ភ្នំពេញៈ ទោះបីបានគិតទុកជាមុនហើយថា នឹងមានអ្នកបរិយាយរិះគន់ជារឿយៗមកលើស្នាដៃច្នៃប្រឌិតរបស់ខ្លួននោះក៏វិចិត្រករនិយមនូវសិល្បៈកែច្នៃប្លែកៗលោក ឯម រៀម ដែលមានបទពិសោធជាង ១០ ឆ្នាំលើផ្នែកច្នៃប្រឌិតម៉ូដសិល្បៈសិប្បកម្មសហសម័យ មិនខ្វល់ឡើយក្រោមហេតុផលដែលយោគយល់វិញថាព្រោះតែពួកគេមិនទាន់យល់ពីទម្រង់សិល្បៈរបស់លោក។
ជាក់ស្តែងថ្មីៗទើបឆ្លងផុតរលកនៃព័ត៌មានរិះគន់ពីសំណាក់ក្រុមអ្នកជំទាស់មួយចំនួន ពាក់ព័ន្ធនឹងរឿងការបង្កើតថ្មីគំនិតច្នៃម៉ូដមកុដអប្សរានោះលោក ឯម រៀម នៅតែបន្តការពុះពារបង្កើតជាម៉ូដមកុដសហសម័យនេះឲ្យបានដើម្បីត្រៀមបង្ហាញក្នុងកម្មវិធីសិល្បៈនានានៅពេលខាងមុខដោយឥតកែប្រែឡើយ។
ពេលនេះវិចិត្រករមានវ័យ ៤០ ឆ្នាំ ប្លាយ ដែលបានបញ្ចប់ការសិក្សាបរិញ្ញាបត្រនៃសាកលវិទ្យាល័យភូមិន្ទវិចិត្រសិល្បៈនៅក្នុងស្រុកខ្មែរ និងចប់់បណ្ឌិតផ្នែកសិល្បៈច្នៃម៉ូដឯប្រទេសបារាំង លោក ឯម រៀម ក៏បានបង្កើតគំនិតសិល្បៈថ្មីមួយទៀត តាមរយៈ រូបភាព ១ សន្លឹក ដែលលោកថា «ទេពមច្ឆាអប្សរា» ដោយបង្កប់ន័យបង្ហាញពីក្តីព្រួយបារម្ភទៅលើបញ្ហាបរិស្ថាននៃតំបន់សមុទ្រ ឬតំបន់ទឹកដែលមានប្រព័ន្ធអេកូទេសចរណ៍។
វិចិត្រករនិយមសិល្បៈកែច្នៃប្លែកៗ ទើបតែបានជួយ $ ៥០០០ ដល់ សមាគមអភិរក្សដំរីអៃរាវត្តានៅខេត្តមណ្ឌលគិរីរូបនេះក៏បកស្រាយពីអត្ថន័យរូបថត ទេពមច្ឆាអប្សរារបស់ខ្លួនប្រាប់មហាជនដែរថា៖ «តាមពិតដោយសារពេលបច្ចុប្បន្ននេះ ឃើញថាតំបន់ឆ្នេរសមុទ្រ និងកន្លែងមានប្រព័ន្ធអេកូទេសចរណ៍ខ្មែរយើងមួយចំនួនកំពុងតែទាក់ទាញទេសចរទាំងក្នុងស្រុក និងបរទេសទៅទស្សនា កាន់តែច្រើនឡើងៗ ហើយខ្ញុំក៏មានការស្នើសុំពីក្រុមសិស្សប្អូនសិល្បៈផ្នែកថតរូបឲ្យជួយរកគំនិតពាក់ព័ន្ធនឹងក្តីព្រួយបារម្ភពីបរិស្ថានធម្មជាតិ ជាពិសេសនោះគឺបញ្ហាបរិស្ថាន»។ «
ខ្ញុំក៏នឹកឃើញយកគំនិតស្លៀកឈុតមានមកុដអប្សរារបស់ខ្ញុំ ផ្សំនឹងបច្ចេកទេសច្នៃរបស់ប្អូនៗថតរូប ក៏រំលេចចេញជារូបទេពមច្ឆាអប្សរា នេះឡើង។ យើងបានបង្កប់ន័យចង់ឲ្យបងប្អូនមហាជន មើលឃើញតាមរយៈរូបថតនេះផងដែរគឺជាការព្រួយបារម្ភពីការប្រើប្រាស់ជាវត្ថុប្លាស្ទិក ដប និងជាកំប៉ុង ដែលក្រុមភ្ញៀវទេសចរ ឬបងប្អូននៅតាម តំបន់សមុទ្រនោះ ខ្វះការស្វែងយល់ពីផលប៉ះពាល់ដោយមិនដឹងខ្លួនជាមួយការបោះចោលវត្ថុទាំងអស់នេះទៅក្នុងទឹកសមុទ្រឬទឹកបឹងបួជាតំបន់មានប្រ-ព័ន្ធអេកូទេសចរណ៍ មានក្រុមមច្ឆានានាគ្រប់ប្រភេទរស់នៅនឹងរងហានិភ័យមួយគឺកាន់តែខ្សត់ពួកវាទាំងនោះព្រោះតែបញ្ហាបរិស្ថានជម្រកមានភាពមិនអំណោយផល ល្អដើម្បីការរស់នៅរបស់ពួកវា»៕