.jpg)
យុវជន ស៊ុយ លីនប៉ាវ ជាប់ជយលាភីលេខ ១ រឿងខ្លីនៃពានរង្វាន់ពុទ្ធសាសនបណ្ឌិត្យលើកទី៣។ រូបថត ហ្វេសប៊ុក
ភ្នំពេញ៖ ទីផុតរកឃើញម្ចាស់ជយលាភីនៃការប្រកួតពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី៣ ក្រោមប្រធានបទ «ទោសនៃសុរា» ប្រចាំឆ្នាំ ២០២០ នេះហើយ ដោយជយលាភីលេខ ១ ផ្នែកខាងរឿងខ្លី បានទៅលើអ្នកនិពន្ធវ័យក្មេងយុវជន ស៊ុយ លីនប៉ាវ ជាមួយនឹងរឿងមានចំណងជើងថា «ម៉ែ! ខ្ញុំចង់រស់» ខណៈផ្នែកកំណាព្យខ្លីវិញ បានទៅលើកវីឈ្មោះ វណ្ណ សារ៉េត ជាមួយសំណេរកំណាព្យមានចំណងជើងថា «សុរា»។
លទ្ធផលពានរង្វាន់ពុទ្ធសាសនបណ្ឌិត្យលើកទី៣ ឆ្នាំ ២០២០។ សហការី
បើតាមលោក ស សុខនី ជាប្រធានវិទ្យាស្ថានពុទ្ធសាសនបណ្ឌិត្យឱ្យដឹងថា៖ «វិទ្យាស្ថានពុទ្ធសាសនបណ្ឌិត្យបានរៀបចំការប្រកួតប្រជែងតែងនិពន្ធអក្សរសិល្ប៍លើផ្នែករឿងខ្លី និងកំណាព្យនេះ ក្នុងគោលបំណងលើកតម្កើងស្នាដៃអក្សរសាស្ត្រខ្មែរឡើងវិញ។ ជយលាភីរឿងខ្លីនឹងផ្តល់ចំណាត់ថ្នាក់លេខ ១ ដល់លេខ ៣ ហើយក៏មានរង្វាន់កិត្តិយសម្នាក់ផងដែរ នៅឆ្នាំនេះ ខណៈផ្នែកកំណាព្យវិញក៏ផ្តល់ចំណាត់ថ្នាក់លេខ ១ ទៅដល់លេខ ៣ ផងដែរ។ លេខ ១ ផ្នែករឿងខ្លី ស្នាដៃអ្នកនិពន្ធ ស៊ុយ លីនប៉ាវ រឿង«ម៉ែ! ខ្ញុំចង់រស់» លេខ ២ ស្នាដៃអ្នកនិពន្ធ អៀ ហុកនីម រឿង «ភត្តាភិហារស្រ្តី» លេខ ៣ ស្នាដៃអ្នកនិពន្ធ ឆាន់ វត្ថា រឿង «វិប្បដិសារីឪពុកខ្ញុំ» លេខ ៤ ជារង្វាន់កិត្តិយស ស្នាដៃអ្នកនិពន្ធ វ៉ា មឿន ឈ្មោះរឿង «ប្តូរធាតុ»។ ផ្នែកកំណាព្យខ្លីវិញលេខ ១ ជាស្នាដៃកវី វណ្ណ សារ៉េត សំណេរឈ្មោះ «សុរា» លេខ ២ ស្នាដៃកវី ជក់ សុភា ជាសំណេរឈ្មោះ «ព្រះឥន្ទ្របាត់កែវ» និងលេខ ៣ ស្នាដៃកវី ខឹក ហ៊ន ជាមួយសំណេរឈ្មោះ «អពមង្គល»។
ការប្រកួតពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី៣ ឆ្នាំ ២០២០ ក្រោមប្រធានបទឈ្មោះថា «ទោសនៃសុរា» នេះ ក៏មានលក្ខខណ្ឌសម្រាប់បេក្ខជនម្នាក់អាចដាក់ស្នាដៃបានតែ ១ គត់ និងមិនមែនជាស្នាដៃ ដែលធ្លាប់ទទួលបានចំណាត់ថ្នាក់នៅពានរង្វាន់ណាមួយពីមុនទេ។ ស្នាដៃរឿងខ្លីត្រូវវាយជាអត្ថបទដោយប្រើយូនីកូដខ្មែរក្នុងកុំព្យូទ័រ ទំហំអក្សរ ១២ ពុម្ព Khmer OS Siemreap ខ្នាតក្រដាស A4 ដែលមានចំនួនចាប់ពី ១០ ទៅ ១៥ ទំព័រ។ ចំណែកឯកំណាព្យពី ៥ ទៅ ១០ ទំព័រ (មានគំរូជូន) ព្រមទាំងត្រូវគោរពអក្ខរាវិរុទ្ធតាមវចនានុក្រមខ្មែរ បោះពុម្ពផ្សាយដោយពុទ្ធសាសនបណ្ឌិត្យគ្រាទី ៥ ជាចាំបាច់ (ផ្តល់ពិន្ទុពិសេស)។
ចំពោះពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី១ ឆ្នាំ ២០១៨ ក្រោមប្រធានបទថា «សុខដុមនីយកម្មក្នុងសង្គមតាមរយៈសាសនា» ខណៈអ្នកឈ្នះការប្រកួត លេខ ១ ទទួលបានទឹកប្រាក់ចំនួន ៥ លានរៀល លេខ ២ ទទួលបានទឹកប្រាក់ចំនួន ៣ លានរៀល និងលេខ ៣ ទទួលបានទឹកប្រាក់ចំនួន ២ លានរៀល៕
