.jpg)
ភ្នំពេញៈ ក្នុងជីវិតនេះគ្មានអ្វីស្ថិតស្ថេរទេ ធំក៏អាចក្លាយជាតូច មានក៏អាចក្លាយជាក្រ រឹងមាំក៏អាចប្រែជាទ្រុឌទ្រោម។ គ្មាននរណារស់បានអមតៈនោះទេ ដូច្នេះត្រូវតែចាំទុកថា «កុំភ្លេចខ្លួន កុំឈ្លក់វង្វេង ខ្លួនឯង» ហើយរឹតតែសំខាន់ គឺហាមប្រមាថជាមួយជីវិតតទៅទៀត។ បើទោះបីមិនទំនេរយ៉ាងណាក៏ត្រូវមើលថែខ្លួនឯងឲ្យល្អ។
កុំគិតថាយើងរឹងមាំ គ្មានថ្ងៃឈឺថ្កាត់ដោយសារអាយុនៅតិចត្បិតរណ្ដៅបញ្ចុះសពមិនមែនមានសម្រាប់តែមនុស្សចាស់នោះទេ ប៉ុន្តែគឺសម្រាប់មនុស្សស្លាប់ទូទៅ។ កុំគិតថាខ្ញុំមានហើយចាយលុយដូចជាក្រដាសព្រោះថាថ្ងៃណាមួយលុយតែ ១ ម៉ឺនរៀលអាចមានតម្លៃខ្លាំងណាស់នៅពេលអ្នកធ្លាក់ខ្លួនមែនទែន។
បើតាមការបរិយាយពីគេហទំព័រ ៥០០០ ឆ្នាំបានឲ្យដឹងពីប្រការ ៧ យ៉ាងដែលមនុស្សទូទៅ គប្បីតោងយកការគួរពិចារណា។ ខណៈប្រការទាំងនោះត្រូវបានបកស្រាយដូច្នេះថា៖ «ប្រការទី ១ គឺមានរឿង ៣ យ៉ាងដែលមនុស្សគួរបំភ្លេចគឺរឿងអាយុ រឿងដែលកន្លងហួស និងរឿងដែលនាំទុក្ខដល់អ្នកដទៃ។ ប្រការទី ២ មានចំណុច ៤ យ៉ាងត្រូវមានគឺត្រូវមានមនុស្សដែលស្រឡាញ់ដោយចិត្ត មានមិត្តដែលយល់ចិត្តមានការងារធ្វើ និងមានផ្ទះសំបែងសមរម្យ។ ចំណែកប្រការទី ៣ ចំណុច ៦ យ៉ាងដែលមិនគួរធ្វើគឺឃ្លានហើយតែមិនញ៉ាំ ស្រេកទឹកតែមិនផឹក ងងុយហើយតែមិនព្រមគេង ហត់ហើយមិនព្រមទៅសម្រាក ឈឺហើយតែមិនព្យាបាល និងចាស់ហើយទើបបានស្តាយក្រោយ។ ចំពោះប្រការទី ៤ មានចំណុច ៧ យ៉ាងដែលមានតម្លៃខ្ពង់ខ្ពស់ជាងលុយគឺការដែលបានកើតជាមនុស្ស ការបានយល់ពីសាសនា ការមានកល្យាណមិត្តល្អ ការមានភាពសុចរិតជានិស្ស័យ ការមានចិត្តមិនឫស្យា ការមានពេលវេលាសម្រាប់មនុស្សជាទីស្រឡាញ់ និងការដែលចេះស្គាល់ពាក្យមួយថា «គ្រប់គ្រាន់»។
រីឯប្រការទី ៥ ទី ៦ និងទី ៧ នៃប្រការគួរពិចារណានោះក៏បានបកស្រាយឲ្យដឹងបន្ថែមដែរថា៖ «ប្រការទី ៥ ចំណុច ២ យ៉ាងមានតម្លៃមិនអាចកាត់ថ្លៃបានគឺសុខភាពផ្លូវកាយ និងសុខភាពផ្លូវចិត្ត។ ប្រការទី ៦ មនុស្សមានទុក្ខ ៣ យ៉ាងគឺលះបង់មិនបានចាញ់គេមិនបាន និងលែងអ្វីមួយមិនបានទេ។ ខណៈប្រការទី ៧ នោះគឺសំដៅទៅលើមនុស្សដែលមានទ្រព្យសម្បត្តិ មានទ្រព្យសម្បត្តិមានតម្លៃ ៦ យ៉ាងគឺមានរាងកាយ មានចំណេះដឹង មានក្តីស្រមៃ មានទស្សនគតិ ភាពជឿជាក់ និងភាពក្លាហាន»៕
