.jpg)
តារាសម្តែងស្រីកំពុងតែឡើងកូដខ្លាំងកញ្ញា ដួង ម៉ានិច ក៏សម្តែងកុនដុំជិតចាក់បញ្ចាំងតាមរោងកុនរឿង «ទារុណកម្មខ្មោច»។ រូបថត អ៊ីនស្តាក្រាម ស្រេង ម៉េងស្រ៊ុន
ភ្នំពេញៈ ថ្មីៗនេះទាំងមជ្ឈដ្ឋានសិល្បៈ និងអ្នកគាំទ្រតារាសម្តែងស្រីតូចច្រឡឹង ចង្កាស្រួចកញ្ញា ដួង ម៉ានិច បង្កការភ្ញាក់ផ្អើលដោយសារឃើញនាងហាក់សម្បូរទីផ្សារថតកុនឲ្យរដឹកជាប់គ្នាជាងគេ សឹងតែពេញ ១ ឆ្នាំក្នុងភាពមន្ទិលមួយលើកឡើងថាទំនងមានអ្នកជួយយឹតយោង។
តែផ្ទុយទៅវិញតារាសម្តែងស្រីស្រស់សោភាវ័យ ២៧ ឆ្នាំដែលហក់ចូលប្រឡូកក្នុងវិស័យសម្តែងខ្សែភាពយន្តជិត ១០ ឆ្នាំទើបអាចកសាងបានកេរ្តិ៍ឈ្មោះល្បី និងធ្លាប់ទទួលពានរង្វាន់ជាតារាឆ្នើមផ្នែកគោរពពេលវេលា និងតួស្រីសម្តែងឆ្នើមខាងកាចឆ្នាសពីកម្មវិធី Apsara Award ២០១៦ នោះបានបដិសេធនឹងការលើកឡើងហើយបកស្រាយជម្រះមន្ទិលនោះទៀតផង។
តារាសម្តែងស្រីដែលទើបតែផ្ទុះការគាំទ្រយ៉ាងខ្លាំងពីសំណាក់ប្រិយមិត្តគាំទ្រជាមួយការសម្តែងកុនភាគរឿង «ភ្លើង» កញ្ញា ដួង ម៉ានិច បានបកស្រាយចំពោះមន្ទិលថានាងមានអ្នកជួយជ្រោមជ្រែងឲ្យសម្បូរទីផ្សារថតកុននោះថា៖ «តាមពិតទៅ បើនិយាយថានាងខ្ញុំសម្បូរទីផ្សារកុននោះដូចជាមិនសូវច្រើននោះទេ គ្រាន់តែមួយរយៈចុងក្រោយនេះនាងខ្ញុំទទួលបានកុនភាគច្រើនជាងកុនដុំ ហើយកុនភាគទាំងនោះសុទ្ធតែខ្លឹមៗដោយកុនភាគមួយរឿងនាងខ្ញុំត្រូវចំណាយពេលថតប្រមាណ ៣-៤ ខែឯណោះទើបចប់ ដូច្នេះគ្រាន់តែមានកុនភាគ ២-៣ រឿង គឺវាស៊ីពេលសឹងតែអស់បាត់ហើយ ១ ឆ្នាំ។ ក្រៅពីនេះនាងខ្ញុំក៏ថតកុនដុំ និងថតស្ប៉តពាណិជ្ជកម្មនានាដែរ»។
តារាសម្ដែងរាសីកំពុងតែលូតឡើងកញ្ញា ដួង ម៉ានិច បានបន្តថា៖ «តាំងពីដើមមកគឺចាប់ពីពេលប្រឡូកចូលសិល្បៈដំបូងនោះគឺនាងខ្ញុំទទួលបានទីផ្សារថតកុនដោយការខិតខំប្រឹងប្រែងដោយខ្លួនឯងតាមរយៈបង្ហាញពីក្តីស្រឡាញ់វិស័យសិល្បៈនេះពេញបេះដូងចំនួន ១០០ ភាគរយ»។
គេនៅចាំថា កញ្ញា ដួង ម៉ានិច បានខិតខំខ្នះខ្នែងតស៊ូព្យាយាមខ្លាំងឆ្លងកាត់ការលំបាកច្រើនក្នុងការចាប់ឱកាសសម្រាប់ការសម្តែងភាពយន្តតាំងពីឆ្នាំ ២០១៣ មក ខណៈតារាស្រីតូចច្រឡឹងចង្កាស្រួចរូបនេះមានរាសីឡើងខ្លាំងនៅចុងឆ្នាំ ២០១៦ មានគេហៅថតកុនឲ្យជាប់គ្នាឲ្យរដឹកតែម្តងបន្តលាភដល់ដើមឆ្នាំ ២០១៧ ឆក់បានតំណែងតួស្រីសំខាន់ថតកុនរឿងពស់កេងកងថ្មីជាដើម និងក្រោយមករឿង «ភ្លើង» ក៏ផ្ទុះការគាំទ្រខ្លាំងនៅឆ្នាំ ២០១៨។
ស្រីស្រស់ ដួង ម៉ានិច ដែលបានចែកសំបុត្រអញ្ជើញភ្ញៀវប្រមាណ ៣៥ តុចូលរួមពិធីឡើងគេហដ្ឋានថ្មីស្ថិតនៅបុរីប៉េង ហួត បឹងស្នោ ដែលទិញតម្លៃជិត ១០ ម៉ឺនដុល្លារកាលពីដើមឆ្នាំ ២០១៨ នោះក៏បានឲ្យដឹងពីលក្ខណសម្បត្តិខ្លួនមាននៅក្នុងការឆក់បានឱកាសថតកុនជាហូរហែផងដែរ។
កញ្ញា ដួង ម៉ានិច ក៏បានបង្ហើបថា៖ «សម្រាប់នាងខ្ញុំដែលទទួលបាននូវការចាប់អារម្មណ៍ពីផលិតកម្មកុននានាជាច្រើននោះក៏ព្រោះតែនាងខ្ញុំនៅតែបន្តជាតួសម្តែងដែលគោរពពេលវេលាតែងតែស្តាប់តាមការណែនាំរបស់អ្នកដឹកនាំរឿងដោយមានការស្រឡាញ់លើវិស័យសិល្បៈសម្តែងនេះ ១០០ ភាគរយ និងមានការលះបង់ខ្លាំងចំពោះការសម្តែងរបស់ខ្លួននៅក្នុងពេលថតកុនមួយៗ»៕
