.jpg)
មាស សុខសោភា ចេញបទថ្មី «ស្រណោះដៃប្តី» ក្នុងផលិតកម្មផ្ទាល់ខ្លួន Camtrax។ រូប ហ្វេសប៊ុក, មាស សុខសោភា អតីតតារាចម្រៀងស្រីកំពូលនៅថោន។ រូបថត ហុង មិនា
ភ្នំពេញ៖ នាពេលថ្មីនេះ អតីតតារាចម្រៀងស្រីកំពូលនៅទ្រនំថោន មាស សុខសោភា ស្រាប់តែចេញបទចម្រៀងថ្មី មានចំណងជើងថា «ស្រណោះដៃប្តី» នៅក្នុងប៉ុស្តិ៍ Camtrax ដែលជាផលិតកម្មបណ្តាញសង្គមផ្ទាល់ខ្លួនរបស់តារាចម្រៀងស្រីសំឡេងរៃកណ្តឹងរូបនេះ ក្រោយពីបានសម្រេចដើរចេញពីទ្រនំចាស់ ដែលធ្លាប់ជ្រកកោនជាង ៩ ឆ្នាំមកនោះ។
បទចម្រៀងថ្មីបែបមនោសញ្ចេតនា លន្លង់លន្លោច ដែលនិពន្ធទំនុកច្រៀងដោយលោក ងួន សុបិន អតីតជាអ្នកនិពន្ធទំនុកច្រៀងនៅផលិតកម្មថោនផងដែរ ដោយមានចំណងជើងថា «ស្រណោះដៃប្តី» ក៏ទទួលបានការគាំទ្រពីប្រិយមិត្តអ្នកស្តាប់យ៉ាងច្រើន បានចូលទៅចុច Like & Comment ដោយគ្រាន់តែបានបញ្ចូលក្នុងបណ្តាញសង្គមយូធូបប៉ុន្មានថ្ងៃមកនោះ។
អ្នកគាំទ្រខ្លះ បានលើកឡើងថា៖ «ពីរោះ អត្ថន័យ កប់ស៊េរី កម្សត់ខ្លោចផ្សា ផ្អែមល្ហែម បំពេអារម្មណ៍ ពាក្យសម្តីទៅកាន់បុរសម្នាក់ ដែលធ្លាប់ថ្នមបី គឺប្តីហ្នឹងហើយ ដៃហ្នឹងទៅថ្នមស្រីថ្មីហើយពេលនេះ។ អត្ថន័យចាក់ដោតដល់បេះដូង ពីអ្នកនិពន្ធលោក ងួន សុបិន បង្ហើរសំនៀងដោយអ្នកនាង មាស សុខសោភា ជាកុលធីតាខ្មែរដ៏ឆ្នើម។ នេះបានចំជាធនធានមនុស្ស ល្អកម្ររកបានពិតៗ! បងមានសម្ថភាព ច្រៀងបានគ្រប់យ៉ាង មានផលិតកម្មផ្ទាល់ខ្លួន មានភាពឯករាជ្យ ប្រឹងប្រែងផលិតចម្រៀងឲ្យមានគុណភាពទៅបង ហើយធ្វើខនសឺតផ្ទាល់ខ្លួន ដូចជាតារាបរទេសទៅបងភា! តារាស្រីតែម្នាក់ ដែលខ្ញុំស្ដាប់បទបង!»។
ចំណែកអ្នកខ្លះទៀតវិញថា៖ «ខ្ញុំពិតជា ស្រឡាញ់បងស្រីខ្លាំងណាស់ បងជាតារាចម្រៀងស្រីម្នាក់ ដែលក្លាហាននៅក្នុងវិថីសិល្បៈមួយនេះ តារាដែលយកធម្មជាតិធ្វើជាមិត្តភក្ដិ ជាតារាដែលមានសំឡេងផ្អែម តារាស្រីដែលមានបទលំនាំពីដើមច្រើនជាងគេក្នុងចំណោមតារាស្រីជំនាន់បង! បើអ្នកជាហ្វេនរបស់គាត់ គួរកុំយកគាត់ប្រៀប ទៅនឹងតារាស្រីផ្សេងទៀត ព្រោះថា បងៗសុទ្ធតែជាមិត្តរួមជំនាន់អាជីព មានទេពកោសល្យម្យ៉ាងម្នាក់ គាំទ្រសិល្បករ សិល្បការិនីខ្មែរ!»។
ចំណែកឯតារាចម្រៀងស្រី ដែលចូលចិត្តតែបកស្រាយចម្រៀងបែបអូរីជីណល មិនច្រៀងបទចម្លងពីគេអ្នកនាង មាស សុខសោភា ក៏បានបង្ហោះសារបែបលួងលោមអារម្មណ៍ប្រិយមិត្តខ្លួនកាលពីថ្ងៃបង្ហោះវីដេអូបទថ្មីក្នុងយូធូបដំបូងថា៖ «សួស្ដី! បងប្អូនទាំងអស់គ្នា ល្ងាចនេះ នាងខ្ញុំនឹងបង្ហោះវីដេអូបទចម្រៀងថ្មីរបស់នាងខ្ញុំសម្រាប់ជាកាដូដល់បងប្អូនទាំងអស់គ្នាស្ដាប់កម្សាន្តនាថ្ងៃចុងសប្ដាហ៍។ សូមបងប្អូនជួយ subscribe YouTube Channel នាងខ្ញុំតាមរយៈ Link ខាងក្រោមផង!»។
ទោះជាយ៉ាងណាក្តីរហូតមកដល់ពេលនេះ គេនៅតែមិនទាន់បានដឹងច្បាស់ទេថា ទ្រនំថ្មីរបស់អ្នកនាង មាស សុខសោភា ជាផលិតកម្មមួយណានោះ បើទោះបីជាគេបានដឹងតម្រុយរួចហើយថា គោលដៅអនាគតដែលជាទ្រនំថ្មីរបស់អ្នកនាងអាចផលិតកម្មហង្សមាសនោះក្តី ខណៈគេឃើញតារាចម្រៀងស្រីរូបនេះសុខចិត្តសំងំចេញបទចម្រៀងថ្មីៗរបស់ខ្លួនជាមួយនឹងផលិតកម្មខ្លួនឯង Camtrax ជាបណ្តើរៗសិន មិនព្រមបញ្ជាក់ពីគោលដៅនៃទ្រនំថ្មីខ្លួនដដែល៕
