.jpg)
ស្នាដៃរបស់លោកត្រូវបានគ្រងដោយតារាហូលីវូដល្បីៗជាច្រើនរូប។ រូបថត AFP
ក្រុមរ៉ូម៖ រោមបក្សីរមែងរំលេចនូវសម្រស់ស្រស់ឆើតឆាយបន្ថែមចំពោះសម្លៀកបំពាក់បែបហ្វាសសិនតាំងពីបុរាណកាលមក ចាប់ពីម្ចាស់ក្សត្រី ម៉ារី អង់តូអ៊ីណែត រហូតដល់ ឡេឌី ហ្គាហ្គា ហើយបុរសអ៊ីតាលីវ័យខ្ទង់ ៨០ ឆ្នាំម្នាក់ នៅបន្ដប្រពៃណីដ៏ពេញនិយមនេះទៀត។
លោក ហ្គែននី ប្រាសស្យានី អាយុ ៨៩ ឆ្នាំ ដែលមកហាងរបស់លោករៀងរាល់ថ្ងៃនៅឃុំសាន់តូ ស្ដេហ្វាណូ ទីស៊ីណូ ចម្ងាយប្រមាណ ៣០ គីឡូម៉ែត្រ ភាគខាងលិចក្រុងមីឡាន និងមានបំណងបន្ដរំលេចនូវប្រពៃណីរោមបក្សីចម្រុះពណ៌ថែមទៀត។
លោកបាននិយាយថា៖ «រោមបក្សីជាចំណូលចិត្ដពិសេសរបស់ខ្ញុំ»។
លោក ប្រាសស្យានី មានបំណងចង់ចូលនិវត្ដន៍ក្រោយពីបំពេញការងារលើឧស្សាហកម្មហ្វាសសិនពេញមួយជីវិត ដែលលោកផ្ដោតលើរោមបក្សីជាចម្បង។ កំពូលអ្នកឌីហ្សាញអត់ខ្វល់ខ្វាយអ្វីផ្សេងក្រៅពីការច្នៃម៉ូដរោមបក្សីរូបនេះ បានប្រើប្រាស់ស្នាដៃច្នៃម៉ូដរបស់ខ្លួនជាមួយក្រុមហ៊ុនកំពូលៗក្នុងលោក និងគ្រងដោយតារាល្បីៗ ដូចជា អេនជេលីណា ជោលី, សេលីន ដាយអន, ណាអូមិ ខេមប៊េល និងចេន្នីហ្វ័រ ឡូប៉េស។
រោមបក្សីត្រូវបានច្នៃជាសម្លៀកបំពាក់ហ្វេសសិនដ៏ប្រណីតនៅអីុតាលី។ រូបថត AFP
រោមបក្សី គឺជាកិច្ចការជំនួញរបស់ដូនតាលោក ដែលធ្វើការរៀងរាល់ថ្ងៃជាមួយកូនស្រី អេម៉ានូអេឡា អាយុ ៥១ ឆ្នាំ និងបុគ្គលិក ៩ នាក់ទៀតនៅ «Bracciani Piume» ជាជំនួញដែលរកចំណូល ២,២ លានដុល្លារក្នុងការលក់ ១ ឆ្នាំៗ។
មុខជំនួញតាំងពីឆ្នាំ ១៨៨៣ ពេលជីតារបស់លោក ប្រាសស្យានី ចាប់ផ្ដើមនាំចូលសម្លៀកបំពាក់ប្រណីតៗពីក្រុងប៉ារីស រួចបន្ទាប់មក រោមបក្សីដែលលោកបានលក់ឲ្យអ្នកលក់មួកស្រីៗ អ្នកផលិតស្បែកជើង និងហាងកាត់សម្លៀកបំពាក់ទូទាំងអ៊ីតាលី។
នៅរោងសិប្បកម្មលោក ម៉ាស៊ីនបានត្បាញរោមបក្សីជាក្រណាត់ ដែលនឹងភ្ជាប់ជាមួយអាវក្រៅប្រណីតត្រៀមលក់នៅរុស្ស៊ី ជប៉ុន និងចិន។
បុរសអុីតាលីអាយុ ៨៩ ឆ្នាំ ឲ្យចំណីសត្វទា នៅផ្ទះរបស់លោកចម្ងាយ ៣០ គីឡូម៉ែត្រខាងលិចក្រុងមីឡាន។ រូបថត AFP
លោកបាននិយាយថា បញ្ហាសព្វថ្ងៃគឺលំបាកស្វែងរករោមបក្សីប្រកបដោយគុណភាព ខណៈកសិដ្ឋានរោងចក្រមានន័យថា បក្សីត្រូវបានសម្លាប់មុនពេលរោមរបស់វាលូតលាស់សមស្របអាយុកាលសម្រាប់បោច។ បក្សីប្រើពេលអភិវឌ្ឍរោមឲ្យល្អនៅរយៈពេល ២ ឆ្នាំ ខណៈសត្វអូទ្រីសត្រូវបានកាត់រោមពេលពួកវានៅរស់។
ក្នុងនាមជាអ្នកសិល្បៈ លោក ប្រាសស្យានី ក៏ជាអ្នកច្នៃបង្កើត ដោយបានឌីហ្សាញវត្ថុជាច្រើន ឬម៉ាស៊ីនកែច្នៃរោមបក្សី និងបានអភិវឌ្ឍការជ្រលក់ពណ៌ជាង ២ ០០០ ប្រភេទ ដោយសារតែរោមបក្សីទាំងអស់មិនសុទ្ធតែត្រូវជ្រលក់ពណ៌ដូចៗគ្នាឡើយ៕ AFP/HR
