.jpg)
កញ្ញា សាយ ចាន់រាសី នាពេលចូលរួមសម្ពោធកុនដុំរឿង «ថេកចុងក្រោយ» កន្លងមក។ រូបថត សហការី
ភ្នំពេញ៖ បន្ទាប់ពីប្រឡូកនៅក្នុងវិស័យសិល្បៈជាង ២ ឆ្នាំ តារាសម្តែងស្រីសាច់សខ្ចី កញ្ញា សាយ ចាន់រាសី ដែលបានសម្តែងកុនជាច្រើនទាំងដុំ និងភាគ ហើយភាគច្រើនសម្តែងតួឆ្នាសនោះ នៅមិនទាន់មានឱកាសក្លាយជាតួឯកនៅឡើយទេ ទើបតែត្រៀមគ្រងតំណែងតួឯកដំបូងក្នុងកុនក្រោយ បន្ទាប់ពីរឿង «ថេកចុងក្រោយ» របស់ផលិតកម្ម LD។
តារាស្រីមានទេពកោសល្យសម្តែងក្នុងកុនភាគខ្នាតធំផលិតកម្មអិលឌីរឿង «ថ្ងៃមុនស្អប់ ថ្ងៃនេះស្រឡាញ់» ដែលសម្តែងតួអង្គឆ្នាសឆ្នើម និងចាប់ដៃគូជាមួយនឹងតារាសម្តែង និងចម្រៀងប្រុសលោក នូ ឧសភា។
ជំនួបក្នុងការសម្ពោធកុនរឿង «The Last Tag ថេកចុងក្រោយ» កាលពីថ្ងៃទី ២២ ខែមករា កន្លងមក កញ្ញា សាយ ចាន់រាសី បានប្រាប់មកភ្នំពេញប៉ុស្តិ៍ថា៖ «តាំងពីចូលសិល្បៈជាង ២ ឆ្នាំមក ភាគច្រើននាងខ្ញុំសម្តែងជាតួកាចមករហូត មិនធ្លាប់សម្តែងជាតួស្លូត ឬតួឯកនោះទេ។ នៅក្នុងរឿងនេះ ក៏ដូចជារឿងមុនៗដែរ និយាយទៅ ដើរតួកាច ហើយសម្បូរល្បិចទៀតផង»។
គួរបញ្ជាក់ថា រឿង «ថេកចុងក្រោយ» ជាខ្សែភាពយន្តធំ កំពុងចាក់បញ្ចាំងនៅគ្រប់រោងកុន កាលពីថ្ងៃទី ២៣ ខែមករា កន្លងមក ដែលជាស្នាដៃនិពន្ធទី២ របស់លោក នួន ម៉ូលីន គឺជាអ្នកនិពន្ធវ័យក្មេង ស្តែងចេញពីគ្រួសារមួយស្រឡាញ់កូនមិនស្មើគ្នារហូតធ្វើឲ្យកើតមានការច្រណែនគ្នារហូតបាត់បង់សមាជិកនៃគ្រួសារ។
កញ្ញា សាយ ចាន់រាសី នាពេលចូលរួមសម្ពោធកុនដុំរឿង «ថេកចុងក្រោយ» កន្លងមក។ រូបថត សហការី
តារាសម្តែងស្រីកញ្ញា សាយ ចាន់រាសី ក៏បានបន្ថែមឲ្យដឹងពីការសម្តែងក្នុងរឿង «The Last Tag-ថេកចុងក្រោយ» នេះដែរថា៖ «រឿង ថេកចុងក្រោយ ខ្ញុំសម្តែងជាតួអង្គដែលមានភាពអាត្មានិយម គិតតែពីខ្លួនឯងមិនខ្វល់ថា អ្នកណាត្រូវជួបរឿងអីនោះឡើយ សូម្បីតែមិត្តភក្តិស្និទ្ធស្នាល ហើយខ្ញុំក៏មានចំណែកមួយក្នុងការធ្វើឲ្យតួឯកស្រីនៅក្នុងរឿងនេះស្លាប់ដែរ»។
កញ្ញា សាយ ចាន់រាសី ក៏បានបញ្ជាក់ថា ខ្សែភាពយន្ត «The Last Tag-ថេកចុងក្រោយ» ជាខ្សែភាពយន្តមួយ ដែលស្តែងពីតថភាពរបស់សង្គម និងផ្តល់តម្លៃអប់រំ កុំឲ្យមានការទុកចិត្តទៅលើមនុស្សនៅជុំវិញខ្លួនច្រើនពេកអី ទោះបីជាមិត្តភក្តិស្និទ្ធស្នាល ឬអ្នករស់នៅក្នុងរង្វង់គ្រួសារខ្លួនក៏ដោយ។
តារាសម្តែងស្រីវ័យ ២៧ ឆ្នាំ សាយ ចាន់រាសី ក៏បានបង្ហើបពីឱកាសសម្តែងជាតួឯកស្រីក្នុងកុនដុំថ្មីផលិតកម្ម LD ថា៖ «បន្ទាប់ពីរឿងនេះ បានចាក់បញ្ចាំងរួចហើយ នៅខែក្រោយនេះ ខ្ញុំក៏ចាប់ផ្តើមថតកុនថ្មីរឿង «លោកប្តី វគ្គ ២» ដែលត្រូវសម្តែងជា តួឯកស្រីហើយក៏ជាកុនដំបូងនៃតំណែងតួឯកស្រី បន្ទាប់ពីខ្ញុំបានសម្តែងក្នុងផលិតកម្មអិលឌី ប្រហែលជា ៤ ទៅ ៥ រឿងមក»៕
