.jpg)
សកម្មភាព តារាសម្ដែងកញ្ញា ពេជ្រ ចរណៃ ថតខ្សែភាពយន្តថ្មីនៅភ្នំប្រសិទ្ធិ៍។ ហ្វេសប៊ុក
ភ្នំពេញៈ ក្រោយឆ្លងកាត់ដំណាក់កាលស្ទើរអស់ជីវិតលើគ្រែពេទ្យ តារាសម្តែងថ្ពាល់ខួច កញ្ញា ពេជ្រ ចរណៃ ដែលអាស្រ័យសទ្ធាសប្បុរសជន បានថវិកាវះកាត់ជំងឺបេះដូងប្រហោងបានជោគជ័យអស់រយៈពេលច្រើនខែមក ពេលនេះស្រីស្រស់ចេះក្បាច់គុនល្បុក្កតោដ៏ចំណាប់ បានសង្វាតក្ដាប់បានឱកាសថតកុនបាន ៣ រឿងជាប់ៗគ្នា។ ក្នុងចំណោមខ្សែភាពយន្តទាំង ៣ រឿងនោះដែរ ពេជ្រ ចរណៃ បានគ្រងតំណែងជាតួឯកបាន ២ រឿង ប៉ុន្តែនាងនៅតែត្អូញត្អែរខ្លាចរកលុយមិនទាន់ទៅព្យាបាលជំងឺបន្តទៀត ព្រោះសុខភាពរាងកាយមិនទាន់ជាសះស្បើយមួយរយភាគរយនៅឡើយទេ។
នរណាក៏ដឹងដែរថា តារាសម្តែងតួក្បាច់គុនល្បុក្កតោ កញ្ញា ពេជ្រ ចរណៃ មុននេះគឺស្ថិតក្នុងភាពអស់សង្ឃឹម ខណៈប្រាណដ៏ក្មេងខ្ចីក៏ញាំញីដោយជំងឺដាច់សរសៃប្រឹសបេះដូង និងភាពទីទាល់ក្រ ក៏ស្ថិតនៅលើមាត់ជ្រោះមរណៈ។
ប៉ុន្តែទន្ទឹមនឹងភាពអស់សង្ឃឹម នាងក៏ត្រូវបានជួយសង្គ្រោះភ្លាមៗ ពីអតីតតារាសម្តែងជើងចាស់លោក ខៃ ប្រសិទ្ធ ដោយលោកបានចាយលុយអស់ជិត ២ ម៉ឺនដុល្លារ ដើម្បីទិញជីវិតកញ្ញា ពេជ្រ ចរណៃ ពីមច្ចុរាជមកវិញ។
ក្រៅពីសស្រាក់សស្រាំនឹងអាជីពសម្ដែង និងសកម្មភាពមនុស្សធម៌ចុះជួយជនទុរគត តារាស្រីសម្តីផ្អែមរូបនេះ ក៏មានភាគហ៊ុន ៣០ ភាគរយ ក្នុងអាជីវកម្មលក់ដីឡូត៍យីហោ «មហាលាភ អចលនទ្រព្យ» ទៀតផង។
ចំពោះការងារសិល្បៈឃើញថា កញ្ញា ពេជ្រ ចរណៃ ទទួលបានការគាំទ្រ ហើយមានប្រជាប្រិយភាពគួរឲ្យកត់សម្គាល់។
ទោះជាទីផ្សារសិល្បៈកាក់កបមិនដាច់ក៏ដោយក្ដី ក៏តារាស្រីរូបស្រស់អភ័ព្វសាវតារជាកូនកំព្រារូបនេះ បានបរិយាយប្រាប់ ភ្នំពេញ ប៉ុស្ដិ៍ ឲ្យដឹងថា៖ «រាល់ថ្ងៃខ្ញុំកំពុងតែថតរឿង «បេះដូងតែមួយ» ក្រោយពីបានបញ្ចប់រឿង «អាគមស្បែកដាច» ហើយក៏នឹងបន្តថតរឿងថ្មីមួយទៀតដែរតែសុំលាក់ចំណងជើងសិន ព្រោះរឿង-នេះដែរនៅមិនទាន់បានធ្វើក្រុងពាលីទេ តែនឹងធ្វើនៅចុងខែវិច្ឆិកា និងដើមខែធ្នូខាងមុខនេះហើយ»។
ក្នុងរឿងនេះដែរ ចរណៃ គ្រាន់តែប្រាប់ថា៖ «រឿងនេះមុនដំបូងខ្ញុំដើរតួជាអ្នករបាំទេ ប៉ុន្តែក្រោយមកខ្ញុំបានក្លាយជាអ្នកចេះក្បាច់គុនល្បុក្កតោ»។
នាងបន្តប្រាប់ទាក់ទងនឹងសាច់រឿងដូច្នេះថា៖ «រឿងនេះក៏ចង់បង្ហាញពីទំនៀមទម្លាប់ប្រពៃណីរបស់ប្រទេសយើង ហើយក៏បានបង្ហាញពីភាពរឹងមាំរបស់មនុស្សស្រីទន់ភ្លន់ម្នាក់ដែលធ្លាប់ជានារីរបាំមកក្លាយជាអ្នកចេះក្បាច់គុនល្បុក្កតោ ជាក្បាច់គុនបុរាណ ដែលជាមរតកដើម»។
តារាស្រីមិនល្បីតែទេពកោសល្យ និងសម្រស់ តែក៏ល្បីខ្លាំងរឿងចូលចិត្តធ្វើបុណ្យធ្វើទានដល់ចាស់ជរា និងក្មេងៗដែលខ្វះសម្ភារសិក្សារហូតដល់មានគេលាន់មាត់ថាជាតារាចិត្តបុណ្យរូបនេះ នាងក៏បន្តប្រាប់មក ភ្នំពេញ ប៉ុស្តិ៍ ទៀតថា៖ «ខ្ញុំឈឺរយៈពេលជាង ១ ឆ្នាំ ហើយក៏ទទួលបានការវះកាត់រួចហើយដែរ ប៉ុន្តែខ្ញុំត្រូវទៅតាមដានសុខភាពនៅមន្ទីរពេទ្យក្នុងប្រទេសថៃក្នុងរយៈពេល ១ ខែម្តង រយៈពេល ១២ ខែ តែខ្ញុំទៅបាន ៧ ខែហើយនៅសល់តែ ៥ ខែទៀតប៉ុណ្ណោះខ្ញុំនឹងជាដាច់ហើយ»។
កញ្ញា ពេជ្រ ចរណៃ បានបន្តដោយលាយឡំនឹងសំណើចតិចៗក្រោយពីបានសម្រាកពីការថតរឿងថ្មី (រឿង បេះដូងតែមួយ) នៅពេលថ្ងៃត្រង់ថា៖ «ខំប្រឹងថតកុនយកលុយទៅមើលជំងឺនឹងណា ព្រោះរកអត់ទាន់ទេត្រូវទៅតាមដានសុខភាពក្នុង ១ ខែម្តង ហើយទៅម្តងៗអស់ចាប់ពី ១,០០០ ទៅ ១,២០០ ដុល្លារឯណោះ»៕
