ភ្នំពេញ៖ ខុសប្លែកស្រឡះពីការហាត់ប្រាណទូទៅតាមសួនច្បារ កីឡដ្ឋាន និងក្រោមស្ពាន វិធីថ្មីសន្លាងនាំយកមកកាន់ប្រទេសកម្ពុជា ដោយអ្នកគ្រូជនជាតិបារាំង ម៉ារីឡ ឌូ្រហ្វិន (Marylaure Dufrenne) គឺការហាត់សម្រួលកាយអារម្មណ៍ឱ្យស្រស់ថ្លា ដោយរៀបចំចានដាក់ជុំវិញខ្លួន ឬនៅលើខ្លួនដោយប្រើការគោះចានលោហៈ ដើម្បីទាញភាពរំញ័រនៃរាងកាយឱ្យមានស្ថិរភាព បន្ធូរដល់ការគិត និងរាងកាយ។
វិធីលំហាត់កាយអារម្មណ៍ និងព្យាបាលដោយសំឡេង (Sound Healing) នេះត្រូវបានសិក្សាឃើញថា វាជំនួយដល់សុខភាពផ្លូវចិត្តជាពិសេសតែម្ដង។
អ្នកស្រី ម៉ារីឡ ឌូហ្វិន បានរៀបរាប់ពីចំណុចផ្ដើមដែលធ្វើឱ្យអ្នកស្រីបានស្គាល់ និងចាប់ផ្ដើមការព្យាបាលដោយសំឡេងមកកាន់ ភ្នំពេញ ប៉ុស្តិ៍ ថា៖ «រយៈពេល ៨ ឆ្នាំ ខ្ញុំធ្វើការជាប្រធានផ្នែកលក់នៅក្រុមហ៊ុនធំមួយរបស់អាមេរិក។
ខ្ញុំធ្វើការនៅក្នុងការរងសម្ពាធ ត្រូវមានការទទួលខុសត្រូវខ្ពស់ដែលធ្វើឱ្យខ្ញុំមានការស្ត្រេសយ៉ាងខ្លាំង។ ថ្ងៃ ១ ខ្ញុំគិតថា ខ្ញុំមិនអាចទ្រាំទ្រទៀតទេ ខ្ញុំក៏ឈប់ពីការងារ និងផ្លាស់មករស់នៅលើទឹកដីឥណ្ឌា»។
អ្នកស្រីបន្តទៀតថា៖ «ខ្ញុំបានស្គាល់ការព្យាបាលសំឡេងនៅព្រះវិហារឥណ្ឌា។ ខ្ញុំចាំបានថា លើកដំបូងដែលបានឮសំឡេងគោះចាន ខ្ញុំមានការចាប់អារម្មណ៍យ៉ាងខ្លាំងទៅលើឥទ្ធិពលនៃសំឡេង និងភាពញ័ររបស់វា។ ខ្ញុំដល់ថ្នាក់យំព្រោះតែទទួលបានភាពធូរស្រាល និងឥទ្ធិពលពីការព្យាបាលពីសំឡេងនោះ»។
កាលពីឆ្នាំទៅ ២០២០ ខែមករា អ្នកស្រី ម៉ារីឡ បានផ្លាស់មករស់នៅលើទឹកដីកម្ពុជាដោយអ្នកស្រីមានគ្រួសារទីនេះ ហើយអ្នកស្រីក៏បានផ្ដើមធ្វើជាគ្រូបង្វឹកយោគៈ និងការព្យាបាលដោយសំឡេង។
អ្នកស្រីក៏បានពន្យល់បន្ថែមទៅលើការហាត់យោគៈ និងការព្យាបាលដោយសំឡេងថា ការព្យាបាលដោយសំឡេង គឺជាការបំពេញបន្ថែមយោគៈ ប៉ុន្តែវាមានការអនុវត្តខុសគ្នា។
យោគៈមានលក្ខណៈស្វាហាប់ ហើយពាក់ព័ន្ធនឹងចលនារាងកាយ។
រីឯការព្យាបាលដោយសំឡេង គឺជាការអនុវត្តអកម្មផ្តោតលើការសម្រាកលម្ហែនៃខួរក្បាល។ វាអាចហាត់ម្នាក់ឯង ឬគ្នា ២ នាក់។ បើលើសពីនេះគេហៅថា Sound Bath។
អ្នកស្រីក៏បានឱ្យដឹងពីរបៀបដែលអ្នកស្រីតែងតែអនុវត្តជាមួយអតិថិជនរបស់អ្នកស្រីថា៖ «ដំបូងខ្ញុំនឹងជួបពិភាក្សាពីបញ្ហាដែលពួកគាត់ជួបដែលធ្វើឱ្យគាត់មានអារម្មណ៍មិនល្អ។ រួចទើបដាក់ពួកគាត់ឱ្យគេងផ្កាប់ ឬផ្ងារហើយរៀបចានជុំវិញ និងគោះជាសំឡេងម្ដងបន្តិចៗ។ ជំហានចុងក្រោយខ្ញុំនឹងផ្ដល់ជាដំបូន្មានសម្រាប់ពួកគាត់ ទៅលើផ្នែកណាដែលគាត់គួរយកចិត្តទុកដាក់បន្ថែម»។
តាមរយៈការសិក្សា និងការហ្វឹកហាត់របស់អ្នកស្រីនៅឥណ្ឌាសំឡេងនៃចានគោះនេះ អ្នកស្រីក៏បានបកស្រាយពីដំណើរ ដែលធ្វើឱ្យវាជួយសម្រួលដល់សុខភាពផ្លូវចិត្តដែលថា វាជាចានដែលនាំចូលពីប្រទេសនេប៉ាល់ ហើយវាត្រូវបានធ្វើជាពិសេសសម្រាប់ការព្យាបាលនេះ។
អ្នកស្រីបានពន្យល់ថា៖ «នៅពេលដែលរាងកាយយើងស្រ្តេស ព្រួយបារម្ភ ឬគិតច្រើនហ្វ្រេកង់របស់យើងមិនមានលំនឹងដែលអាចនឹងធ្លាក់ចុះជាងធម្មតា ដូចនេះភាពរំញ័រនៃសំឡេងចានបន្ទាប់ពីគោះនឹងសម្រួលហ្វ្រេកង់យើងឱ្យមកធម្មតា ហើយលើសពីនេះវាកាត់បន្ថយការស្ត្រេស បន្ថយអារម្មណ៍ឡើងចុះ និងសម្រួលដល់សម្ពាធឈាម»។
អ្នកស្រីក៏នៅតែបន្តអភិវឌ្ឍខ្លួនឯងបន្ថែមតាមការអានសៀវភៅ ហ្វឹកហាត់ និងប្រមូលនូវមតិយោបល់ពីមនុស្ស ជុំវិញដើម្បីរៀនបន្ថែម។
កន្លងមកអ្នកស្រីទទួលបាននូវការគាំទ្រ និងពេញចិត្តជាច្រើនពីអតិថិជនរបស់អ្នកស្រី ដែលសូម្បីជនជាតិខ្មែរក៏មកហើយមកទៀត ព្រោះវាជាបទពិសោធថ្មីសម្រាប់គាត់។ ចំណុចសំខាន់ គឺអ្នកហាត់ថែមទាំងទទួលបានការធូរស្រាល ១ បែបថ្មីទៀត។
អ្នកស្រីក៏បន្តរៀបរាប់ថា៖ «វាជាបទពិសោធដែលអ្នកត្រូវមានការយល់ដឹងដោយខ្លួនឯង។ វាធ្វើឱ្យអ្នកបានចូលជ្រៅទៅក្នុងគំនិតអ្នក ដែលមានតែអ្នកទេដែលដឹង។ វាធ្វើឱ្យអ្នកមានភាពវិជ្ជមានជាច្រើន។ អតិថិជនគាត់ចូលចិត្តនូវអារម្មណ៍ទាំងនេះ ដែលវាធ្វើឱ្យបាត់អស់នូវអារម្មណ៍មួហ្មង និងទុក្ខកង្វល់»។
សម្រាប់តម្លៃរៀននៅក្នុងស្ទូឌីយោ គឺមនុស្សម្នាក់ ៣៥ ដុល្លារ ២ នាក់ ៥៥ ដុល្លារ និងសម្រាប់បង្រៀនដល់ផ្ទះគឺ ៥៥ ដុល្លារដូចគ្នា។
ដោយសារវាជាការហាត់បែបផ្ទាល់ខ្លួន ដូច្នេះអ្នកហាត់អាចធ្វើការណាត់ជួប និងកក់ម៉ោងពេល។ ពត៌មានបន្ថែមអាចទាក់ទងអ្នកស្រីតាមរយៈទំព័រហ្វេសប៊ុក @marylauredufrenne និងអ៊ីមែល marylaure.dufrenne@gmail.com៕