.jpg)
ការប្រគល់ពានរង្វាន់ជយលាភីស្នាដៃអក្សរសិល្ប៍ស្លឹករឹតលើកទី១ នៅវិទ្យាស្ថានពុទ្ធសាសនបណ្ឌិត្យ។ ហេង ជីវ័ន
ភ្នំពេញ៖ នៅទីបំផុតការប្រកួតប្រជែងតែងនិពន្ធរឿងខ្លីពានរង្វាន់អក្សរសិល្ប៍ស្លឹករឹតលើកទី១ ឆ្នាំ ២០២០ ក្រោមប្រធានបទ «ជីវិតរស់នៅប្រចាំថ្ងៃរបស់ប្រជជនកម្ពុជាក្នុងរបបកម្ពុជាប្រជាធិបតេយ្យ» ដែលសមាគមអ្នកនិពន្ធខ្មែរ សហការរៀបចំជាមួយមជ្ឈមណ្ឌលឯកសារកម្ពុជាបានប្រគល់ពានរង្វាន់ដល់ម្ចាស់ជយលាភីចំនួន ៩ កាលពីថ្ងៃទី ៤ ខែ សីហា ឆ្នាំ ២០២០។
លោកបណ្ឌិត ព្រឿង ប្រណីត ដែលជាប្រធានសមាគមអ្នកនិពន្ធខ្មែរ បានមានប្រសាសន៍រំឭកពីដំណើរការរៀបចំប្រកួតប្រជែងនាឱកាសប្រគល់ពានរង្វាន់អក្សរសិល្បិ៍ស្លឹករឹត ទៅដល់ម្ចាស់ជយលាភីលើកទី១ នៅឯវិទ្យាស្ថានពុទ្ធសាសនបណ្ឌិត្យថា៖ ថ្ងៃនេះ គឺជាទិវាដ៏នក្ខត្តឫក្សមួយ ដែលសមាគមអ្នកនិពន្ធខ្មែរ សហការជាមួយនឹងមជ្ឈមណ្ឌលឯកសារកម្ពុជា ប្រារព្ធពិធីប្រកាស និងប្រគល់ពានរង្វាន់អក្សរសិល្ប៍ស្លឹករឹតលើកទី១ ឆ្នាំ ២០២០។
ក្នុងន័យនេះ ដើម្បីធ្វើឲ្យបានសម្រេចនូវគោលបំណងខាងលើសមាគមអ្នកនិពន្ធខ្មែរ និងមជ្ឈមណ្ឌលឯកសារកម្ពុជាបានសហការរៀបចំការប្រកួតប្រជែងស្នាដៃតែងនិពន្ធរឿងខ្លីលើកទី១ នេះ តាំងពីខែ កញ្ញា ឆ្នាំ ២០១៩។ គណៈកម្មការរៀបចំ ហើយបានធ្វើការផ្សព្វផ្សាយជាសាធារណៈ តាមរយៈការផ្សព្វផ្សាយលើបណ្ដាញទំនាក់ទំនងសង្គម ទៅដល់សាធារណជន កវីនិពន្ធ សិស្ស និស្សិត អ្នកសិក្សាស្រាវជ្រាវឲ្យចូលរួមបញ្ចេញនូវសមត្ថភាព និងទេពកោសល្យរបស់ខ្លួនក្នុងបំណងចង់ឲ្យអ្នកដែលធ្លាប់ឆ្លងកាត់ និងអ្នកដែលធ្លាប់ឮរឿងរ៉ាវក្នុងសម័យនោះ គ្រប់ទីកន្លែងនៅក្នុងប្រទេសកម្ពុជា ចូលរួមសរសេររំឭកអំពីព្រឹត្តិការណ៍ទាំងនោះ ទុកជាឯកសារប្រវត្តិសាស្រ្ត ក៏ដូចជាការលើកគុណតម្លៃនៃវិស័យតែងនិពន្ធឲ្យមានគុណភាព និងគុណតម្លៃអប់រំ សម្រាប់សង្គមទាំងនៅបច្ចុប្បន្ន និងនាពេលអនាគត។
ប្រធានសមាគមអ្នកនិពន្ធខ្មែររូបនេះបន្តថា៖ «តាមរយៈការផ្សព្វផ្សាយ និងការរៀបចំសិក្ខាសាលានេះ គណៈកម្មការរៀបចំការប្រកួតទទួលបាន ៦៧ ស្នាដៃ (ស្នាដៃជា Soft copy ចំនួន ៤៩ ស្នាដៃ និងជាសៀវភៅចំនួន ១៨ ស្នាដៃ) ដែលក្នុងនោះ មានអ្នកនិពន្ធរៀមច្បងបានចូលរួមប្រមាណ ២០% អ្នកនិពន្ធជំនាន់ថ្មី មានប្រមាណ ៥០% និងមិនមែនជាអ្នកនិពន្ធប្រមាណ ៣០% ដែលមកពីរាជធានីខេត្តក្រុងមានចំនួន ១១»។
លោក អ៊ុច សំណាង(កណ្តាល)ជយលាភីលេខ ១ ស្ទួន។ហេង ជីវ័ន
នៅក្នុងការវិនិច្ឆ័យ វាយតម្លៃដាក់ពិន្ទុ ដើម្បីជ្រើសរើសជម្រុះ ចម្រាញ់ ដើម្បីទទួលបានពានរង្វាន់សមាគមអ្នកនិពន្ធខ្មែរបង្កើតនូវអនុគណៈកម្មការចំនួន ១ គឺអនុគណៈកម្មការជ្រើសរើសស្នាដៃតែងនិពន្ធរឿងខ្លី ដោយបានអនុវត្តទៅតាមលក្ខណសម្បត្តិសំខាន់ ៣ យ៉ាង ដែលជាគោលគឺទី១ អត្ថន័យ យើងបានកំណត់យកលើគុណធម៌ សច្ចធម៌ និងសីលធម៌។ ចំណែកឯចំណុចទី២ អត្ថរូប ដែលមានវិធីតែង រចនាប័ទ្ម និងសោភ័ណ។ ចំណែកទី៣ អត្ថរស ដែលមានតម្លៃអប់រំតម្លៃជាតិ និងតម្លៃរីកចម្រើន។
បណ្ឌិត ព្រឿង ប្រណីត បានបន្ថែមថា៖ «បន្ទាប់ពីបានពិនិត្យ និងវាយតម្លៃទាំង ២ ដំណាក់កាលអស់រយៈពេលជាង ៣ ខែ គណៈកម្មការវាយតម្លៃស្នាដៃបានរកឃើញនូវស្នាដៃ ដែលមានលក្ខណសម្បត្តិល្អ ស័ក្ដិសមនឹងទទួលបានពានរង្វាន់អក្សរសិល្ប៍ស្លឹករឹត លើកទី១ ឆ្នាំ ២០២០ នេះ គឺយើងជ្រើសរើសបានចំនួន ៩ ស្នាដៃ។ សម្រាប់ជយលាភីលេខ ១ ស្ទួន មានចំនួន ២ រូបគឺម្ចាស់ជយលាភីលោក អ៊ុច សំណាង ដែលបាននិពន្ធរឿង «បាយក្តាំង» និងលោក អៀ ហុកនីម ដែលនិពន្ធរឿង «ពេលម៉ែឃ្លាតទៅ»។
ចំណែកឯជយលាភីលេខ ៣ គឺបានទៅលោក វ៉ា មឿន ដែលនិពន្ធរឿង «ស្នាមដំបៅ» និងជយលាភីលេខ ៤ ស្ទួន មានចំនួន ៦ រូប រួមមានដូចជារឿង «ក្រោមមេឃតែមួយ» របស់អ្នកនិពន្ធ ឃុត សុខខឿន រឿង «ព្រះអាទិត្យឥតពន្លឺ» របស់អ្នកនិពន្ធវ័យក្មេងកញ្ញា គង់ ច័ន្ទវ៉ាន់ណេង រឿង «មួយថ្ងៃមួយយប់» របស់អ្នកនិពន្ធ ម៉ៅ វណ្ណឌី រឿង «ជើងមេឃពណ៌ក្រហម» របស់អ្នកនិពន្ធ ឆាន់ វុត្ថា រឿង «មិនព្រមរៀបការ» របស់អ្នកនិពន្ធ គឹម សាត រឿង «អាប់សែ» របស់អ្នកនិពន្ធ រឹម ទិត្យបញ្ញា» សម្រាប់ការប្រកួតលើកទី១៕
អ្នកនិពន្ធវ័យក្មេងកញ្ញា គង់ ច័ន្ទវ៉ាន់ណេង ម្ចាស់ជយលាភីលេខ ៤។ហេង ជីវ័ន
ការរក្សាគម្លាតក្នុងពេលប្រគល់ពានរង្វាន់អក្សរសិល្បិ៍ស្លឹករឹតលើកទី១។ ហេង ជីវ័ន
