.jpg)
ដំរីនៅរស់បង្ហាញកាយវិការព្យាយាមជួយគ្នាវា តែមិនបានសម្រេច។ រូបថត AFP
ក្រុងបាងកក៖ ដំរីព្រៃ ៦ ក្បាល បានលង់ទឹក ក្រោយពីពួកវារអិលជើងធ្លាក់ទឹកជ្រោះនៅភាគខាងជើងប្រទេស ថៃ។ នេះបើយោងតាមអជ្ញាធររាយការណ៍ពីចុងសប្ដាហ៍។ ក្នុងហ្វូងដំរីនោះមាន ២ ក្បាល ត្រូវបានសង្គ្រោះ ខណៈមួយក្បាលទៀតបានធ្លាក់តាមចរន្តទឹក។
អាជ្ញាធរនៅភាគខាងជើងឧទ្យានជាតិខាវយ៉ៃ បានឮសួរសម្រែកដំរីនៅវេលាម៉ោងប្រមាណ ៣ ទៀបភ្លឺ ហើយប៉ុន្មានម៉ោងក្រោយមក ពួកគេបានរកឃើញខ្មោចដំរី ៦ ក្បាល នៅឯបាតជ្រោះ ហែវណារ៉ុក។
ដំរី ២ ក្បាលទៀត បានបង្ហាញកាយវិការព្យាយាមសង្គ្រោះគ្នាវាមួយក្បាលដែលធ្លាក់ជ្រោះ ប៉ុន្តែវាបានរអិលជាប់នៅចន្លោះថ្មក្បែរមាត់ទឹកធ្លាក់។
វីដេអូបានបង្ហាញសកម្មភាពសត្វដំរីព្រៃខំរើខ្លួនឡើងត្រឡប់ទៅកន្លែងសុវត្ថិភាពវិញ។
មន្ត្រីឧទ្យានជាតិបានព្យាយាមទម្លាក់ចំណីសម្បូរជីវជាតិ ដើម្បីប៉ូវកម្លាំងពួកវាឲ្យមានសុខភាពរឹងមាំ អាចឡើងភ្នំត្រឡប់ទៅព្រៃជម្រករបស់ពួកវាវិញ។
ពួកគេបានឲ្យដឹងថា ដំរី ២ ក្បាល ដែលត្រូវបានសង្គ្រោះជីវិត មានសញ្ញាមិនប្រក្រតីពីការបាត់បង់សមាជិកក្នុងហ្វូងរបស់វា។
អ្នកនាំពាក្យឧទ្យានជាតិលោក សំភូច ម៉ានីរ៉ាត់ បាននិយាយថា អ្នកជំនាញពុំទាន់រកឃើញមូលហេតុនាំឲ្យដំរីព្រៃទាំងនោះងាប់ឡើយ។
លោកលើកឡើងថា៖ «យើងពុំហ៊ានសន្និដ្ឋានច្បាស់ថា ហេតុអ្វីបានជាវាធ្លាក់ជ្រោះងាប់នោះទេ គឺយប់នោះ មានភ្លៀងធ្លាក់ខ្លាំងណាស់»។
ដើម្បីសង្គ្រោះសត្វដំរី តំបន់ទេសចរណ៍ទឹកជ្រោះនោះត្រូវបានផ្អាកស្វាគមន៍ភ្ញៀវ។
ដំរី គឺជាសត្វអត្តសញ្ញាណជាតិថៃ តែចំនួនពួកវារស់នៅក្នុងព្រៃ កាន់តែថមថយនៅសល់តែប៉ុន្មានពាន់ក្បាលប៉ុណ្ណោះ៕ AFP/HR
