.jpg)
កញ្ញា រឿន ម៉ាលិះ ធ្វើការគូរបរិស្ថាន និងរចនារូបភាពហ្គេមដោយយករចនាប័ទ្មតាមគំនូរខ្មែរ។ រូបថត ជា វណ្ណារ័ត្ន
ភ្នំពេញៈ បន្ទាប់ពីស្នាដៃបង្កើតហ្គេមជាច្រើនត្រូវបានប្រិយមិត្តគាំទ្រ ក្រុមហ៊ុនផលិតហ្គេម Direxplay ដែលបង្កើតឡើងដោយបងប្អូនខ្មែរ ៤ នាក់បាននិងកំពុងងាកមកផលិតហ្គេមអនឡាញតម្រូវតាមចំណូលចិត្តអ្នកលេងនាយុគសម័យបច្ចេកវិទ្យាទំនើបដោយមិនភ្លេចច្នៃបញ្ចូលវប្បធម៌ប្រពៃណីសិល្បៈជាតិចូលទៅហ្គេមនោះឡើយ។
នៅដើមខែមីនាកន្លងទៅ Direxplay បានបញ្ចេញស្នាដៃហ្គេមថ្មីមួយដ៏គួរឲ្យទាក់ទាញគឺកំហឹងអ្នកប្រយុទ្ធ (Wrath of Fighter) ដែលជាប្រភេទហ្គេមវាយគ្នា ដោយបញ្ចូលតួអង្គហនុមាន និងសម្លៀកបំពាក់រំលេចវប្បធម៌ អរិយធម៌ខ្មែរ។ កំហឹងអ្នកប្រយុទ្ធគឺទទួលបានការនិយមចូលចិត្តយ៉ាងច្រើនដោយគិតមកដល់ពេលនេះមានអ្នកទាញយកមកលេងមានចំនួនជាង ៦២ ០០០។
ទន្ទឹមនឹងការងាកមកចាប់អារម្មណ៍ពីការផលិតហ្គេម Offline មក Online វិញប្រធានក្រុម Direxplay លោក ឈួម ពិសិដ្ឋ បានប្រាប់ឲ្យ ភ្នំពេញ ប៉ុស្តិ៍ ដឹងថា៖ «concept នៃហ្គេមគឺជាការសប្បាយ។ ទី ១ ហ្គេម offline ហ្នឹងគាត់លេងតែមួយភ្លែត គាត់លេងចប់វគ្គគឺគាត់ឈប់លេងហើយ។ តែបើហ្គេម Online គាត់ភ្ជាប់ជាមួយអ្នកលេងផ្សេងទៀតគឺមានន័យថាការលេងហ្គេមកាន់តែបានយូរ អត់ងាយធុញទេ។ គាត់ចូលមកប៉ះអ្នកលេងថ្មីរហូត គាត់លេង គាត់ឆាតជាមួយមិត្តក្នុងហ្គេម។ គាត់មានវិធីលេងថ្មីៗ មិនមែនលេងជាមួយម៉ាស៊ីនគឺលេងជាមួយមនុស្ស»។
លោក ឈួម ពិសិដ្ឋ ប្រធានក្រុម Direxplay។ រូបថត ជា វណ្ណារ័ត្ន
ទន្ទឹមនឹងនេះ Direxplay ក៏កំពុងធ្វើការលើគម្រោងហ្គេមអនឡាញ ១ ទៀត ដែលដំណើររយៈពេល ៣ ឆ្នាំមកហើយគឺហ្គេមពន្លឺក្នុងយុគងងឹត (Light in the Dark Age) ដែលជាហ្គេមមានចំណុចពិសេស និងប្លែកពីហ្គេមមុន។ ឥឡូវនេះ Direxplay បានសម្រេចកិច្ចការបានប្រហែល ៧០ ទៅ ៨០ ភាគរយរួចមកហើយដោយគ្រោងនឹងបញ្ចេញហ្គេមនេះនៅក្នុងឆ្នាំ ២០១៩ នេះ។
ប្រធានក្រុមវ័យ ៣០ ឆ្នាំខាងលើនេះបញ្ជាក់ថា៖ «សាច់រឿងក្នុងហ្គេមយើងដកស្រង់ចេញពីឈុតមួយនៅក្នុងរឿងមហាភារតគឺឈុតកូរសមុទ្រទឹកដោះដើម្បីយកទឹកអម្រឹត តែមិនមែនយើងដកស្រង់មកទាំងអស់ទេ អ៊ីចឹងច្នៃបំបែកចេញពីមហាភារត។ សាច់រឿងបន្តទៀតគឺនៅខ្ទង់ជាង ១០០០ ឆ្នាំក្រោយមកភពមនុស្សបានធ្លាក់ចូលក្នុងយុគងងឹតដែលត្រូវពពួកបិសាចរំខានយាយីយើង ដែលជាអ្នកលេងជាតួអង្គគឺត្រូវទៅរំដោះពិភពលោក ឬជួយសង្គ្រោះលោកឡើងវិញ»។
ក្រៅពីដកស្រង់ចេញពីរឿងមហាភារតយុទ្ធ សូម្បីតែទីកន្លែង និងតួអង្គបិសាច ក៏ត្រូវបានច្នៃចេញពីប្រភពតាមជំនឿខ្មែរផងដែរ។ ក្រុមអ្នកផលិតហ្គេមមានសមាជិកបងប្អូនបង្កើត ៤ នាក់នេះចង់ឲ្យអ្នកលេងជុំវិញពិភពលោកជ្រួតជ្រាបពីវប្បធម៌ប្រពៃណីខ្មែរ ដែលបញ្ជូលក្នុងហ្គេមនោះ។
ជាមួយជោគជ័យតាមរយៈហ្គេមផ្សងព្រេង សុខ និងសៅ (Sok and Sao''s Adventure) ហ្គេម Jailbreak ពីខ្សែភាពយន្តខ្មែរ វណ្ណកម្មផលិតករអ៊ីតាលី រឿង Jailbreak ជាដើមនោះប្រធានក្រុម Direxplay លោក ឈួម ពិសិដ្ឋ បានបង្ហាញពីអារម្មណ៍ទាក់ទងនឹងការផលិតហ្គេមរបស់ខ្លួនថា៖ «យើងធ្វើហ្គេមតាំងពីឆ្នាំ ២០១៤ មកសម្ទុះនៃការគាំទ្រស្នាដៃរបស់ប្រជាជនខ្មែរមានការកើនឡើង។ យើងជឿថាទៅមុខយើងនឹងទទួលបានការគាំទ្រយើងខំប្រឹងអភិវឌ្ឍនូវស្នាដៃរបស់យើង។ យើងទទួលស្គាល់ថាយើងនៅមានចំណុចខ្វះខាតច្រើនអ៊ីចឹងយើងរីករាយទទួលនូវមតិយោបល់ទាំងអស់»៕
វីដេអូ៖
