ក្រុងសៀមរាបៈ កាលពីមុនឆ្នាំ ២០១៤ ដោយសារភាពតានតឹង និងធុញថប់នឹងការងារនានាដែលធ្លាប់ធ្វើដូចជា អ្នករត់តុក្នុងភោជនីយដ្ឋាន ជាគណនេយ្យករ និងអ្នកគ្រប់គ្រងគេ ហើយក៏ចាប់ផ្តើមឆ្លៀតពេលធ្វើជាគ្រូបង្រៀនសិល្បៈគំនូរបណ្តើរៗមក និងមានជំនក់ចិត្តខ្លាំងបន្តការងារផ្នែកនេះរហូតដល់ក្លាយជាអ្នកគ្រប់គ្រងគម្រោងម្នាក់នៅអង្គការពន្លឺធម្មជាតិនៃកម្ពុជា នៅក្នុងខេត្តសៀមរាប។
វិចិត្រករ សរ សុផានី វ័យ ៣០ ឆ្នាំ ក៏មានប្អូនស្រីកូនភ្លោះជាសិល្បការិនីចម្លាក់ម្នាក់ដែរឈ្មោះ សរ សុផានីន មានឪពុកម្តាយគឺជាកសិករកំពុងតែរស់នៅខេត្តសៀមរាប និងបងប្រុស ២ នាក់។ សុផានី និង សុផានីន ដែលជាកូនភ្លោះស្រី មានចំណូលចិត្តដូចគ្នាសឹងតែ ៩០ ភាគរយឯណោះ បើតាមការអះអាងប្រាប់ពីវិចិត្រករស្រី សរ សុផានី។ កញ្ញា សរ សុផានី ដែលបានបញ្ចប់ការសិក្សាថ្នាក់បរិញ្ញាបត្រផ្នែកធនាគារ និងហិរញ្ញវត្ថុពីសាកលវិទ្យាល័យបៀលប្រាយ និងបានរៀនសិល្បៈគំនូរចន្លោះពីឆ្នាំ ២០០៩-២០១៤ នៅអង្គការពន្លឺធម្មជាតិនៃកម្ពុជា (Colors of Cambodia) និងបច្ចុប្បន្នក្លាយជាអ្នកគ្រប់គ្រងផ្នែកគម្រោងលើជំនាញវិចិត្រកម្មសហសម័យ។
វិចិត្រករស្រីដែលចូលចិត្តទាំងគំនូរ និងក្បាច់គុនល្បុក្កតោខ្មែរ សរ សុផានី ប្រាប់ឲ្យដឹងថា៖ «ពេលអ្នកគ្រប់គ្រងគម្រោងចាស់នៅអង្គការនេះគឺលោក ស៊ិន រឿង បានឈប់ និងដោយសារមានការជំរុញពីក្រុមគ្រូៗនៅសាលាសិល្បៈផងនោះ នាងខ្ញុំក៏បានដាក់ពាក្យចូលបម្រើការងារជំនួសតំណែងនោះនៅឆ្នាំ ២០១៤ និងបន្តរហូតដល់សព្វថ្ងៃ។ ឯការហាត់គុនល្បុក្កតោវិញខ្ញុំឆ្លៀតហាត់តាំងពីឆ្នាំ ២០១៥ មករហូតដល់ឥឡូវ ទទួលបានក្រមាពណ៌ត្នោតហើយដែរ។ ខ្ញុំទៅហាត់ជារៀងរាល់ចុងសប្តាហ៍ ១ ថ្ងៃ ២ ម៉ោង»។
វិចិត្រករស្រី សរ សុផានី ក៏បង្ហើបពីរឿងចាប់យកអាជីពនេះដែរថា៖ «ជាងគំនូរនៅស្រុកខ្មែរត្រូវគេគិតថា ជាមុខរបរមិនអាចរកប្រាក់ចំណូលបានច្រើនទេ ទោះបីជាជំនាញសិល្បៈមួយត្រូវបានគេបញ្ចូលនៅក្នុងកម្មវិធីសិក្សាក្តី ហើយសូម្បីតែសិស្សក៏មិនចាប់អារម្មណ៍រៀនដែរ។
ដោយសារតែចង់ឲ្យមានការផ្លាស់ប្តូរវិស័យនេះ ជាពិសេសគឺផ្នត់គំនិតរបស់ស្ត្រីខ្មែរឲ្យចេះយល់ពីរបត់ថ្មីនៃការចាប់យកការងារណាមួយដែលខ្លួនស្រឡាញ់ ហើយចាប់ផ្តើមចេញពីយើងខ្លួនឯង និងធ្វើតាមសមត្ថភាព។ ចាប់តាំងពីខ្ញុំក្លាយជាគ្រូបង្រៀនគំនូរមក រឹតតែធ្វើឲ្យនាងខ្ញុំរីករាយចូលចិត្តវិស័យនេះកាន់តែខ្លាំង និងចង់បង្កើតអ្វីឲ្យមានភាពលេចធ្លោក្នុងសង្គម និងចង់ឲ្យគេផ្តល់តម្លៃផងដែរ សម្រាប់អាជីពវិចិត្រករនេះ»។
វិចិត្រករស្រីរូបនេះបានបន្ថែមថា៖ «នាងខ្ញុំចូលគូរគំនូរសហសម័យដែលមានភ្ជាប់ន័យវត្ថុអ្វីមួយ និងទង្វើប្រចាំថ្ងៃរបស់មនុស្សយើង។ រឿងទាំងនោះមានដូចជាបញ្ហាហិង្សា រឿងប៉ូលិសផាកពិន័យប្រជាជន និងរបរចិញ្ចឹមជីវិតរស់នៅប្រចាំថ្ងៃជាដើម ដែលកើតចេញពីការស្រមើលស្រមៃ និងការចងចាំមកច្របាច់បញ្ចូលគ្នា។ ឯហេតុយើងខ្ញុំហាត់គុននោះមាន ៣ ចំណុចសំខាន់ៗ ទី ១ ដោយសារតែយើងខ្ញុំជាមនុស្សស្រី ទី ២ យើងខ្ញុំគឺជាខ្មែរ និងទី ៣ យើងចង់បង្ហាញពីក្តីស្រឡាញ់ខ្លួនឯងក្នុងនាមជាស្ត្រីខ្មែរដែលមិនចង់ឮពាក្យជាច្រើនដែលគិតថា ស្ត្រីមានភាពទន់ខ្សោយក្នុងសង្គមនោះបន្តទៀតឡើយ»។
កញ្ញា សរ សុផានី បច្ចុប្បន្នគឺជាគ្រូបង្រៀនផ្នែកគំនូរ និងជាអ្នកគ្រប់គ្រងគម្រោងរបស់អង្គការពន្លឺធម្មជាតិនៃកម្ពុជា។ ខណៈប្អូនស្រីភ្លោះកញ្ញា សរ សុផានីន ធ្លាប់ជាអ្នកគ្រប់គ្រងសិល្បៈចម្លាក់ថ្មចាប់ពីឆ្នាំ ២០១៥ ដល់ខែមិថុនា ឆ្នាំ ២០១៩ នេះ តែបច្ចុប្បន្ននាងបានដូរការងារទៅជាអ្នកជំនួញ និងជួយមើលការខុសត្រូវផ្នែកជំនួញបងប្រុសរបស់នាងវិញម្តង៕