថៃពៅ បេក្ខជនមកពីខេត្តកំពង់ចាម ដែលទើបតែលើកពានរង្វាន់ជាម្ចាស់ជយលាភីនៃកម្មវិធីប្រឡងចម្រៀងលំដាប់ពិភពលោករដូវកាលទី ៣ Cambodian Idol នេះ នឹងបើកឆាកបង្ហើរសំនៀងដំបូងនៅលើឆាកតន្រ្តីស្ថិតនៅក្នុងខេត្តកំណើតរបស់ខ្លួនតែម្តងគឺខេត្តកំពង់ចាម នៅល្ងាចថ្ងៃទី ២១ ខែ មេសា ឆ្នាំ ២០១៨ និងមួយទៀតនឹងសម្តែងលើឆាកតន្រ្តីហង្សមាសផ្ទាល់នៅថ្ងៃល្ងាចទី ២២ ខែមេសា ឆ្នាំ២០១៨។
នេះបើតាមសារប្រកាសសុំការគាំទ្ររបស់តារាចម្រៀងប្រុសជារលកថ្មី ឬកូនចៅជំនាន់ទី៣ នៃរដូវកាល Cambodian Idol របស់ទូរទស្សន៍ហង្សមាស បានសរសេរសារបង្ហោះតាមបណ្តាញសង្គមហ្វេសប៊ុកផ្ទាល់ខ្លួនថា៖ «ជម្រាបសួរបាទ ជួបជាមួយខ្ញុំបាទនៅថ្ងៃទី21/04/18 នៅខេត្តកំពង់ចាម នៃកម្មវិធីភូមិអង្គរ ចាប់ពីម៉ោង ៨ យប់តទៅ និងនៅថ្ងៃទី 22/04/18 នៅស្ទូឌីយូហង្សមាស ព្រែកឯង នៃកម្មវិធីបាតាន់ ចាប់ពីម៉ោង ៦ ល្ងាចតទៅ។ កុំភ្លេចចូលរួមទាំងអស់គ្នាណាបាទ ស្រលាញ់គ្រប់គ្នា!»។
គួរបញ្ជាក់ថា លោក គ្រី ថៃពៅ វ័យ ២៥ ឆ្នាំ ជាបេក្ខជនមួយរូបមកពីខេត្តកំពង់ចាម ទម្រាំបានឈ្នះពានរង្វាន់នៃកម្មវិធីប្រឡងចម្រៀងលំដាប់ពិភពលោករដូវកាលទី ៣ Cambodian Idol នេះ គឺត្រូវឆ្លងកាត់ការប្រជែងជាមួយបេក្ខជនមកពីខេត្តកណ្តាលគឺបេក្ខជន សៀក ញញឹម វ័យ ៣០ ឆ្នាំ និងបេក្ខនារីពីររូបទៀតគឺកញ្ញា ចែម ស្រីល័ក្ខ វ័យ ២១ ឆ្នាំ បេក្ខនារីមកពីខេត្តតាកែវ និងកញ្ញា ឈៀង សិវណ្ណាវី វ័យ ១៧ ឆ្នាំ បេក្ខនារីមកពីខេត្តបន្ទាយមានជ័យ នៅក្នុងវគ្គផ្តាច់ព្រ័ត្រ៕
