.jpg)
ផ្ទះល្វែងនៅខណ្ឌសែនសុខ ដែល ដួង ហ្សូរីដា ដាក់លក់។ ហ្វេសប៊ុក
ភ្នំពេញៈ ថ្មីៗនេះស្រាប់តែតារាសម្តែង និងពិធីការិនី កញ្ញា ដួង ហ្សូរីដា ជាប្រធានគ្រប់គ្រងក្រុមបង្ហាញម៉ូដ Cambodia Super Model និងជាម្ចាស់ហាងកាត់ដេរសម្លៀកបំពាក់ឈ្មោះ Danama Home និងហាងលក់ផលិតផលរក្សាសម្ផស្សឈ្មោះ «មុទិតា» នោះបានប្រកាសលក់ផ្ទះមួយល្វែងជាបន្ទាន់ គឺមានទីតាំងស្ថិតនៅខណ្ឌសែនសុខ គួរឲ្យភ្ញាក់ផ្អើល។
បើតាមសារចេញពីគណនីហ្វេសប៊ុកផ្ទាល់កញ្ញា ដួង ហ្សូរីដា នោះបានសរសេរថា៖ «ផ្ទះ E0E1 លក់ ១ ល្វែងនៅក្នុងបុរីមហាសែនសុខតាមបណ្តោយផ្លូវវត្តតាំងកសាង ស្ថិតនៅក្នុងសង្កាត់ក្រាំងធ្នង់ ខណ្ឌសែនសុខ ជាសំណង់គម្រោងលំនៅឋានរបស់ជប៉ុន។ មានទីតាំងពីព្រលានយន្តហោះអន្តរជាតិភ្នំពេញ ៣ គីឡូម៉ែត្រ ចូលតាមច្រកក្លោងទ្វារវត្តតាំងកសាង។ ផ្ទះមានទំហំ ៤,១ ម៉ែត្រ x ១៤ ម៉ែត្រ ខាងមុខនៅសល់ ៧ ម៉ែត្រ និងខាងក្រោយសល់ ៤ ម៉ែត្រ ខណៈផ្លូវមុខផ្ទះ ១០ ម៉ែត្រ បែរមុខទៅទិសខាងកើតលើផ្លូវធំរបស់បុរីតែម្តង។ តម្លៃ ១១៦ ៦៨៨ ដុល្លារ គឺអាចបង់បន្តជាមួយបុរីផ្ទាល់ ឬធនាគារក៏បាន»។
គ្រាន់តែឃើញការបង្ហើរសារប្រកាសលក់ផ្ទះនេះភ្លាម ក៏មានការលើកឡើង ដោយការប៉ាន់ស្មានទៅដល់តារាសម្តែងស្រី និងពិធីការិនី ដែលក្លាយជាថៅកែស្រីវ័យក្មេងជាមួយនឹងការខិតខំបង្កើតមុខរបររីកដូចផ្សិតមានទាំងកាក់ល្អិត និងធំរបស់កញ្ញាដួង ហ្សូរីដាដែរថា ៖ «ទំនងជានាងត្រូវលក់ផ្ទះបន្ទាន់ ដើម្បីយកប្រាក់មកពង្រីករបរជួញដូរទេដឹង?»។
ហេតុផលជាក់លាក់នៃការប្រកាសលក់ផ្ទះល្វែងនោះ មិនត្រូវបានកញ្ញា ដួង ហ្សូរីដា ធ្វើការបកស្រាយនោះឡើយ តែភ្នំពេញប៉ុស្តិ៍ ទទួលបានការបង្ហើបប្រាប់ត្រួសៗពីសំណាក់កញ្ញា ដួង ហ្សូរីម៉ា ដែលត្រូវជាប្អូនស្រីបង្កើតប្រាប់ថា៖ «អូ!តាមពិតផ្ទះនោះ បងស្រីគាត់ទិញប្រមាណជិត ២ ឆ្នាំនេះឯងហើយគាត់មិនមានបំណងទិញសម្រាប់រស់នៅនោះទេ ទើបបានសម្រេចចិត្តដាក់លក់វិញតែម្តងទៅដើម្បីអាចដកប្រាក់ចំណេញខ្លះ និងយកប្រាក់នេះទៅទិញផ្ទះល្វែងកន្លែងផ្សេងទៀត និងប្រាក់ខ្លះអាចយកមកបន្ថែមលើការពង្រីកមុខរបរជំនួញផងដែរ»។
មួយរយៈពេលចុងក្រោយនេះឃើញថា ដួង ហ្សូរីដា តែងតែមានការពង្រីកមុខរបរជំនួញអនឡាញនានា ជាច្រើនជាបន្តបន្ទាប់ សម្រាប់គ្រួសារ មិនថា ជាការងាររកស៊ីកាក់ល្អិត ឬកាក់ធំនោះទេ ក្រៅពីអាជីពការងារសិល្បៈជាពិធីការិនីនោះ។
គួរបញ្ជាក់ថា កាលពីដើមឆ្នាំ ២០១៨ នេះ ចេញពីគណនីហ្វេសប៊ុកឈ្មោះ Chham Chhany ដែល មានសារទម្លាយឈ្មោះអ្នកសិល្បៈចំៗ ដែលប្រកបរបរម៉ែយ៉ែមនោះ ក៏បានលើកយកឈ្មោះកញ្ញា ដួង ហ្សូរីដា មកនិយាយផងដែរក្នុងចំណោមអ្នកសិល្បៈ ៣ រូបដែលគេចោទថា បានប្រកបរបរនេះ ខណៈ ២ រូបទៀតមានអ្នកនាង ចន ច័ន្ទលក្ខិណា និងអ្នកនាង ចាន់ ស្រីណុច ហៅចែមុំ អតីតជាថៅកែហាងកែសម្ផស្សឈ្មោះ មីកាហ្សា៕
