ភ្នំពេញៈ ថ្មីៗនេះស្រាប់តែគេឃើញតារាសម្តែង និងម៉ូដែល ដែលទើបអភិវឌ្ឍខ្លួនឲ្យក្លាយជាតារាចម្រៀងអូរីជីណល ស្រីស្រស់សោភា សាច់សខ្ចីល្វក់ឈ្មោះពិតថា ជុំ រចនាពេជ្រ ហៅកញ្ញា បេប៊ី បានប្រកាសលក់ផ្ទះមួយនៅម្តុំពោធិចិនតុង បង្កការងឿងឆ្ងល់ពីមហាជនសាជាថ្មី។
រំពេចនោះ ក៏មានមតិមហាជនបានលើកឡើងថា៖ «ចាប់តាំងពីក្លាយជាតារាចម្រៀងអូរីជីណល និងបានឈានជើងចូលមកប្រឡូកវិស័យសិល្បៈជាង ២ ឆ្នាំ តារាម៉ូដែល និង សម្តែងស្រីរូបស្រស់សោភា បេប៊ី កំពុងតែពង្រាយមន្តស្នេហ៍ និងស្រូបបានទីផ្សារលើវិថីសិល្បៈច្រើនស្អេកស្កះទៅហើយនោះ ហេតុអ្វីនាងឆ្លៀតបើករបរបន្ថែមទៀត? ឬមួយនាងត្រូវការប្រាក់បន្ទាន់ដោយសារតែតម្រូវការរបស់គ្រួសារទេដឹង?»។
តារាម៉ូដែល និង សម្តែងស្រស់សោភា សាច់ខ្ចីល្វក់ កញ្ញា បេប៊ីដែលកំពុងតែមាន រាសីឡើងខ្លាំង កាក់កបទាំងអាជីពជាពិធីការិនី និង ក្លាយជាតារាចម្រៀង-អូរីជីណល ជាការពង្រីកទីផ្សារសិល្បៈកាន់តែធំទូលាយអាចកើបលុយបានកាន់តែច្រើន។ ខណៈពិធីការិនីប៉ុស្តិ៍ CTN ដែលមានហុងស៊ុយលើវិថីសិល្បៈ និងទើបតែបង្ហាញពីភាពមានបាន និងការហ៊ឺហាជិះរថយន្តទំនើបម៉ាក Range Rover តម្លៃជាង ៥ ម៉ឺនដុល្លារ ហើយក៏ល្បីថា ទើបទិញផ្ទះវីឡាដែលមានតម្លៃជាង ២០ ម៉ឺនដុល្លារផងដែរនោះ។
កញ្ញា បេប៊ី ក៏បង្ហើបប្រាប់ភ្នំពេញប៉ុស្តិ៍ឲ្យដឹងពីមូលហេតុនៃការប្រកាសលក់ផ្ទះនាងថា៖ «ព្រោះតែចង់យកប្រាក់ទៅបង្កើតជាមុខរបរក្រៅសិល្បៈតែប៉ុណ្ណោះ។ មិនមានកើតបញ្ហា ឬជាវិបត្តិគ្រួសារអ្វីនោះទេ។ ម្យ៉ាងទៀតការបង្កើតមុខរបរក្រៅពីសិល្បៈនេះ ក៏ជារឿងមួយល្អ សម្រាប់ខ្លួនឯងផងដែរ ពេលអស់ពីសិល្បៈ»។
យ៉ាងណាការបង្កើតមុខរបរអ្វី ក៏ស្រីស្រស់សោភា សាច់សខ្ចីល្វក់ កញ្ញា បេប៊ី ហាក់មិនទាន់បង្ហើបឲ្យដឹងថា នឹងបើកមុខរបរអ្វីនៅឡើយនោះទេ។ ខណៈនាងគ្រាន់តែបន្តឲ្យដឹងពីទីតាំង និងតម្លៃផ្ទះដែលបានប្រកាសលក់នោះថា៖ «ផ្ទះនោះ នៅម្តុំពោធិចិនតុង តម្លៃលក់គឺ ៧២ ០០០ ដុល្លារ ដែលជាតម្លៃអាចចរចាគ្នាបាន។ ហើយប្រសិនបើចង់ដឹងព័ត៌មានលម្អិតពីផ្ទះនោះគឺអាចទាក់ទងមកកាន់ទូរស័ព្ទដែលបានដាក់ទាំង ២ ខ្សែ នៅតាមហ្វេសប៊ុករបស់នាងខ្ញុំបានឈ្មោះថា Ah Be Angellas បានដែរ»៕