.jpg)
អតិថិជនកុម្ម៉ង់ស្វាយដឹកដោយកំពូលរថយន្ត ត្រូវរង់ចាំ ១ សប្ដាហ៍។ រូបថត AFP
ក្រុងឌូបៃ៖ ហានហ្សេប យ៉ាស៊ីន ជាអ្នកគ្រប់គ្រងផ្សារទំនើបប៉ាគីស្ថានឌូបៃ បានអង្គុយក្នុងរថយន្ដស្ព័រ Lamborghini Huracan ចតនៅក្រៅផ្សារទំនើបមុនពេលដឹកជញ្ជូនស្វាយក្នុងប្រទេសឈូងសមុទ្រពែរ្ស៍មួយនេះ។
លោក យ៉ាស៊ីន បានបើកយុទ្ធនាការផ្សព្វផ្សាយសារនៃសេចក្ដីស្រឡាញ់ក្នុងតំបន់ឈូងសមុទ្រ ដោយការជិះក្នុងកំពូលរថយន្ដពេលដឹកជញ្ជូនទំនិញស្មើនឹងទឹកប្រាក់ ១០០ ឌីហាម (២៧ ដុល្លារ) សម្រាប់ស្វាយប៉ាគីស្ថានជាងកន្លះឡូ។
ស្វាយប៉ាគីស្ថានពេញនិយមខ្លាំងទូទាំងពិភពលោក ហើយផ្លែឈើចម្រុះប្លែកៗមិនចាំបាច់មានយុទ្ធនាការផ្សព្វផ្សាយទាក់ទាញអតិថិជនអ្វីឡើយ។ យ៉ាងណាមិញ «ស្វាយក្នុងកំពូលរថយន្ដ Lamborghini» ដឹកជញ្ជូនដោយផ្សារទំនើបប៉ាគីស្ថានបានបង្កការភ្ញាក់ផ្អើលក្នុងទីក្រុងឌូបៃ និងបានបង្កើនការលក់ទ្វេដងតាំងពីដំណើរការពាក់កណ្ដាលខែមិថុនា។
លោក យ៉ាស៊ីន បានប្រាប់ Khaleej Times ថា៖ «គ្មានការផ្សព្វផ្សាយពាណិជ្ជកម្មជុំវិញយុទ្ធនាការនេះឡើយ។ ខ្ញុំចង់ផ្សព្វផ្សាយសារនៃសុភមង្គល និងសេចក្ដីស្រឡាញ់ ហើយការឆ្លើយតបពិតជាមានច្រើន»។
លោកបាននិយាយថា ការលក់ស្វាយបានកើនឡើងជាង ១០០ ភាគរយ ហើយអតិថិជនភាគច្រើនបានចុះឈ្មោះក្នុងកម្មវិធី «ស្វាយក្នុងកំពូលរថយន្ដ Lamborghini» ដោយត្រូវរង់ចាំយ៉ាងតិច ១ សប្ដាហ៍។
លោក យ៉ានស៊ីន ដឹកជញ្ជូនស្វាយដោយប្រើ Lamborghini។ រូបថត AFP
លោកបានបន្ថែមថា សេវាកម្មដឹកជញ្ជូនតាមរថយន្ដវ៉ែនធម្មតាក៏នៅតែដំណើរការ តែអតិថិជនចង់ទទួលការកុម្ម៉ង់តាមកំពូលរថយន្ដស្ព័រវិញ។
លោកបានឲ្យដឹងថា៖ «យើងធ្លាប់លក់ស្វាយ ៤០ ប្រអប់រៀងរាល់ថ្ងៃ មុនពេលបើកយុទ្ធនាការ។ ពេលនេះយើងបានបង្កើនការលក់ដល់ ៩៥ ប្រអប់ នូវប្រភេទស្វាយផ្សេងៗ។
ប្រជាប្រិយភាពនៃសេវាកម្មផ្សព្វផ្សាយនេះ ត្រូវបាន លោក យ៉ាស៊ីន ឲ្យដឹងថា លោកបាន និងកំពុងដឹកជញ្ជូនស្វាយ ១២ ជើងក្នុង ១ សប្ដាហ៍ដោយប្រើរថយន្ដ Lamborghini។
លោកបានអះអាងថា៖ «យុទ្ធនាការនេះបានទទួលប្រជាប្រិយភាពតាំងពីវីដេអូដឹកជញ្ជូនស្វាយតាម Lamborghini ទៅកាន់អតិថិជនជាច្រើន និងលក់ដាច់ខ្លាំង»៕ AFP/HR
