.jpg)
សិប្បកម្មផលិតកូនជ្រូករូបសត្វតម្រាឆ្នាំទាំង ១២ និងតុក្កតាគំនូរជីវចលល្បីៗទាក់ទាញភ្ញៀវទេសចរបរទេសមកទស្សនា។ កែវ រតនា
សៀមរាប: សិប្បកម្មផលិតកូនជ្រូកសន្សំលុយ ជាទីសំចតមួយ ក្នុងចំណោមគោលដៅទេសចរណ៍ជាច្រើនកន្លែងសម្រាប់ភ្ញៀវទេសចរ ជាតិ និងអន្ដរជាតិ ដែលប្រាថ្នាស្វែងយល់ពីជីវភាព និងភ្លក្សបទពិសោធផ្ទាល់អំពីការរស់នៅបែបស្រុកស្រែចម្ការក្នុងទឹកដីសៀមរាបអង្គរ។
ដោយផ្ដើមសិប្បកម្មជាមុខរបរចិញ្ចឹមជីវិតក្នុងឆ្នាំ ២០០៥ អ្នកស្រី អុង ពិសី អាយុ ៥៣ ឆ្នាំស្ថិតក្នុងក្រុមទី ៥ ភូមិក្រវាន់ ឃុំអង្គរធំ ស្រុកអង្គរធំ ខេត្ដសៀមរាប បានទាក់ចិត្ដភ្ញៀវទេសចរចង់ស្គាល់ពីវិធីផលិតសម្ភារសន្សំលុយកាក់ពីបុរមបុរាណ ដែលរំលេចរូបរាងសត្វប្លែកៗចាប់ពីសត្វឆ្នាំទាំង ១២ ក្នុងតម្រាខ្មែរ រហូតដល់សត្វក្នុងភាពយន្ដតុក្កតាដ៏ពេញនិយម ដូចជា Angry Birds និង Minions ជាដើម។
សិប្បករកូនជ្រូកសន្សំលុយ រូបនេះ បាននិយាយថា៖ «រូបចម្លាក់សត្វទាំងអស់ទាំងនៅក្នុងតម្រាឆ្នាំ និងតុក្កតាបរទេសសុទ្ធតែជាប្រភេទកូនជ្រូកសន្សំលុយ លើកលែងតែកូនដំរីបែបបុរាណ រចនាប័ទ្មសតវត្សរ៍ទី ១៩ (តម្លៃបោះដុំ ៣ ដុល្លារ) ដែលភ្ញៀវបរទេសចូលចិត្ដទិញយកទៅតាំងលើតុ ឬអាចដោតផ្កាបានមួយទង»។
អ្នកស្រីប្រាប់ថា៖ «ចំពោះកូនជ្រូករូបសត្វធំៗ មានតម្លៃបោះដុំចាប់ពី ១ ម៉ឺនរៀល ខណៈកូនជ្រូកតូចៗ ដូចជា Angry Bird និង Minions មានតម្លៃចាប់ពី ៥ ពាន់រៀលទៅដល់ ៨ ពាន់រៀល»។
ចំពោះដំណើរការនៃការសម្អាតដីឥដ្ឋសម្រាប់សូន្យជារូបសត្វផ្សេងៗរហូតដល់ការដុតក្នុងឡ និងលាបពណ៌ ដែលមានរយៈពេល ១៥ ថ្ងៃ អ្នកស្រីពិសីទទួលបានប្រាក់កម្រៃ ១១៥០០០០ រៀល ក្នុងមួយឡនេះ។ ប៉ុន្ដែអ្នកស្រីប្រាប់ថា នៅរដូវវស្សានេះ ការផលិតកូនជ្រូកសន្សំលុយមានការធ្លាក់ចុះមកត្រឹមមួយឡ មានកូនជ្រូកធំ ១២ គ្រាប់ និងកូនជ្រូកតូចៗពី ៣០ ទៅ ៣៥ គ្រាប់។
ជាមួយនឹងសេវាកម្មទេសចរណ៍ដែលរៀបចំឡើងដោយក្រុមហ៊ុន Butterfly Tours សិប្បកម្មផលិតកូនជ្រូកសន្សំលុយរបស់អ្នកស្រី អុង ពិសី អាចទទួលស្វាគមន៍ទេសចរពី ២ ទៅ ៣ ក្រុមក្នុង ១ ថ្ងៃ។
ក្នុងដំណើរភ្ញៀវមកទស្សនា អ្នកស្រី បានប្រាប់ថា៖ «ដំបូងយើងរៀបរាប់ប្រាប់គាត់ [មគ្គុទេ្ទសក៍] តាំងពីដើមទីនូវវិធីលញ់ដីឥដ្ឋរហូតដល់ដុតក្នុងឡ និងលាបថ្នាំពណ៌។ បន្ទាប់មក ពួកគាត់ នាំភ្ញៀវមកដើរមើលយើងធ្វើជាហូរហែ»។
ចំពោះផលចំណេញពីការនាំភ្ញៀវមើលពីដំណើរការនៃការផលិតកូនជ្រូកសន្សំលុយនេះ អ្នកស្រីបានប្រាប់ថា៖ «គាត់មានស្រោមសំបុត្រ សម្រាប់យើងដែរ។ ភ្ញៀវខ្លះពេញចិត្ដ គាត់ទិញកូនដំរី ជាវត្ថុអនុស្សាវរីយ៍តូច។ ទៅថ្ងៃខាងមុខ យើងក៏នឹងផលិតវត្ថុតូចទាំងនេះដើម្បីភ្ញៀវងាយស្រួលទុកដាក់តាមខ្លួន»។
គួរបញ្ជាក់ថា Butterfly Tours ដែលផ្ដល់សេវាកម្មទេសចរណ៍ដោយមគ្គុទេ្ទសក៍ជានិស្សិតមកពីជនបទដើម្បីឲ្យភ្ញៀវបានស្គាល់នូវរបៀបរបបការរស់នៅ និងប្រពៃណីវប្បធម៌របស់ពលរដ្ឋបែបស្រុកស្រែជនបទទាំងនៅសៀមរាបបាត់ដំបង និងកំពត តែងតែដឹកនាំភ្ញៀវបរទេសស្ទើរតែរៀងរាល់ថ្ងៃទៅកាន់ភូមិសិប្បកម្មផលិតកូនជ្រូកសន្សំលុយ ដើម្បីឲ្យពួកគេបានឃើញ និងសាកល្បងពីវិធីសូនរូបសត្វ សម្រាប់ញាត់សន្សំលុយ ព្រមទាំងមានឱកាសបានទិញវត្ថុអនុស្សាវរីយ៍ខ្លះត្រឡប់ទៅផ្ទះវិញ។
នាយកគ្រប់គ្រងផ្នែកប្រតិបត្ដិរបស់ក្រុមហ៊ុន Butterfly Tours អ្នកស្រី សុខ ហេង បាននិយាយថា៖ «យើងខ្ញុំតែងតែរៀបចំកម្មវិធីនាំភ្ញៀវ ដែលភាគច្រើនជាជាតិអាមេរិក និងអឺរ៉ុបទៅទស្សនាស្វែងយល់ពីការផលិតកូនជ្រូកសន្សំលុយ ក្នុងចំណោមសកម្មភាពជាច្រើនទៀត»៕
កូនជ្រូករូបតុក្កតា Angry Bird។ ហ្វេសប៊ុក/Butterfly Tours
