.jpg)
ផ្ទាំងគំនូររូបស្រ្តីដ៏ស្រស់សោភាទម្រេតខ្លួន ដែលវិចិត្រករបានរំលេចនៅតាមជញ្ជាំងរបងផ្ទះ។ ហ្វេសប៊ុក
ភ្នំពេញៈ រយៈពេល ២ ឆ្នាំ ក្រោយពីបង្កើតវិចិត្រសាលឈ្មោះ Kbach Gallery មក ក៏ជំរុញឲ្យម្ចាស់វិចិត្រសាល រៀបចំការប្រកួតប្រជែងទេពកោសល្យគំនូរលើកដំបូងនៅកម្ពុជា ឬ Kbach Artist Competition Launch 2018 ដោយការចាប់ផ្តើមបើកសម្ពោធ និងទទួលបេក្ខភាពវិចិត្រករចូលរួមប្រកួតនៅថ្ងៃទី ២៦ ខែឧសភា ឆ្នាំ ២០១៨ នេះតទៅ។
តូនី ហ្រ្វង់ស៊ីស (Tony Francis) ដែលជាម្ចាស់វិចិត្រសាល Kbach Gallery បង្ហើបឲ្យដឹងពីគោលបំណងនៃការរៀបចំការប្រកួតប្រជែងទេពកោសល្យគំនូរជាលើកទី ១ នេះថា៖ «នាថ្ងៃទី ២៦ ខែ ឧសភា ឆ្នាំ ២០១៨ គឺជាការបង្កើតនូវពន្លកនៃក្រុមសិល្បករ ខ្មែរតាមរយៈការប្រកួតប្រជែង លើទេពកោសល្យមួយ ដែលត្រូវរចនាឡើងដើម្បីអនុវត្តតាមវិចិត្រសាល ដែលជាការកំណត់អត្តសញ្ញាណនៃគំនូរ ការគាំទ្រ និងការលើកស្ទួយទៅដល់ក្រុមវិចិត្រករបែបនៅទីក្រុង។ ការប្រកួតប្រជែងនេះនឹងអញ្ជើញក្រុមវិចិត្រករខ្មែរឲ្យចូលរួមរហូតទៅដល់ចំនួន ១០០ រូប ហើយពួកគេនឹងទទួលបានផ្ទាំងក្រណាត់ម្នាក់មួយផ្ទាំង សម្រាប់គូររូបដោយឥតគិតថ្លៃផងដែរពីកម្មវិធីសម្ពោធ»។
ម្ចាស់វិចិត្រសាល Kbach Gallery បន្តថា៖ «ចំពោះការទទួលបេក្ខភាពវិចិត្រករ និងការប្រគល់ផ្ទាំងក្រណាត់គូររូបដើម្បីចូលរួមនោះ នឹងបន្តរហូតដល់ចុងខែកញ្ញា ឆ្នាំ ២០១៨ ឯណោះ។ ក្រោយពីទទួលបានបេក្ខភាពគ្រប់ចំនួនហើយ នឹងប្រកួតជម្រុះយកបេក្ខភាពត្រឹមតែ ១០ រូប តែប៉ុណ្ណោះ ដើម្បីបន្តយកទៅប្រកួតវគ្គផ្តាច់ព្រ័ត្រខែធ្នូ ឆ្នាំ ២០១៨ ខាងមុខ»។
ក្រុមក្មេងៗកំពុងផ្ចង់អារម្មណ៍មើលវិចិត្រករគូរគំនូរនៅតាមជញ្ជាំង ដែលក្បូរក្បាច់យ៉ាងល្អ។ ហ្វេសប៊ុក
កម្មវិធីប្រកួតប្រជែងទេព-កោសល្យគំនូរ ដែលទទួលយកបេក្ខភាពវិចិត្រករ ១០០ រូប ដែលបង្កើតឡើងក្នុងគោលបំណងលើកស្ទួយពីតម្លៃស្នាដៃរបស់វិចិត្រករ និងបន្ថែមឲ្យមានការងារផ្នែកសិល្បៈគំនូរកាន់តែសម្បូរបែបដល់ក្រុមវិចិត្រករជាម្ចាស់ជយលាភី ចុងក្រោយចំនួន ៣ រូបផងដែរ។
លោកតូនី ហ្រ្វង់ស៊ីស បន្ថែមឲ្យដឹងថា៖ «លើសពីនេះវិចិត្រករជយលាភីចំនួន ៣ រូប ដែលនឹងត្រូវបានយើងរកឃើញនាពេលប្រកួតវគ្គផ្តាច់ព្រ័ត្រនៅខែធ្នូព្រមទាំងបានរង្វាន់លើកទឹកចិត្តជាប្រាក់សុទ្ធទៀតផង ខណៈប្រាក់រង្វាន់បានចំនួន ១០០០ ដុល្លារ។ មិនតែប៉ុណ្ណោះយើង នឹងចុះកិច្ចសន្យាផ្តល់ការងាររយៈពេល ១ ឆ្នាំ សម្រាប់បេក្ខជនជយលាភីទៀតផងនៅវិចិត្រសាលរបស់យើង ខណៈស្នាដៃរបស់ពួកគេ នឹងត្រូវយកទៅដាក់តាំងនៅវិចិត្រសាល Kbach Gallery។
ខណៈបណ្តុំស្នាដៃរបស់បេក្ខ-ជនដែលចូលរួមចំនួន ១០០ រូបនោះនឹងត្រូវយកដាក់តាំងនៅឯទីតាំងពិព័រណ៍ Factory Phnom Penh ដែលមានទីតាំងស្ថិតនៅលើអគារលេខ ១១៥៩ នៃផ្លូវជាតិលេខ ២។ ដោយឡែក ការប្រកួតប្រជែងទេពកោសល្យគំនូរនេះ នឹងបន្តធ្វើជារៀងរាល់ឆ្នាំទៀតផងដែរ»។
សម្រាប់ព័ត៌មានលម្អិតពីកម្មវិធីប្រកួតប្រជែងទេពកោសល្យរបស់ Kbach Artist Competition Launch 2018 អាចចូលទៅកាន់គេហទំព័រ របស់វិចិត្រសាល https://www.facebook.com/KBachGallery/ ៕
