.jpg)
រថយន្តកងកម្លាំងយាមល្បាត ធ្វើដំណើរនៅបរិវេណប្រាសាទបាហ្គានដ៏មានវិសាលភាព។ រូបថត AFP
ក្រុងយ៉ាំងហ្គូន៖ ប៉ូលិសប្រដាប់អាវុធ ១ ក្រុមបានដើរល្បាតនៅទីឋានពិសិដ្ឋបាហ្គានរបស់មីយ៉ាន់ម៉ានាពេលរាត្រី បំណងទប់ស្កាត់ចោរលួចវត្ថុបុរាណពីប្រាសាទ ដែលស្ថិតក្នុងសភាពស្ងាត់ជ្រងំ ក្រោយការហាមឃាត់ទេសចរដោយសារវិបត្ដិកូរ៉ូណា។
រៀងរាល់ល្ងាចពេលព្រះសុរិយាអស្ដង្គត កងកម្លាំងប្រមាណ ១០០ នាក់ បាននាំគ្នាដើរល្បាតនៅក្នុងបរិវេណឧទ្យានជាតិបាហ្គានទំហំ ៥០ គីឡូម៉ែត្រការ៉េ បញ្ចាំងពិលមើលប្រាង្គប្រាសាទដើម្បីស្វែងរកក្រែងលោមានចោរកម្ម។
វរសេនីយ៍ទោ សែន វិន បានប្រាប់ទីភ្នាក់ងារ AFP ថា៖ «កងសន្ដិសុខយើងធ្វើការដើរល្បាតទាំងថ្ងៃទាំងយប់។ យើងអាចគ្រប់គ្រងស្ថានការណ៍នៅប្រាសាទបានទាំងស្រុង តែក៏ជួបការលំបាកខ្លះដែរ»។
ទីក្រុងនៅកណ្ដាលប្រទេសមីយ៉ាន់ម៉ា មួយនេះមានប្រាង្គប្រាសាទបុរាណជាង ៣ ៥០០ រួមមាន ចេតិយ ប្រាសាទ គំនូរ និងចម្លាក់ និងត្រូវបានដាក់បញ្ចូលបន្ថែមក្នុងបញ្ជីបេតិកភណ្ឌពិភពលោករបស់អង្គការ UNESCO កាលពីឆ្នាំមុន។
ប៉ុន្ដែវិបត្ដិកូវីដ ១៩ បានរារាំងគម្រោងប្រើប្រាស់វត្ថុបុរាណរកឃើញថ្មីរបស់បណ្ដុំប្រាសាទបាហ្គាននេះ។
កងកម្លាំងការពារបរិវេណប្រាសាទពីការលួចវត្ថុបុរាណ។ រូបថត AFP
អវត្តមានរបស់ភ្ញៀវទេសចរមានន័យថា ប្រាង្គប្រាសាទ និងសណ្ឋាគារស្ថិតនៅឯកោ សង្កត់សង្កិនលើជីវភាពប្រជាជន និងបើកទ្វារឲ្យក្រុមចោរឆ្លៀតឱកាសរបស់ខ្លួន។
ក្នុងអំពើចោរកម្មលួចចូលទីឋានពិសិដ្ឋ កាលពីដើមខែមិថុនា ក្រុមចោរបានលួចវត្ថុបុរាណចំនួន ១២ គ្រឿង រួមមានគ្រឿងសក្ការបូជា រួមទាំង ចេតិយស្ពាន់ កាក់បុរាណ និងគ្រឿងថ្លើមថ្មផងដែរ។
នាយទាហានម្នាក់ដែលសុំមិនបញ្ចេញឈ្មោះបន្ដថា ក្រៅពីការពារវត្ថុបុរាណពួកគេត្រូវប្រយ័ត្ននឹងពស់ពិសទៀត។
វត្ថុបុរាណខ្លះមានប្រវត្ដិតាំងពីសតវត្សរ៍ទី ១១ និងទី ១៣ ជាសម័យកាល ដែលបាហ្គាននៅជារាជធានីអាណាចក្រប្រចាំតំបន់។
ប្រាសាទមានវត្ថុបុរាណពីសតវត្សរ៍ទី ១១ និង ១៣។ រូបថត AFP
លោក យិន ថាន អគ្គនាយករងនៃនាយកដ្ឋានវត្ថុបុរាណវិទ្យានៃប្រាសាទបាហ្គាន បាននិយាយថា នេះជាលើកដំបូងក្នុងរយៈពេលជាច្រើនទសវត្សរ៍ ដែលតំបន់បេតិកភណ្ឌរងនូវការបំពាន ខណៈលោកបង្ហាញពីចេតិយមួយដែលត្រូវបានចោរលួចចម្លាក់ជញ្ចាំងដោយចូលតាមដំបូល។
លោកនិយាយថា៖ «ពេលមានភ្ញៀវទេសចរមក វាក៏គ្មានចោរមកដែរ»៕ AFP/HR
