ភ្នំពេញ៖ ក្រោយពីបានរៀបការនឹងស្វាមីទី២ ជាជនជាតិអូស្ត្រាលីលោក Seraj Sutton មកមហាជនសង្កេតឃើញថា ពិធីការិនីល្បីប្រចាំទូរទស្សន៍ My TV និង CTN អ្នកនាង ខៀវ សានសាណា កាន់តែមានភាពហ៊ឺហា និងមានទ្រព្យធនក៏ច្រើន ដូចជា ករណីថ្មីៗនេះ ស្រាប់តែឃើញអ្នកនាង ខៀវ សានសាណា ផូស្តរូបរថយន្តទំនើបម៉ាក Roll-Rolyce ទើបតែទិញ។
កន្លងមកថ្មីៗនេះ មជ្ឈដ្ឋានមហាជនសង្កេតឃើញថា តារាប្រុសស្រីល្បីៗរបស់ខ្មែរ បានបង្ហាញភាពជោគជ័យរបស់ខ្លួន ដោយការរស់នៅក្នុងជីវិតកាលីប ប្រើប្រាស់របស់របរប្រ៊េនថ្លៃៗ ជិះសុទ្ធតែរថយន្តទំនើបៗ តម្លៃរាប់ម៉ឺនដុល្លារ តួយ៉ាងមានតារាចម្រៀងលោក ងួន ចាន់ដេវីត និងលោក ខេមរៈ សិរីមន្ត ជាដើម កំពុងប្រើប្រាស់រថយន្តទំនើបតម្លៃខ្ទង់កន្លះលានដុល្លារ ម៉ាក Roll-Royce ជិះជាកម្មសិទ្ធិផ្ទាល់ខ្លួន។
អ្វីដែលធ្វើឱ្យមហាជនស្ញប់ស្ញែងចំពោះជីវិតរស់នៅសុខស្រួលសម្បូរសប្បាយជាមួយរថយន្តទំនើបនេះយ៉ាងខ្លាំង ស្រាប់តែថ្មីៗនេះពិធីការិនីអ្នកនាង ខៀវ សានសាណា ធ្វើឱ្យមហាជនភ្ញាក់ផ្អើលខ្លាំង បន្ទាប់ពីអ្នកនាងបង្ហាញរថយន្តទំនើបម៉ាក Roll-Royce ដ៏ថ្មីសន្លាង ១ គ្រឿងបង្ហោះក្នុង Story នៃហ្វេសប៊ុករបស់ខ្លួន។ កាន់តែច្បាស់នោះ គឺការបង្ហាញរថយន្តស៊េរីទំនើបខ្លួនដោយមានដាក់ស្លាកលេខពិសេស គឺមានដាក់ឈ្មោះថា «កម្ពុជា K.SAN.01» ទៀតផង ដែលធ្វើឱ្យមហាជនយល់ថា រថយន្តនេះ ពិធីការិនីទើបតែទិញក្ដៅៗតែម្តង។
ពិធីការិនីល្បីប្រចាំទូរទស្សន៍ My TV និង CTN អ្នកនាង ខៀវ សានសាណា ដែលបានដឹកដៃស្វាមីជាជនជាតិអូស្ត្រាលីលោក Seraj Sutton ទិញខុនដូ ១ កន្លែងជាន់ទី១៨ នៅក្នុងអ័រគីដេឌឺរ៉ូយ៉ាល់ខុនដូមីនីម ដែលមានទីតាំងស្ថិតនៅតាមដងផ្លូវម៉ៃដា ឬផ្លូវលេខ ២០០៤ ហើយបានបង្កការភ្ញាក់ផ្អើលនៅតាមអ៊ីនស្តាក្រាម ដល់មហាជនកាលពីពាក់កណ្តាលឆ្នាំ ២០១៧ ក៏ប្រាប់ពីមូលហេតុពន្យារពេលត្រៀមខ្លួនពពោះសម្រាប់ស្វាមីទី២ ក្រោយពីមានលេចឮដំណឹងនោះ។
ពិធីការិនីអ្នកនាង ខៀវ សានសាណា ក៏បង្ហើបឱ្យដឹងពីក្តីប្រាថ្នារបស់ស្វាមីចង់បានកូនដែរមួយរយៈពេលចុងក្រោយនេះថា តាមពិតទៅស្វាមីខ្ញុំគាត់ក៏ចង់បានកូនឆាប់ៗផងដែរ ហើយជាពិសេសនោះ នៅពេលគាត់ ឮដំណឹងថា កូនប្រុសច្បងប្រពន្ធមុនរបស់គាត់កំពុងតែមានដំណឹងល្អបានកូន ហើយគាត់ក៏នឹងក្លាយជាជីតារបស់គេ គាត់បានសួរនាំខ្ញុំរឿងមានកូននេះភ្លាមៗផងដែរ តែក្រោយមកនាងខ្ញុំក៏សុំចិត្តទៅគាត់ និងបង្វែរស្ថានការណ៍ថា ឥឡូវនេះ បងមានចៅហើយក៏កុំទាន់អាលមានកូនអី៕