.jpg)
រ៉ូបូតមនុស្សយន្តមកពី ១០ ក្រុម ចូលរួមក្នុងការប្រកួត ATC។ រូបថត សហការី
ក្រុងញូវដែលី : លោក អារុន គូម៉ាបាចាក មានជំនាញចម្លែក ដែលលោកអាចគូររូបភាពដោយប្រើម៉ាស៊ីនដេរ។ តាមបច្ចេកទេស
នេះជាវិជ្ជាប៉ាក់ មិនមែនគូរនោះទេ តែស្នាដៃរបស់លោកពិតជារំលេចនូវភាពលម្អិតដែលមិនខុសពីគំនូរល្អវិចិត្របំផុតចំពោះភ្នែកអត់ជំនាញវិចិត្រករ។ តាមពិត លោករចនារូបភាពនេះដោយការប្រើម៉ាស៊ីនដេរ។
លោក អារុន ពិតជាពូកែគូររូប និងផាត់ពណ៌ ដោយលោកមានក្ដីសុបិនចង់ក្លាយជាជាងគំនូរល្បីឈ្មោះម្នាក់។ ប៉ុន្ដែមរណភាពរបស់ឪពុកលោកភ្លាមៗ កាលពី ១៥ ឆ្នាំមុន បានរំលាយក្ដីស្រមៃ និងបង្ខំរូបលោកបោះបង់ការសិក្សាដើម្បីបន្ដវេណមុខរបរពីគ្រួសារ។ ឪពុកលោកជាជាងកាត់ដេរ ហើយលោកក៏ចាប់អាជីពនេះបន្ដ តែលោកមិនបណ្ដោយឲ្យជំនាញវិចិត្រកររបស់លោកស្លាប់នោះទេ។
ខុសពីជំនាញគូររូប លោកបានប្រើម្ជុរ និងអំបោះ តែមិនប្រើដៃផ្ទាល់ លោកបានសម្រេចប្រើឧបករណ៍ម៉ាស៊ីនដេរតែម្ដង។ វាត្រូវការពេលវេលាយូរដើម្បីឲ្យលោកស្ទាត់នឹងជំនាញថ្មីនេះ តែបច្ចុប្បន្នលោកត្រូវបានទទួលស្គាល់ជាវិចិត្រករម៉ាស៊ីនដេរទូទាំងពិភពលោក។
វិចិត្រករម៉ាស៊ីនដេរ អាយុ ៣៥ ឆ្នាំ បានប្រាប់ DNA India ថា៖ «ខ្ញុំបានចាប់ជំនាញដេរនេះ ២៣ ឆ្នាំហើយ។ ឪពុកខ្ញុំជាជាងដេរ តែគាត់ឆាប់ស្លាប់ពេក ពេលខ្ញុំអាយុទើប ១៦ ឆ្នាំ ហើយខ្ញុំត្រូវបោះបង់ការសិក្សាមកបន្ដវេណហាងនេះ។ កាលនៅរៀន ខ្ញុំពូកែខាងគូររូប ហើយខ្ញុំក៏ចាប់ផ្ដើមប្រើជំនាញគូររូប និងដេរចូលគ្នា»។
ស្នាដៃគំនូរដេរល្បីៗបំផុតខ្លះរបស់លោក រួមមាន គំនូរស្ដេចគ្រីស្នា ទំហំ ៦x៤ ដែលលោកចំណាយពេលដេរ ៣ ឆ្នាំ និងសរសៃអំពោះ ២៨៣៩០០០ ម៉ែត្រ ឬគំនូរតុលាការ រ៉ាន់ជិត ស៊ីញ ទំហំ ៤x២ រូបមហារាជា ស៊ីក ដែលរូបមនុស្សតូចៗជិត ២០០០ នាក់។ រូបនេះ វិចិត្រករម៉ាស៊ីនដេរត្រូវការពេលជាង ១ ឆ្នាំ។
លោក អារុន បានបើករបរដេរសម្លៀកបំពាក់ក្នុងសង្កាត់ អាដាឡាត បាហ្សារ នៃក្រុងផាទីយ៉ាឡា ប្រទេសឥណ្ឌា តែលោកបានចំណាយទឹកចិត្ដ និងពេលវេលាលើសិល្បៈគំនូរយ៉ាងច្រើន៕ HR
ប្រភព odditycentral.com
