កំពង់ចាម៖ នាព្រឹកព្រលឹមថ្ងៃអាទិត្យកន្លងទៅ ក្រុមគ្រួសារ និងសាច់ញាតិជួបជុំគ្នាដោយការទន្ទឹងរង់ចាំស្វាគមន៍សមាជិកថ្មីចំពោះវត្ដមានទារិកា ដែលនឹងចាប់កំណើតក្នុងផ្ទៃម្ដាយខ្មែរអ៊ិស្លាម នៅឯផ្ទះផ្ទាល់ខ្លួននៃខេត្ដកំពង់ចាម។
ក្ដីរំភើបរីករាយដ៏អន្ទះសា បានប្រែក្លាយជាអារម្មណ៍តក់ស្លុត ស្ទើរគាំងអស់ស្មារតី ពេលទារិកាប្រសូតមកមានមុខមាត់ចម្លែកបំផុត ដែលធ្វើឱ្យផ្អើលអស់អ្នកភូមិរត់មកមើលយ៉ាងឈូឆរ។
ជ្រកក្រោមដំបូលផ្ទះតោកយ៉ាក ទារិកានេះមានកែវភ្នែក ២ ក្នុងរង្វង់ភ្នែកតែ ១ ស្ថិតនៅចំកណ្ដាល និងច្រមុះដុះចេញពីថ្ងាសលើភ្នែក។
មើលឃើញស្ថានភាពកូនដ៏ចម្លែកបែបនេះ និងអារម្មណ៍រន្ធត់ចិត្ដជាពន់ពេក ឪពុកចាប់លើកត្រកងបីកូនផង ដាក់ចុះផង និងរត់ឆ្លេឆ្លារកអ្នកភូមិជួយ។
លោក ស្លៃម៉ាន ម៉ាត់ស្រេន ជាអ្នកជិតខាងដ៏ស្និទ្ធបំផុតនៃក្រុមគ្រួសារប្រសូតកូនដ៏ចម្លែកនេះ ឃើញហេតុការណ៍ផ្ទាល់ភ្នែក និងផ្ដល់ព័ត៌មានផ្សេងៗជំនួសក្រុមគ្រួសារនេះ ដោយសារពួកគេគ្មានលទ្ធភាពសម្បូរតែប្រើប្រាស់ទូរស័ព្ទដៃចាស់សម្រាប់ទំនាក់ទំនង។
លោក ម៉ាត់ស្រេន បានប្រាប់ ភ្នំពេញ ប៉ុស្ដិ៍ ថា៖ «ពេលកើតមកភ្លាម [នៅម៉ោង ១០ ព្រឹក] ទារិកានេះបានយំ និងកណ្ដាស់បន្តិចបន្តួចដែរ ហើយរាងកាយដៃជើង គឺធម្មតាទាំងអស់លើកលែងតែភ្នែកស្ថិតនៅចំកណ្ដាល និងមានប្រស្រី ២ ក្នុងភ្នែកតែមួយដែលប្រហោងទន់ៗទ្រវែងមួយទំនងជាច្រមុះដុះលើថ្ងាស»។
លោកបានបន្ដថា៖ «ខ្ញុំក៏បានទៅអញ្ជើញគ្រូពេទ្យមកមើលដែរ។ ប៉ុន្ដែសូម្បីគ្រូពេទ្យក៏គាត់មិនសូវហ៊ានមើល ហើយក៏មិនហ៊ានអះអាងថា ភាពមិនប្រក្រតីនេះកើតមកពីអ្វីដែរ»។
ឮសំឡេងកណ្ដាស់តែម្ដងពីរដង ទារិកាចម្លែកនេះក៏ស្ងាត់ឈឹងរៀងរហូត។ ឆាកជីវិតជាកូនស្រីក្រោមផ្ទៃម្ដាយ អេល វ៉ារីយះ អាយុ ៣៥ ឆ្នាំ និង ឪពុកឈ្មោះ ម៉ាត់ សឡេះ អាយុ ៣៧ ឆ្នាំ បានអស់និស្ស័យនឹងគ្នាត្រឹមរយៈពេល ៤ ម៉ោងប៉ុណ្ណោះ។
នៅវេលាម៉ោង ២ រសៀល ទារិកាមិនទាន់មានឈ្មោះនេះបានដាច់ដង្ហើមឈឹង និងបានបន្សល់ទុកនូវភាពអាឡោះអាល័យរបស់ឪពុកម្ដាយ ដែលមិនទាន់បាត់ឈឺចាប់នូវស្នាមរបួសនៃការផ្ដល់កំណើតផងនោះ។
លោក ម៉ាត់ស្រេន បានឱ្យដឹងថា៖ «ដោយកត្ដាជីវភាពក្រីក្រពេក ស្ដ្រីជាម្ដាយធ្លាប់ទៅពិនិត្យអេកូតែម្ដងគត់ ដែលគ្រូពេទ្យបានប្រាប់ថា មិនមានសញ្ញាខុសប្រក្រតីណាមួយលើទារិកាទេ»។
ទោះនិស្ស័យរវាងឪពុកម្ដាយ និងកូនបានបញ្ចប់ត្រឹមរយៈពេលខ្លីជាមួយពិធីបុណ្យសពលាគ្នាយ៉ាងណាក៏ដោយ ក៏ពួកគេនៅតែយំអាល័យកូន ដោយលោក ម៉ាត់ស្រេន បានប្រាប់ថា ឪពុកម្ដាយនៅតែស្រឡាញ់កូន ថ្វីដ្បិតតែកូនមានស្ថានភាពបែបណាក៏ដោយ។
លោក ម៉ាត់ស្រេន និយាយទាំងអួលដើមកនឹកអាណិតដល់ស្ថានភាពគ្រួសារនេះថា៖ «ពួកគាត់លំបាកទីទ័លមែនទែន គាត់គ្មានស្រែចម្ការអ្វីទេ។ ខោអាវដែលស្លៀកពាក់ក៏តោកយ៉ាកមើលមិនយល់។ សព្វថ្ងៃរស់ដោយសារតែអ្នកភូមិឱ្យម្នាក់បន្តិច»។
លោកអះអាងថា៖ «ដំបូងឡើយបុរសជាប្ដីរកស៊ីលើទូក ដាក់មងតាមព្រែក។ ប៉ុន្ដែឥឡូវគាត់ធ្វើអីលែងចេញ ព្រោះភ្នែកស្រវាំងដោយសារទៅស៊ីឈ្នួលគេត្រាយព្រៃឈើវាត់ត្រូវភ្នែក ៣-៤ ឆ្នាំហើយមិនមានអ្នកណាជួយគាត់ទៀតទេ ពីព្រោះគាត់មើលមិនសូវច្បាស់»។
កាន់តែអកុសលថែមទៀតនោះ គ្រួសារក្រីក្រដែលមានកូន ៥ នាក់នេះ បានជួបវិបត្ដិ ដោយសារកូនទី៤ ប្រសូតមកក៏បានស្លាប់រយៈពេល ១០ ថ្ងៃក្រោយ។ ចំណែកឯកូនទី៥ នេះក៏ជួបហេតុការណ៍ និងបានស្លាប់ត្រឹមរយៈពេល ៤ ម៉ោង ខណៈកូនទាំង ៣ ទើបតែមានអាយុចន្លោះពី ៣ ទៅ ៦ ឆ្នាំប៉ុណ្ណោះ។
ជាចុងក្រោយបុរសអ៊ិស្លាម លោក ម៉ាត់ស្រេន បានអំពាវនាវថា ៖ «ខ្ញុំសូមសំណូមពរឱ្យសប្បុរសជនក្នុងហ្វេសប៊ុក ឬក្នុងប្រទេស និងក្រៅប្រទេសមេត្តាជួយឧបត្ថម្ភដល់គាត់តាមលទ្ធភាពដែលអាចជួយគាត់បាន ពីព្រោះពួកគាត់ពិតជាលំបាកខ្លាំងមែនទែន»។
ដោយសារឪពុកម្ដាយគ្មានទូរស័ព្ទទាក់ទង លោក ម៉ាត់ស្រេន ផ្ដល់លេខទូរស័ព្ទជំនួសសម្រាប់អ្នកមានបំណងជួយដល់គ្រួសារនេះតាមរយៈលេខ ០៩៦ ២៧៧ ៧៨ ៨។
គ្រួសារទារិកាចម្លែករស់នៅក្នុងភូមិទួលពោធិ៍ ឃុំព្រែកកក់ ស្រុកស្ទឹងត្រង់ នៃខេត្តកំពង់ចាម៕