.jpg)
លោក កាំង ហ្កេកអ៊ាវ ហៅតាឌុច ដែលមហាជនសង្ស័យថាជាតារបស់កញ្ញា ឌុច លីដា។ ហ្វេសប៊ុក
ភ្នំពេញៈ កាន់តែបង្កការភ្ញាក់ផ្អើល និងចង់ដឹងការពិតយ៉ាងខ្លាំង បន្ទាប់ពីល្បីថា តារាស្រីមានរាសីឡើងកូដក្រឺតៗក្នុងពិភពសម្តែងភាពយន្តភាគច្រើនសម្តែងជាតួឯកក្នុងភាពយន្តខ្នាតធំ ខណៈមហាជនស្គាល់ច្បាស់ជាតួស្រីដែលហ៊ានថតបញ្ចេញសាច់ល្វែងលើដោយសារបានតម្លៃខ្លួនថតខ្ពស់ កញ្ញា ឌុច លីដា នោះ ជាចៅស្រីរបស់អតីតមេគុកទួលស្លែងតាឌុច។
ទាំងមហាជនទូទៅក៏ដូចជាអ្នកគាំទ្ររបស់តារាសម្ដែងស្រីមានរាងតូចច្រឡឹង ចង្កេះអង្ក្រងសម្បូរមន្តស្នេហ៍រយពាន់កញ្ញាឌុច លីដា ប្រាកដជាចង់ដឹងពីអាថ៌កំបាំងនេះណាស់ ថាតើពិតឬយ៉ាងណាដែលមានដំណឹងមិននឹកស្មានដល់ថា នាងគឺជាចៅស្រីរបស់ លោក កាំង ហ្កេកអ៊ាវ ហៅតាឌុច នោះ?
ថ្លែងប្រាប់ទាំងកើតមានចម្ងល់រកប្រភពព័ត៌មានថា រូបនាងមានជាប់សាច់ឈាមទៅនឹងអតីតជាមេគុកទួលស្លែងតាឌុច តារាស្រីដែលបានជះទុនជាង ១ ម៉ឺនដុល្លារ ទៅបើកហាងគុយទាវមួយឈ្មោះថា «ឡាំឌួយ» ហើយក៏បានបិទទៅវិញ នាប៉ុន្មានខែក្រោយ ដោយសារខ្លួនរវល់ការងារសិល្បៈខ្លាំងគ្មានពេលមើលខុសត្រូវនោះប្រាប់ភ្នំពេញប៉ុស្តិ៍ថា៖ «ឆ្ងល់ណាស់បង!តើដំណឹងនេះបានពីខាងណាមកថា ដូច្នេះ ខណៈការពិតមិនមែនឡើយ។ ប្រសិនបើមានបងប្អូនសង្ស័យបែបនេះ ម៉េចមិនឆ្ងល់ថា នាងខ្ញុំជាប្អូនស្រីរបស់បងឌុច សុភា ដែរទៅអ៊ីចឹង?»។
កញ្ញា ឌុច លីដា បន្តទាំងមានការហួសចិត្ត ដោយគិតថាទំនងជាមានបងប្អូនខ្លះគាត់ចូលចិត្តយកមក Troll លេង ព្រោះតែមាននាមត្រកូលឈ្មោះ «ឌុច» នោះឯងថា៖ «នាងខ្ញុំគិតថា ទំនងជាគាត់ឃើញនាមត្រកូលនោះហើយបានជាយកមកលេងសើចបែបនេះ។ តែនាងខ្ញុំក៏សំណូមពរបងប្អូនផងថា កុំ Troll លេងដូច្នេះអី ហើយក៏សូមជម្រាបបងប្អូនដែរថា នាងខ្ញុំ អត់មានជាប់សាច់ឈាមនឹងលោកតាឌុច នោះទេ»។
តារាស្រី ដែលឡើងកូដខ្លាំងក្នុងពិភពសម្តែងភាពយន្តខ្នាតធំ ពិសេស នាងក៏ ធ្លាប់ត្រូវបានអ្នកទស្សនាបញ្ជាក់ឲ្យដឹងថា នាងហ៊ានថតស្រាតបញ្ចេញនូវសាច់ល្វែងលើពិតៗ ដោយសារតែនាងទទួលបានតម្លៃខ្លួនយ៉ាងខ្ពស់នៅក្នុងការប្រជែងយកតំណែងតួឯកស្រីក្នុងភាពយន្តខ្នាតធំបំផុតរបស់ខ្មែរគឺរឿង «ស្បែកគង់» ដែលគេបានចំណាយទុនវិនិយោគរហូតដល់ ៦៨ ម៉ឺន ដុល្លារ និងក្រោយមកល្បីមួយប្រាវទៀតជាមួយការសម្តែងលែងកាយក្នុងកុនដុំក្រោយរឿង «នារីវេទមន្ត»។
ក្រោយមកទាំងមហាជន និងមិត្តអ្នកសិល្បៈ មានការភ្ញាក់ផ្អើល ខណៈបានឃើញតារា សម្តែងស្រី ដែលផ្តើមភាពល្បី យ៉ាងខ្លាំងព្រោះហ៊ានបញ្ចេញល្វែងលើនៅក្នុងឈុតងូតទឹកជ្រោះដ៏ ត្រជាក់រហឹមរបស់តារាសម្តែងស្រីតូចច្រឡឹងកញ្ញា ឌុច លីដា នៅក្នុងភាពយន្តខ្នាតធំប្រចាំឆ្នាំតាមរយៈខ្សែភាពយន្តរឿង «ស្បែកគង់» បានប្រកូកប្រកាសផ្សព្វផ្សាយហៅមិត្តភក្តិ និងមិត្តអ្នកសិល្បៈទាំងឡាយឲ្យជួយញ៉ាំគុយទាវនៅហាង «ឡាំឌួយ» ដែលហាងមួយនេះមានទីតាំងនៅខាងក្រោយមន្ទីរពេទ្យ រុស្ស៊ី កាលពីពាក់កណ្តាលឆ្នាំ ២០១៧ តែបច្ចុប្បន្នហាងនេះត្រូវបានបិទហើយ៕
