.jpg)
តួសម្ដែងប្រុសស្រីក្នុងខ្សែភាពយន្តរឿង «ថ្ងៃមុនស្អប់ ថ្ងៃនេះស្រឡាញ់» កាលពីថ្ងៃទី ១៤ ខែមីនា។ រូបថត ហុង មិនា ហុង មិនា
ភ្នំពេញៈ ក្រោយពីបញ្ចេញវីដេអូខ្លី (Trailer) ក្នុងបណ្ដាញយូធូបជាមួយចំនួនទស្សនារហូតដល់ ៤ លាន ខ្សែភាពយន្តដែលផលិតកម្ម អិលឌី ភីកឈ័រ សហការជាមួយទូរទស្សន៍ភីអិនអិន និង Soyo រឿង «ថ្ងៃមុនស្អប់ ថ្ងៃនេះស្រឡាញ់» នឹងបញ្ចាំងនៅថ្ងៃទី ១៩ ខែមីនានេះហើយ។
ម្ចាស់ផលិតកម្ម LD Picture លោក លៀក លីដា បានប្រាប់ភ្នំពេញប៉ុស្តិ៍ ក្នុងថ្ងៃសម្ពោធភាពយន្តជាផ្លូវការកាលពីសប្ដាហ៍មុនថា៖ «រឿងនេះពួកយើងបានប្រើពេលក្នុងការថតយូរជាងរឿងមុនៗរហូតដល់ជិត ១ ឆ្នាំ និងបានសម្រិតសម្រាំងក្នុងការផលិតយ៉ាងល្អឥតខ្ចោះទម្រាំតែបានដាក់បញ្ចាំងប្រើពេលជិត ២ ឆ្នាំ។ ទាំងតួជ្រើសមកសម្តែងសុទ្ធតែជាតួល្បីក្នុងប្រទេស ប៉ិនប្រសប់ក្នុងការសម្តែង សម្លៀកបំពាក់ជ្រើសរើសតាមបែប យុវវ័យ ពិសេសការរៀបចំប្រព័ន្ធភ្លើងតាមលក្ខណៈស្តង់ដា និងបច្ចេកទេសក្នុងការកាត់តផងដែរ»។
លោកបញ្ជាក់ថា៖ «ពួកយើងចាយលុយអស់ជាច្រើន តែទាក់ទងទៅលើការចំណាយខាងភីអិនអិនគាត់ជាអ្នកចេញ តែបើទាក់ទងនឹងផ្នែកខាងផលិត ពួកខ្ញុំចំណាយអស់ច្រើនជាងរឿងមុនៗ ដែលខ្ញុំធ្លាប់បានធ្វើកន្លងមក អ៊ីចឹងហើយទើបខ្ញុំគិតថាជារឿងខ្នាតធំប្រចាំឆ្នាំ ២០១៩ នេះ»។
លោក លៀក លីដា និងតួសម្ដែងក្នុងខ្សែភាពយន្ត។ រូបថត ហុង មិនា ហុង មិនា
កញ្ញា ទូច បុប្ផា ជាប្រធានផ្នែកកម្មវិធីផ្សាយនៃស្ថានីយទូរទស្សន៍ភីអិនអិនបានថ្លែងប្រាប់ ភ្នំពេញ ប៉ុស្តិ៍ ដូចគ្នាថា៖ «រឿងនេះដែរ ថ្ងៃមុនស្អប់ ថ្ងៃនេះស្រឡាញ់ គឺជាសមិទ្ធផលដែលភីអិនអិនបានសម្រិតសម្រាំងមកជាខ្សែភាពយន្តធំប្រចាំឆ្នាំ ២០១៩ ព្រោះសាច់រឿងមានភាពប្រទាក់ក្រឡាគ្នារវាងគំនុំពីការភាន់ច្រឡំរបស់មនុស្សចាស់ក្នុងការធ្វើជំនួញបានបន្សល់មកឲ្យកូនៗស្អប់គ្នាវាយប្រហារគ្នាជាមួយទ្រឹស្តីអ្នកជំនួញមានភាពផ្អែមល្ហែម និងសម្រក់ទឹកភ្នែកលាយជាមួយកំប្លុកកំប្លែង ភ័យរន្ធត់ គួបផ្សំជាមួយបទពិសោធនៃជីវិតពិតក្នុងសង្គមនិងភាពជាអ្នកដឹងនាំ គុណធម៌ឈរពីលើផលប្រយោជន៍»។
សម្រាប់ការសម្តែងវិញមានភាពលំបាកច្រើនចំពោះតារាភាពយន្តខ្ពស់ស្រឡះលឹម ជា ឡាយ ត្រូវចាប់ដៃគូនឹងកញ្ញា ពុធ ស្រីខួច ជាតួឯកនៅក្នុងរឿងដោយលោកបានបង្ហើបថា៖ «សម្រាប់ខ្ញុំក៏មានការពិបាកខ្លះដែរ ដោយសារតែចរិតតួដែលខ្ញុំត្រូវសម្តែងនេះមានភាពជាអ្នកលេងគឺជាម៉ាហ្វៀធ្វើតាមទំនើងចិត្តខ្លួនឯងមានចរិតជាច្រើនមានទាំងកោងកាច ជាពិសេសឈ្លើយខុសដាច់ពីចរិតក្នុងតួអង្គរឿងមុនៗដែលខ្ញុំបានសម្តែង ហើយមួយទៀតគឺអ្នកដឹកនាំសម្តែងគ្រាន់តែប្រាប់ពីអ្វីដែលគាត់ចង់បាន ហើយឲ្យយើងសម្តែងដោយខ្លួនឯងធ្វើយ៉ាងណាឲ្យសម និងស៊ីជាមួយសាច់រឿង»។
រីឯកញ្ញា សាឡាត់ ស្រីឡាង និងលោក បឺរី ដែលជាតួអង្គសំខាន់មួយនៅក្នុងរឿងដូចគ្នាអ្នកទាំង ២ ក៏បានបង្ហើបពីការលំបាកដែរ ដោយប្លង់នីមួយៗរបស់ខ្លួនត្រូវចូលទៅក្នុងព្រៃជ្រៅជាច្រើនថ្ងៃ និងត្រូវថតពីព្រឹករហូតដល់ព្រឹកវិញមិនបានសម្រាក ព្រោះខ្លាចអូសបន្លាយពេលយូរ។
រឿងនេះក៏មានតម្លៃអប់រំមនុស្សក្នុងសង្គមឲ្យចេះការពិចារណា កុំវាយតម្លៃអ្វីតាមភ្លើងកំហឹងកំពុងឆេះ រក្សាគុណធម៌ ភាពស្មោះត្រង់ និងចៀសវាងការលោភលន់ផងដែរ៕
សាឡាត់ ស្រីឡាង និងលោក ប៊ើរី។ហុង មិនា
