.jpg)
សារធាតុបន្ថែមក្នុងចំណីអាហារ មានដូចជាផ្ទុកក្នុងស្ករគ្រាប់រលោង។
ក្រុងប៉ារីស: បារាំងនឹងហាមប្រើសារធាតុបន្ថែម (Food Additive) ក្នុងអាហារដ៏ពេញនិយមនៅចុងឆ្នាំនេះ ក្រោយពីការសិក្សាជាច្រើនចង្អុលប្រាប់ពីហានិភ័យចំពោះសុខភាពសម្រាប់អ្នកទទួលទាន។ នេះបើយោងតាមមន្ដ្រីរដ្ឋាភិបាលបានប្រាប់កាសែតបារាំង Le Parisien កាលពីថ្ងៃសុក្រ។
លោកស្រី Brune Poirson ជារដ្ឋមន្ដ្រីជាន់ទាបក្នុងក្រសួងបរិស្ថាន បានថ្លែងថា វិធានការនេះមានបំណងដកចេញសារធាតុគីមីទីតាញ៉ូម ចេញពីស្ករគ្រាប់ អាហារចម្អិនស្រេច និងផលិតផលម្ហូបម្ហាជាច្រើនទៀត។
លោកស្រី Poirson បានបន្តថា៖ «បារាំងបានស្នើដល់គណៈកម្មការអឺរ៉ុបឲ្យចាត់វិធានការស្រដៀងគ្នានេះផងដែរ»។
សារធាតុបន្ថែមក្នុងអាហារ មានដូចជាគ្រឿង ដែលជួយរក្សារសជាតិ បង្កើនភាពឆ្ងាញ់ លើកសម្រស់ និងគុណភាពក្នុងការរក្សាទុកចំណីអាហារ។
សារធាតុបន្ថែមក្នុងអាហារ ក៏ត្រូវបានប្រើច្រើនសម្រាប់ឲ្យស និងមានពន្លឺលើផលិតផលស្ករគ្រាប់ ស្ករកៅស៊ូ ប្រភេទទឹកជ្រលក់ពណ៌ស និងក្រែមនំពណ៌ស ហើយវាត្រូវបានស្គាល់ថាជាសារធាតុបន្ថែមពណ៌ E171 លើចំណីអាហារ។
វាក៏ត្រូវបានប្រើក្នុងឡេការពារកម្ដៅថ្ងៃ ដោយសារសមត្ថភាពម៉ូលេគុលអាចចាំងឆ្លុះកាំរស្មី UV ។ ប៉ុន្ដែក្រុមអ្នករិះគន់ បាននិយាយថា វាអាចឆ្លងចូលរបាំងការពារ ដូចជា ថ្លើម សួត ឬពោះវៀនជាដើម។
បារាំង បានបញ្ជាឲ្យស៊ើបអង្កេតកាលពីឆ្នាំមុន ក្រោយពីក្រុមអ្នកវិទ្យាសាស្ដ្របានរាយការណ៍ថា សារធាតុទីតាញ៉ូមឌីអុកស៊ីត អាចបង្កជាហានិភ័យ ជំងឺមហារីក ចំពោះសត្វកណ្ដុរ៕
