ក្រុងប៉ារីស: ខណៈរសជាតិស្រាសំប៉ាញប្រែប្រួលតាមសីតុណ្ហភាពដើម្បីសម្រួលឲ្យអ្នកញ៉ាំដឹងពីវេលាត្រូវជល់កែវ ក្រុមហ៊ុនផលិតស្រាតូចមួយនៅភាគខាងជើងប្រទេសបារាំងបានបើកសម្ពោធស្រាសំប៉ាញដែលអាចផ្លាស់ប្ដូរពណ៌ និងការឌីហ្សាញពេលវាទទួលនូវសីតុណ្ហភាពជាក់លាក់ណាមួយ។
ដបពណ៌ស ផ្ទុកស្រាសំប៉ាញឆ្នាំ ២០០៨ បានក្លាយជាសម្បុរមេអំបៅផ្កាឈូក និងអក្សរណោតភ្លេង ពេលវាក្លាស្សេ និងហៀបនឹងទទួលទាន។
ស្រាបំប៉ាញ Infinite Eight Champagne ផលិតក្នុងតំបន់ Ville-Dommange ក្បែរក្រុង Reims ភាគឦសានប្រទេសនឹងបើកសម្ពោធលក់ក្នុងប្រទេសជប៉ុននាខែនេះ បន្ទាប់មកលក់នៅប្រទេសបារាំងក្នុងខែមេសា។
ដើម្បីរំលេចនូវភាពទាក់ទាញនេះ សហឌីហ្សាញជាមួយក្រុមហ៊ុនវេចខ្ចប់ចំណីអាហារបារាំង Distripac ដបស្រាសំប៉ាញត្រូវបានស្រោបប្លាស្ទិកស្ដើងដែលមានប្រតិកម្មនឹងធាតុត្រជាក់។
លោក Nicolas le Tixerand ប្រធានក្រុមហ៊ុនគ្រួសារដ៏តូចដែលជាមរតកស្នងដូនតាបាននិយាយថា៖ «វាជាលើកដំបូងហើយដែលមានស្រាសំប៉ាញបែបនេះ។ យើងគ្រាន់តែផលិតឡើងក្នុងតំបន់ស្រាសំប៉ាញភាគខាងជើងប្រទេសបារាំងប៉ុណ្ណោះ»។
លោកបានប្រាប់ AFP ថា៖ «វាជាយុទ្ធសាស្ដ្រផ្នែកទីផ្សារ។ វាក៏ជាគ្រឿងបង្កើនភាពរីករាយដោយបានដឹងថា សីតុណ្ហភាពកម្រិតណាទើបស្រាសំប៉ាញសមក្នុងការទទួលទាន»។
យោងតាមវេបសាយស្រាសំប៉ាញផ្លូវការ សីតុណ្ហភាពសមល្មមក្នុងការទទួលទានគឺពីប្រមាណ ៨ ទៅ ១០ អង្សាសេ៕ HR