.jpg)
ក្រុមរបាំសហសម័យ «ក្តីស្រមៃ» របស់កញ្ញា ចំរើន សុភា។ ហ្វេសប៊ុក
ភ្នំពេញៈ ទម្រង់សិល្បៈរបាំសហសម័យដែលទើបតែបានបង្កើតថ្មីឈ្មោះ «ក្តីស្រមៃ» នឹងមានការសម្តែងចែកជូនទស្សនិកជនគ្រប់ស្រទាប់វ័យចំនួន ២ លើកនៅថ្ងៃខុសគ្នា និងទីកន្លែងខុសគ្នានៃក្រុមសិល្បករ-សិល្បការិនីមួយក្រុម ដោយមាននាដកា កញ្ញា ចំរើន សុភា គឺជាបងស្រីបង្កើតរបស់តារាចម្រៀងស្រីសម័យនៅទ្រនំផលិតកម្ម We Production កញ្ញា ចំរើន សុភ័ក្រ។
ខណៈនេះគឺជាការសម្តែងរបាំមួយនៅក្នុងកម្មវិធីសម្តែងទម្រង់សិល្បៈខ្មែរបែបចម្រុះមានឈ្មោះថា «រដូវកាលវប្បធម៌» ដែលរៀបចំដោយអង្គការសិល្បៈខ្មែរអមតៈ មានរយៈពេលយូរគឺ ៣ ខែនោះ គឺចាប់ផ្តើមពីថ្ងៃទី ១៩ ខែកក្កដា ដល់ថ្ងៃទី ២៣ ខែកញ្ញា ឆ្នាំ ២០១៨ ខាងមុខនេះ ក្រោមប្រធានបទថា «ការស្វែងរកអត្តសញ្ញាណ»។
លោក ឥន្ទ សម៉ាណាក់ អ្នកចាត់ចែងរដ្ឋបាលរៀបចំកម្មវិធី «រដូវកាលវប្បធម៌» នៃអង្គការសិល្បៈខ្មែរអមតៈប្រាប់ពីគោលដៅ និងគោលបំណងនៃការសម្តែងរបាំសហសម័យបង្កើតថ្មីឈ្មោះ «ក្តីស្រមៃ» នេះថា៖ «ការសម្តែងចំនួន ២ ដង នៅ ២ កន្លែងខុសគ្នា និងថ្ងៃសម្តែងវិញក៏ខុសគ្នាដែរ សម្រាប់របាំសហសម័យថ្មី ដែលដឹកនាំដោយប្រធានក្រុមបងស្រី ចំរើន សុភា។ ថ្ងៃសុក្រ ទី ២០ ខែកក្កដា នេះ នឹងសម្តែង នៅសាលាមធ្យមវិចិត្រសិល្បៈដើម្បីចែកជូនដល់សិស្សានុសិស្ស និងនិស្សិតទស្សនាដោយឥតគិតថ្លៃ។ ចំណែកថ្ងៃទី ២២ ខែកក្កដា ឆ្នាំ ២០១៨ វិញ នឹងសម្តែងនៅសាលមហោស្រពសិល្បៈនៃសារមន្ទីរជាតិ ដោយមានការលក់សំបុត្រទៅដល់អ្នកចូលទស្សនា សំបុត្រ ១ តម្លៃ ៥ ដុល្លារ ឬ ២ ម៉ឺនរៀល សម្រាប់ការទស្សនាទម្រង់សិល្បៈរបាំសហសម័យទើបបង្កើតថ្មីមួយនេះ។ គោលបំណងនៃរបាំសហសម័យឈ្មោះក្តីស្រមៃនេះ នឹងធ្វើឲ្យទស្សនិកជនបានស្វែងយល់ដោយខ្លួនឯងតែម្តង ខណៈពេលបានទស្សនា តាមរយៈការរៀបរាប់ពីក្តីស្រមៃរបស់សិល្បករការិនី នាពេលអនាគតនៅក្នុងការសម្តែងរបាំរបស់ពួកគេដែលមានរយៈពេលប្រមាណ ៤០ នាទី ទៅ ៥០ នាទីនោះ»។
លោក ឥន្ទ សម៉ាណាក់ ក៏បញ្ជាក់ពីមូលហេតុនៃការមិនទិញសំបុត្រ និងទិញសំបុត្រទស្សនាដែរថា៖ «សម្រាប់ការសម្តែងមិនទិញសំបុត្រនោះ គឺការសម្តែងនៅឯសាលាមធ្យមវិចិត្រសិល្បៈដើម្បីចែកជូនប្អូនសិស្ស ឬនិស្សិតទស្សនាស្វែងយល់ពីទម្រង់របាំថ្មីនេះ ខណៈយើងគិតថា ពួកគាត់មិនអាចមានលទ្ធភាពចំណាយប្រាក់ចូលទស្សនាបាន។ ចំណែកការទិញសំបុត្រវិញគឺសម្តែងតែនៅសាលមហោស្រពសិល្បៈនៃសារមន្ទីរជាតិគឺជាការសម្តែងសម្រាប់មហាជនទូទៅដែលពួកគាត់ស្រឡាញ់ចូលចិត្តរបាំ និងមានលទ្ធភាពចំណាយប្រាក់ទិញសំបុត្រនេះបាន»៕
