.jpg)
ទិដ្ឋភាពកម្រាលព្រំបៃតងលើផ្ទៃបឹង វិចតូរៀ ដែលប៉ះពាល់ដល់ទិន្នផលត្រី។ AFP
ក្រុងណៃរ៉ូប៊ី: សំណាញ់មងពេញលើទូក ប្រជានេសាទមួយក្រុមជជែក និងសើចយ៉ាងក្អាកក្អាយ ខណៈក្រសែភ្នែកក្រឡេកសំដៅបឹងវិចតូរៀ និងរុក្ខជាតិបៃតងមីរដេរដាសពាសពេញផ្ទៃទឹក។ ប៉ុន្ដែសំណើចរបស់ពួកគេប្រែក្លាយជាក្ដីបារម្ភ ពេលព្រះអាទិត្យចាប់ផ្ដើមអស្តង្គត។
កម្រាលព្រំបៃតងដ៏ក្រាស់ឃ្លឹកបានវាតទីលើឆកគីសូមូម្ដងទៀតដោយបានអណ្ដែតមកភ្ជិតផ្លូវទឹកចេញទៅកាន់វាលល្វឹងល្វើយបំផុតនៃតំបន់អាហ្វ្រិក។
ក្រសារជើងវែងរំលេចសម្រស់លើផ្ទៃបឹងដែលមមាញឹកចាប់ចំណីលើវាលកំប្លោក តែប្រជានេសាទប្រែជាខ្វល់ខ្វាយថា តើត្រូវត្រួសត្រាយរុក្ខជាតិទាំងនេះតាមរបៀបណា?
ប្រជានេសាទកេនយ៉ាជួបការលំបាកក្នុងការបំផ្លាស់ទីលើបឹងវិចតូរៀ។ AFP
លោក មូរីក អូម៉ុនឌី អាយុ ៤០ ឆ្នាំជាប្រធានសមាគមប្រជានេសាទ គីឈីនជីអូ នៅផ្នែកម្ខាងនៃឆ្នេរគីសូមូ និយាយថា៖ «បើយើងទៅនេសាទពេលនេះ យើងនឹងជាប់គាំងលើបឹងកំប្លោក។ អ្វីដែលយើងអាចធ្វើបានគឺរង់ចាំខ្យល់បក់វាចេញ។ កាលពីមុនយើងព្យាយាមពុះពារឆ្លងកាត់ចង្វាក់កំប្លោក តែវាពិតជាពិបាកខ្លាំង ហើយមានហានិភ័យខ្លាំងផងដែរ។ មានម្ដងនោះយើងត្រូវជិះឧទ្ធម្ភាគចក្រទៅសង្គ្រោះអ្នកនេសាទជាប់កំប្លោក»។
កំប្លោក រុក្ខជាតិអណ្ដែតលើផ្ទៃទឹកមានដើមកំណើតមកពីអាមេរិកខាងត្បូង ដែលបានក្លាយជាសត្រូវលើផ្ទៃទឹកសាបសកលដោយវាបានធ្វើដំណើរពាសពេញពិភពលោកដោយឯកឯង និងមានវត្ដមានលើបឹងវិចតូរៀ ដំបូងក្នុងទសវត្សរ៍ឆ្នាំ ១៩៩០។
តាំងពីពេលនោះវាធ្វើឲ្យប្រជានេសាទពិបាកបំផ្លាស់ទីលើបឹងដែលប៉ះពាល់សេដ្ឋកិច្ចអ្នកស្រុកទៀត។
ឆ្នាំ ២០១៣ ឧស្សាហកម្មនេសាទកេនយ៉ាលើបឹងវិចតូរៀ ហុចទិន្នផលត្រី ១៤ ម៉ឺនតោន ភាគច្រើនជាត្រីភើចយក្ស នុយស និងទីឡាព្យ៉ា។ តែឥឡូវអ្នកក្រចង់ទិញត្រីទីឡាព្យ៉ាចិនមានតម្លៃថោកជាង»៕ HR
