ក្រុងប៉េកាំង៖ អតិថិជនក្នុងភោជនីយដ្ឋានចិនមួយកន្លែងអត់ខ្វល់ពីភេសជ្ជៈមកប្រមូលផ្ដុំគ្នាជុំវិញសត្វទាពណ៌សរោមទន់ ៤ ក្បាល ខណៈទូរស័ព្ទត្រៀមផ្ដិតយករូបភាពគ្រប់ដៃ។ នេះជាកាហ្វេសត្វពេញនិយមថ្មីមួយទៀតរបស់ប្រទេស ចិន។
«Hey! We go» ជាហាងកាហ្វេនៅកណ្ដាលក្រុងឈិនឌូ កំពុងផ្ដល់សេវាកម្មថ្មីផ្គាប់ចិត្ដអ្នកនិយមបង្អួតគ្នាលើបណ្ដាញសង្គម។ សត្វទា ៤ ក្បាល នាំចូលពីអឺរ៉ុបអាចលក់តម្លៃ ១ ៤០០ ដុល្លារមួយក្បាល។
ប៉ុន្ដែតារាប្រចាំហាងកាហ្វេទាំង ៤ មិនមែនសម្រាប់ដាក់លក់ឡើយ តែទុកឲ្យពួកវាដើរសួរសុខទុក្ខភ្ញៀវពីតុមួយចូល តុមួយ។ ក្នុងតម្លៃ ៧៨ យន់ (៤៥ ០០០ រៀល) ភ្ញៀវអាចចំណាយពេលដល់ ៩០ នាទី នៅជាមួយទា ដែលហាក់មិនក្រែងញញើតក្នុងការបង្អួតរាងចំពោះមុខកាមេរ៉ាជាមួយអ្នកសែលហ្វ៊ីពីដៃមួយទៅដៃមួយ។
និស្សិតសាកលវិទ្យាល័យម្នាក់ បានប្រញាប់មកហាងកាហ្វេភ្លាម ពេលបានអានព័ត៌មានលើអនឡាញ។
កញ្ញាបានឲ្យដឹងថា៖ «ពួកវាពិតជារីករាយណាស់ និងស្ដាប់បង្គាប់យើងទៀត ដោយមិនដូចជាសត្វទាហែលទឹកដែលអត់ចេះស្ដាប់អីនោះទេ»។
លោក លូ យ៉ាវឈី អាយុ ២៦ ឆ្នាំ ជាសហស្ថាបនិកហាងកាហ្វេទាដ៏ពេញនិយមជាមួយសមាជិក ៣ នាក់ទៀត និងបាននិយាយថា គំនិតបង្កើតហាងកាហ្វេទារោមសដ៏គួរឲ្យស្រឡាញ់នេះទទួលបានប្រជាប្រិយភាពខ្លាំង ពេលយុវជនរូបនេះទើបទទួលបានសត្វទាំងនេះមកចិញ្ចឹម។
លោកបញ្ជាក់ថា៖ «មនុស្សគ្រប់រូបចូលចិត្ដសត្វទា»។
ពេលនេះភ្ញៀវក៏អាចលេងជាមួយសមាជិកទើបមកដល់ថ្មីៗ នោះគឺកូនជ្រូកបរទេសឃ្យូតៗ ២ ក្បាលជាតារាប្រចាំហាងផងដែរ៕ AFP/HR