ភ្នំពេញៈ ទីបំផុតតារាចម្រៀងស្រីដែលផ្ទុះភាពល្បីខ្លាំងពេញហ្វេសប៊ុកដោយសារលើកយកចម្រៀងមរតកសំនៀងដើមលោកស្រី ប៉ែន រ៉ន មានចំណងជើងថា «មេម៉ាយសប្បាយចិត្ត» មកបកស្រាយតាមកម្មវិធីជប់លៀង ឬអាហ្វែរនានា គួបផ្សំនឹងទឹកដមសំឡេងពីរោះ និងកាយវិការក្រមិចក្រមើមដ៏សមសួនគឺកញ្ញា រ័ត្ន រចនា មានទ្រនំជ្រកកោនហើយគឺបានចុះកុងត្រាជាមួយនឹងផលិតកម្ម Galaxy Navatra រយៈពេល ៣ ឆ្នាំទៀតផង។
តារាចម្រៀងស្រីសម្បូរសាច់ដ៏ទ្រលុកទ្រលន់ កញ្ញា រ័ត្ន រចនា ដែលគេដាក់រហ័សនាមថា អ្នកមេម៉ាយសប្បាយចិត្តនោះធ្វើឲ្យគេភ្ញាក់ផ្អើលខ្លាំង ក្រោយពីរូបនាងលេចវត្តមានក្នុងផលិតកម្ម Galaxy Navatra របស់ឧកញ៉ាវ័យក្មេងគឺលោក ឡេង ណាវ៉ាត្រា ជាមួយនឹងបទចម្រៀងថ្មីរបស់ខ្លួនគឺបទ «ប្រមូលអ្នកSingle ចូលសារមន្ទីរ» ដែលកំពុងតែស្រូបប្រជាប្រិយពីអ្នកគាំទ្រយ៉ាងខ្លាំងនាពេលថ្មីៗនេះ។
អតីតតារាចម្រៀងស្រីគ្មានផលិតកម្មដោយជ្រកក្រោមទ្រនំប៉ុស្តិ៍ហ្វេសប៊ុក សំឡេងមានទឹកដមដ៏ពីរោះទៅលើការបកស្រាយបទចម្រៀងមរតកដើម កញ្ញា រ័ត្ន រចនា ដែលប្រឡូកនៅក្នុងវិថីសិល្បៈចម្រៀងជាង ២០ ឆ្នាំហើយនោះ ក៏មិននឹកស្មានដល់ឡើយថា នាងអាចមានឱកាសទទួលការគាំទ្រពីបងប្អូនប្រិយមិត្តយ៉ាងភ្លូកទឹកភ្លូកដី នឹងសំនៀងបកស្រាយបទ «មេម៉ាយសប្បាយចិត្ត» នៃក្រុមវង់តន្ត្រីអ័រកាដង់នៅតាមភូមិនោះបង្ហើបប្រាប់ភ្នំពេញប៉ុស្តិ៍តាម Voice Messenger ឲ្យដឹងពីការចូលផលិតកម្ម Galaxy Navatra ខណៈពេលកំពុងតែសម្តែងនៅឯប្រទេសអូស្ត្រាលីមុនចូលឆ្នាំខ្មែរឆ្នាំនេះ។
កញ្ញា រចនា បានប្រាប់ថា៖ «ចាសបង!មែនហើយ នាងខ្ញុំបានចុះកុងត្រា ជាមួយនឹងផលិតកម្ម Galaxy Navatra ចំនួន ៣ ឆ្នាំ ខណៈខ្ញុំបានចូលផលិតកម្មមួយនេះប្រមាណ ៣ ខែមកហើយផងដែរ»។
គួររំឭកថា កញ្ញា រ័ត្ន រចនា តារាចម្រៀងស្រីរះលើវិថីសិល្បៈចម្រៀងនៃក្រុមតន្ត្រីអ័រកាដង់នៅតាមភូមិ អតីតក៏ជាកូនសិស្សរបស់តន្ត្រីករ និងតារាចម្រៀងជើងចាស់លោក ម៉ិញ សុធីវណ្ណ ហើយបច្ចុប្បន្ននេះកំពុងតែមានប្រជាប្រិយភាពដោយមានការគាំទ្រពីមហាជនខ្មែរគ្រប់ច្រកល្ហកជាមួយបទពេញនិយមរបស់កញ្ញាគឺបទ «មេម៉ាយសប្បាយចិត្ត» ដែលជាសំនៀងដើមរបស់លោកស្រី ប៉ែន រ៉ន នោះ។
ខណៈតារាចម្រៀងស្រីអាចបកស្រាយបទចម្រៀងមរតកដើម នាទសវត្សរ៍ទី ៦០-៧០ បានច្រើនបទកញ្ញា រ័ត្ន រចនា បានបង្ហើបពីអារម្មណ៍សប្បាយចិត្តខ្លាំងនឹងជោគជ័យ ដែលទើបតែទទួលបានក្រោយពីដើរនៅលើវិថីសិល្បៈចម្រៀងសម័យនេះជិត ២០ ឆ្នាំមកនេះទៀតថា៖ «យ៉ាងណាក៏សប្បាយចិត្តឥតមានអ្វីប្រៀបបានឡើយ ទោះបីជាភាពល្បីនេះមានតែ ១ ថ្ងៃ ឬរយៈពេលខ្លីក៏ដោយគឺថា ខ្ញុំពិតជាត្រេកអរខ្លាំងណាស់។ ចំពោះការគាំទ្រដែលជាផ្នែកមួយដើម្បីជួយលើកទឹកចិត្តអ្នកចម្រៀងដូចជារូបនាងខ្ញុំ។ ទោះជាយ៉ាងណាគឺថាចាប់តាំងពីបងប្អូនផ្អើលគាំទ្រខ្លាំងមក ឃើញថានាងខ្ញុំក៏មានទីផ្សារច្រៀងនៅតាមកម្មវិធីនានាបានច្រើនជាងមុន ដែលអាចឲ្យនាងខ្ញុំទទួលបានប្រាក់ចំណូលក៏ទទួលបានច្រើនគ្រាន់បើជាងមុនទៀតផងដែរ»៕