.jpg)
ចង្វាក់ផលិតកម្មស្រាបៀរនៅនីហ្សេរីយ៉ាក៏ហក់ឡើងខ្លាំង។ រូបថត AFP
ក្រុងអាប៊ូហ្សា: ផ្ទាំងប៉ាណូធំៗផ្សព្វផ្សាយពីផលិតផលស្រាបៀរពេលនេះ គ្របដណ្ដប់ពាសពេញទីក្រុងអគារខ្ពស់កប់ពពកនៅក្រុងឡាហ្គោស ប្រទេសនីហ្សេរីយ៉ា ដែលបង្ហាញពីកំណើនប្រដេញគ្នារវាងក្រុមហ៊ុនស្រាបៀរចម្រុះជាតិសាសន៍ខិតខំបំពេញតម្រូវការអ្នកទទួលទានក្នុងប្រទេសមានប្រជាជនច្រើនបំផុតនៅអាហ្វ្រិកមួយនេះ។
បច្ចុប្បន្នវាគ្រាន់តែជាទីផ្សារថ្មីដែលពលរដ្ឋទទួលទានស្រាបៀរជាមធ្យមតែ ៩ លីត្រក្នុង ១ ឆ្នាំសម្រាប់មនុស្សម្នាក់ស្ថិតនៅក្រោមបណ្ដាប្រទេសនៅអាហ្វ្រិក ដែលមានចំនួនមធ្យម ៥៧ លីត្រ។ នេះយោងតាមក្រុមហ៊ុនស្រាវជ្រាវទីផ្សារ Euromonitor។
ប៉ុន្ដែជាមួយប្រជាជនជាងពាក់កណ្ដាលចំណោម ១៩០ លាននាក់អាយុក្រោម ៣០ ឆ្នាំហើយចំនួនប្រជាជនសរុបរំពឹងថានឹងហក់ដល់ ៤១០ លាននាក់ក្នុងឆ្នាំ ២០៥០ ដែលក្រុមហ៊ុនផលិតស្រាបៀរយក្សក្នុងពិភពលោកសម្លឹងស្រក់ទឹកមាត់។
ក្រុមហ៊ុនស្រាបៀរយក្សជាច្រើនកំពុងប្រជែងដណ្ដើមទីផ្សារនៅនីហ្សេរីយ៉ា។ AFP
រយៈពេលជាច្រើនឆ្នាំក្រុមហ៊ុនធំៗជាច្រើនបានបោះជំហានចូលទីផ្សារនីហ្សេរីយ៉ា ដូចជា Gulder, Star និង Heineken ជាដើម។
ការផ្សព្វផ្សាយបានក្លាយជាការប្រកួតប្រជែងចំណោមក្រុមហ៊ុនស្រាបៀរនានា ដោយពួកគេប្រញាយរៀបចំការប្រគំតន្ដ្រី កម្មវិធីហ្វាសសិន និងជប់លៀងលើទូកកម្សាន្ដដើម្បីទាក់ចិត្ដអតិថិជន។
ម្ចាស់ភោជនីយដ្ឋាន និងក្លិបកម្សាន្ដនិយាយថា ពួកគេត្រូវបានក្រុមហ៊ុនស្រាបៀរចាត់ទុកជាស្ដេចដោយពួកគេជាអ្នករកចំណូលឲ្យក្រុមហ៊ុន។
នាយករោងចក្រ AB InBev ថូនី អាហ្គា ប្រាប់ AFP ថា៖ «អ្នកទទួលទានផ្ដើមកត់សម្គាល់ឃើញថាមានឆាកប្រយុទ្ធយ៉ាងសម្បើមក្នុងទីក្រុង។ នោះគឺជាសង្គ្រាមស្រាបៀរ»។
នីហ្សេរីយ៉ា គឺជាទីផ្សារដ៏ចម្រុងចម្រើន៕ HR
