ក្រុងបាងកក: ការិយាល័យនគរបាលទូទាំងប្រទេសថៃបានបញ្ជូនមន្ដ្រីសម្បូរខ្លាញ់បំផុតរបស់ខ្លួនទៅកាន់ជំរំហ្វឹកហ្វឺនសម្រកទម្ងន់ជាផ្នែកមួយនៃកម្មវិធីដែលហៅថា «ការកម្ចាត់ខ្លាញ់ក្បាលពោះ»។
យោងតាមវេបសាយ WorldofBuzz ក្រោយពីទទួលជោគជ័យក្នុងយុទ្ធនាការ ២ សប្ដាហ៍មន្ដ្រីនគរបាលធាត់ៗត្រូវបានបញ្ជូនទៅកាន់មជ្ឈមណ្ឌលហ្វឹកហ្វឺននគរបាលក្នុងទីក្រុង ផាកឆុង ដើម្បីហ្វឹកហ្វឺនសម្រកក្បាលពោះ។ ការិយាល័យនីមួយៗមានមន្ដ្រីធាត់លើសទម្ងន់ពី ២ ទៅ ៣ នាក់ទៅកាន់មជ្ឈមណ្ឌលជាទីដែលពួកគេត្រូវហាត់ប្រាណ ជិះកង់ និងធ្វើសកម្មភាពចម្រើនសុខភាពទទួលទានអាហារសម្បូរប្រូតេអ៊ីន ដើម្បីទប់ស្កាត់ការឡើងទម្ងន់ខ្លួន។ កម្មវិធីកម្ចាត់ខ្លាញ់ក្បាលពោះចាប់ផ្ដើមទទួលបានចំណាប់អារម្មណ៍ក្រោយពីរូបថតមន្ដ្រីធាត់ៗចូលរួមលំហាត់ប្រាណប្រចាំថ្ងៃត្រូវបានបង្ហោះពេញអនឡាញ។
ពលបាលត្រី សនផេត ចាន់តារ៉ាក ជាអ្នកអនុវត្ដលើរបបអាហារក្នុងកម្មវិធីថ្មីនេះបានថ្លែងថា៖ «មានបញ្ហាច្រើនណាស់ បើអស់លោកជាប៉ូលិសធាត់។ អស់លោកធ្វើការងារយឺត និងរត់ស្ពឹក។ មិនអាចទទួលយកបានទេ បើអស់លោកបំពេញកិច្ចការចាប់ឧក្រិដ្ឋជន ដោយសារតែអស់លោកត្រូវតែរហ័សរហួន»។
មន្ដ្រីនគរបាលថៃប្រមាណ ២០០ នាក់បានចូលរួមក្នុងយុទ្ធនាការកម្ចាត់ខ្លាញ់ក្បាលពោះ ហើយលទ្ធផលបានលើកទឹកចិត្ដឲ្យអាជ្ញាធរបន្ដអនុវត្ដកម្មវិធីទៅមុខទៀត។ យោងតាមរបាយការណ៍មួយ នគរបាលទម្ងន់រហូតដល់ ២០០ គីឡូក្រាមអាចសម្រកទម្ងន់បាន ៦០ គីឡូក្រាម ខណៈអ្នកទម្ងន់ត្រឹម ៨០ អាចសម្រកបាន ២០ គីឡូក្រាម៕ HR