.jpg)
រូបផ្អែមល្ហែមរវាងកីឡាករបាល់ទាត់លោក លី វ៉ាហេដ និង សុខ សោម៉ាវត្តី។ ហ្វេសប៊ុក
ភ្នំពេញៈ ខណៈគេឧស្សាហ៍ឃើញបង្ហាញ ភាពស្និទ្ធស្នាលនឹងកីឡាករបាល់ទាត់លី វ៉ាហេដ ប្រៀបដូចគូស្នេហ៍នឹងគ្នាទៅហើយក្តី តែមិនព្រមសារភាពនោះ ស្រាប់តែថ្មីៗនេះក៏លេចដំណឹងថា អ្នកមេម៉ាយកូនមួយ សុខ សោម៉ាវត្តី កំពុងមានម្ចាស់ស្នេហ៍ថ្មី ជាអាណិកជន នឹងធានាទាំងកូន និងម្តាយទៅរស់នៅអាមេរិក។
ខណៈដំណឹងនេះ បានលេចឮក្រោយពីតារាសម្តែងស្រីមេម៉ាយកូនមួយសាច់សខ្ចី និងមានទេពកោសល្យសម្តែងជាតួបែបក្រមិចក្រមើម អ្នកនាង សុខ សោម៉ាវត្តី បានបង្ហើរសារបែបស្ទាក់ស្ទើរក្នុងការសម្រេចចិត្តថាទៅតាមឬយ៉ាងណាថា៖ «កំពុងតែគិតថា បើទៅ USA យ៉ាងម៉េចដែរ? Should I?» និងសារលើនៅ Profile នាងបានសរសេរថា៖ «ចង់ទៅ USA ចំនួន ៣-៤ ឆ្នាំដើម្បីបានសិទ្ធិធានាកូនស្រី» ដែលមានដាក់រូបចិញ្ចៀនទៀត សង្ស័យតែមានអាណិកជនជាម្ចាស់បេះដូងមែនទេដឹង។
ប៉ុន្តែតារាស្រីជាតំណាងឲ្យក្រុមហ៊ុនភេសជ្ជៈអូអិឈិ ចំនួន ១ ឆ្នាំ ដែលជាមូលហេតុដ៏ចម្បងនាំឲ្យនាងប្រកាសផ្អាកថតកុនមួយរយៈតាំងពីចុងឆ្នាំ ២០១៦ មក តារាសម្តែងស្រីល្បីខ្លាំង និងមានប្រិយមិត្តគាំទ្រច្រើន អ្នកមេម៉ាយកូនមួយក្តៅស្រួយអ្នកនាង សុខ សោម៉ាវត្តី បានបញ្ជាក់ប្រាប់ភ្នំពេញប៉ុស្តិ៍ថា៖ «អត់ទេបង!មិនមានអាណិកជនណាមកធានានាងខ្ញុំ និងកូននោះទេ! ហើយរឿងទៅនៅអាមេរិកនោះ ក៏មិនអាចដែរសម្រាប់រូបនាងខ្ញុំ តែប្រសិនបើទៅលេងវិញទើបអាច។ហេតុផលដែលនាងខ្ញុំមិនចង់ទៅរស់នៅស្រុកគេឬអាមេរិកនោះ មកពីនាងស្រឡាញ់ទឹកដីខ្មែរជាង ហើយម្យ៉ាងទៀត ការងារនៅស្រុកខ្មែរសម្រាប់ខ្ញុំក៏សម្បូរដែរ ប៉ុន្តែប្រសិនបើទៅរស់នៅស្រុកគេ គឺអ្វីៗនឹងត្រូវចាប់ផ្តើមពីចំណុចសូន្យ ជាមិនខាននោះឡើយ»។
ខណៈដំណឹងដែលល្បីថា មានបុរសអាណិកជននឹងធានាទាំងកូន និងម្តាយ ទៅរស់នៅអាមេរិកនោះ ក៏ត្រូវបានតារាសម្តែងស្រីដែលជាម៉ូយតួស្រីប្រចាំផលិតកម្មមហាហង្ស និងពិធីការិនីទូរទស្សន៍បាយ័ន ក៏បានអះអាងយ៉ាងដាច់ណាត់ថា៖ «ពិតជាគ្មានមែន!ហើយបើគ្រាន់តែចង់ទៅរស់នៅអាមេរិកនោះ មិនចាំបាច់ទាល់តែមានប្រុសអាណិកជនទើបអាចធានាបាននោះទេ នាងខ្ញុំក៏មានសាច់ញាតិ ដែលជាជីដូនបង្កើត និងមាមីងរស់នៅអាមេរិកស្រាប់ ក៏អាចធានាបានដែរ ប្រសិនបើនាងខ្ញុំចង់ទៅរស់នៅនោះ។ ចំពោះកូនស្រីខ្ញុំវិញ ដោយសារនាងនៅតូចនៅឡើយ ក៏មិនទាន់ចង់ឲ្យទៅរស់នៅទីនោះដែរ តែអាចចាំមើលគាត់ធំបន្តិចទៀតសិន»។
ដោយឡែករឿងភាពផ្អែមល្ហែមនឹងកីឡាកររូបសង្ហាលោក លី វ៉ាហេដ កំពុងតែធ្វើឲ្យមានការមន្ទិលសង្ស័យថា ច្បាស់ជាតារាស្រីមេម៉ាយកូនមួយ អ្នកនាង សុខ សោម៉ាវត្តី កំពុងតែរឹតបន្តឹងទំនាក់ទំនងស្នេហា ខណៈគេសង្កេតថាអ្នកទាំង ២ បង្ហាញពីភាពស្និទ្ធស្នាលផ្តើមតាំងពីចាប់ដៃគ្នាសម្តែងកុនដុំរឿង «អ្នកខូចចិត្តអាជីព» មកម្ល៉េះ។
ប៉ុន្តែរឿងដ៏រសើបនេះអ្នកនាង សុខសោម៉ាវត្តី ក៏ធ្លាប់ប្រាប់ភ្នំពេញប៉ុស្តិ៍ ដែរថា៖ «មិនមានអ្វីពិសេសដូចការសង្ស័យ ឬការគិតរបស់បងប្អូននោះទេ! ហើយសារសរសេរតាមហ្វេសប៊ុក គ្រាន់តែនាងខ្ញុំបានសរសេរលេងទេតើបង មិនបានមានន័យអ្វីជាពិសេសដល់ម្លឹងទេ។ ប្រសិនបើ នាងខ្ញុំមានអ្នកថ្មីមែននោះ មិនលាក់ឡើយ ហើយនឹងប្រាប់ឲ្យដឹងមិនខាន»៕
