ក្រុងអាសហ្គាបាត: លោកប្រធានាធិបតី តួកម៉េនីស្ថាន ហ្គឺបាងហ្គូលី បែឌីមូខាមេដូវ (Gurbanguly Berdymukhamedov) ដែលល្បីល្បាញចំពោះជំនាញជិះសេះ ប្រណាំងរថយន្ត តន្ត្រី និងការសរសេរតែងនិពន្ធដ៏ប៉ិនប្រសប់ កាលពីថ្ងៃពុធ លោកបានបង្ហាញខ្លួនលើកញ្ចក់ទូរទស្សន៍ដោយបានចូលរួមច្រៀងបទចម្រៀងចង្វាក់រ៉េប និងលេងជល់កណ្ដាប់ដៃជាមួយចៅប្រុសវ័យជំទង់របស់លោក។
ជីតា និងចៅប្រុស ដែលគ្រងឈុតកីឡា បានច្រៀងចម្រៀងមួយបទ ដែលពួកគេបានសរសេរកោតសរសើរពីវិស័យកីឡា សម្រស់ធម្មតាប្រទេសវាលខ្សាច់ ដែលមានប្រជាជន ៥ លាននាក់ ហើយរីសតឆ្នេរដ៏ធំរបស់ខ្លួន អាវ៉ាហ្សា លើបឹងយក្ស Caspian Sea។
ការសម្ដែងរបស់លោកប្រធានាធិបតីដ៏មានឥទ្ធិពលនៃប្រទេសអតីតចំណុះសហភាពសូវៀត និងចៅប្រុសសំណព្វ កេរីមហ្គូលី ត្រូវបានចាក់បញ្ចាំងលើកញ្ចក់ទូរទស្សន៍រដ្ឋ Altyn Asyr។
ដំបូង លោកប្រធានាធិបតី រំលេចពាក្យពេចន៍ឃ្លោងឃ្លាចុងចួនជាភាសាតួកម៉េនីស្ថាន មុនពេលចៅប្រុស កេរីមហ្គូលី បន្ថែមសំនៀងរ៉េបជាភាសាអង់គ្លេសជាប់រន្ថើន។
យុវជនរូបនេះ បានច្រៀងឡើងថា៖ «ជីវិតពិតជាអស្ចារ្យក្នុងដែនដីកំណើតរបស់ខ្ញុំ ឱ! តួកម៉េនីស្ថាន ដ៏ស្រស់បំព្រងរបស់ខ្ញុំ»។
អ្នកទាំងពីរក្រោយមកបានលេងជុលកណ្ដាប់ដៃ និងលេងស្ទីលជាតារារ៉េបទាន់សម័យ។
សាច់ញាតិរបស់លោកប្រធានាធិបតី កម្របង្ហាញមុខលើកញ្ចក់ទូរទស្សន៍ណាស់ ទោះកូនប្រុសរបស់លោក ហ្គឺបាងហ្គូលី បែឌីមូខាមេដូវ ឈ្មោះ ស៊ើដារ បម្រើការជាមេធាវី និងជាអនុរដ្ឋមន្ដ្រីការបរទេសយ៉ាងណាក្ដី។
យុវជន កេរីមហ្គូលី អាយុចន្លោះពី ១៣ ទៅ ១៤ ឆ្នាំ ដែលជាកូនប្រុសរបស់កូនស្រីលោកប្រធានាធិបតី គឺជាបុគ្គលពិសេស។
បណ្ដាញផ្សព្វផ្សាយរដ្ឋដ៏រឹតត្បិតនេះ ធ្លាប់បានបង្ហាញសកម្មភាពលោកច្រៀងចម្រៀងជាច្រើនបទជាមួយជីតារបស់លោក ព្រមទាំងធ្លាប់ចូលរួមប្រកួត និងឈ្នះការប្រកួតសេះជាច្រើនដងផងដែរ៕ AFP/HR