ក្រុងវ៉ាស៊ីនតោន: ក្រុមអ្នកវិទ្យាសាស្ដ្របានប្រកាសកាលពីថ្ងៃពុធថា ឆ្អឹងផូស៊ីលសត្វភេនឃ្វីនធំ ១ ក្បាល ដែលស្ទើរប៉ុនមនុស្សធំម្នាក់ ត្រូវបានប្រទះឃើញនៅដែនកោះខាងត្បូងនៃប្រទេស នូវែលសេឡង់។
ក្រុមអ្នកស្រាវជ្រាវបាននិយាយថា ភេនឃ្វីនយក្ស មានកម្ពស់ ១,៦ ម៉ែត្រ និងទម្ងន់ ៨០ គីឡូក្រាម ធ្ងន់ជាងភេនឃ្វីន Emperor សម័យថ្មី ៤ ដង និងខ្ពស់ជាង ៤ តឹក។
នាម «ក្រូសវ៉ាលីយ៉ាវ៉ៃផារេនស៊ីស» វាបង្ហាញខ្លួននៅតំបន់ឆ្នេរនៃសម័យផាឡេអូសេន កាលពីចន្លោះ ៦៦-៦៥ លានឆ្នាំមុន។
អ្នកប្រមាញ់សំណល់ផូស៊ីលម្នាក់បានប្រទះឃើញឆ្អឹងជើងបក្សីភេនឃ្វីនកាលពីឆ្នាំមុន ហើយវាត្រូវបានបញ្ជាក់ថា ជាអម្បូរថ្មីមួយក្នុងការស្រាវជ្រាវចុះផ្សាយក្នុងព្រឹត្ដិបត្រ «Alcheringa: An Australasian Journal of Palaeontology»។
វាន់ណេសាដេពែទ្រី អ្នកស្រាវជ្រាវមកពីសារមន្ទីរ Canterbury Museum បាននិយាយថា វាជាភេនឃ្វីនយក្សទី២ បន្សល់មកតាំងពីសម័យផាឡេអូសេន ដែលប្រទះឃើញក្នុងតំបន់នៅនូវែលសេឡង់នេះ។
អ្នកស្រីនិយាយថា៖ «វាកាន់តែបន្ថែមទម្ងន់ភ័ស្ដុតាងលើទ្រឹស្ដីយើងថា ភេនឃ្វីនមានមាឌធំៗតាំងពីសម័យបុរាណកាល»។
ក្រុមអ្នកវិទ្យាសាស្ដ្រធ្លាប់មានមន្ទិលថា ភេនឃ្វីនយក្សបានងាប់ដាច់ពូជដោយសារតែវត្ដមានសត្រូវសមុទ្រធំៗដទៃទៀត ដូចជាឆ្មាទឹក និងបាលែនធ្មេញស្រួចជាដើម។
នូវែលសេឡង់ ល្បីសម្បូរបក្សីទឹកយក្សប្រភេទនេះរួមទាំងបក្សីដើរដី ម៉ាវ មានកម្ពស់ ៣,៦ ម៉ែត្រ និងឥន្ទ្រី Haast មានប្រវែងស្លាប ៣ ម៉ែត្រផងដែរ។
សារមន្ទីរក៏ទើបតែបានប្រកាសរកឃើញសេកយក្ស ១ ក្បាល ដែលកម្ពស់ ១ ម៉ែត្រ និងរស់នៅកាលពី ១៩ លានឆ្នាំមុន៕ AFP/HR